අග්‍රාමාත්‍ය අචාර්ය හරිනි අමරසූරිය සහ ශ්‍රී ලංකාවේ එක්සත් අරාබි එමීර් රාජ්‍යයේ (UAE) තානාපති Khaled Nasser Al Ameri මහතා අතර හමවක් අග්‍රාමාත්‍ය කාර්යාලයේදී පැවැත්විය.

මෙම හමුවේදී තානාපතිවරයා ප්‍රජාතන්ත්‍රවාදී මූලධර්ම සඳහා මහජනතාවගේ දැඩි කැපවීම පිළිබඳ අගය කළේය. එක්සත් අරාබි එමීර් රාජ්‍යය සහ ශ්‍රී ලංකාව අතර දිගුකාලීන මිත්‍රත්වය පිළිබඳව තමන් ආඩම්බර වන බවත්, එක්සත් අරාබි එමීර් රාජ්‍යයේ සේවය කරන නිපුණතාවෙන් සපිරි සහ වෘත්තීමය ශ්‍රී ලාංකිකයන්ගේ සේවය අගය කරන බවද තනාපතිවරයා පැවසීය.

තානාපති කාර්යාලයේ දෙවන ලේකම් Rashed Ali Al Mazrouei, අග්‍රාමාත්‍ය ලේකම් ප්‍රදීප් සපුතන්ත්‍රි, අග්‍රාමාත්‍ය අතිරේක ලේකම් මහින්ද ගුණරත්න, විදේශ කටයුතු අමාත්‍යාංශයේ මැදපෙරදිග සහ අප්‍රිකානු අංශයේ අතිරේක ලේකම් යසෝජා කේ ගුණසේකර යන මහත්ම මහත්මීන් සහභාගී විය.

අග්‍රාමාත්‍ය මාධ්‍ය අංශය

බෝ නොවන රෝග පෙර හඳුනා ගැනීම සහ ඊට පෙර සූදානම් වීමේ වැදගත්කම පිළිබඳ රාජ්‍ය සේවකයින් දැනුවත් කිරීමේ වැඩසටහනක් අග්‍රාමාත්‍ය කාර්යාලය සංවිධාන කොට තිබිණි. "නිරෝගීමත් දේශයක් සඳහා නිරෝගීමත් ශ්‍රම බලකායක්" යන තේමාව යටතේ රාජ්‍ය නිලධාරීන් සඳහා මෙම බෝ නොවන රෝග පෙර හදුනා ගැනීමේ සෞඛ්‍ය වැඩසටහනක් මේ යටතේ සංවිධාන කෙරිණ. අග්‍රාමාත්‍ය ආචාර්ය හරිනි අමරසූරියගේ සහභාගීත්වයෙන් අද (28) දවස පුරා අරලියගහ මන්දිරයේ ප්‍රධානශාලාවේදී මෙම වැඩසටහන පැවැත්විණ.

වකුගඩු රුධිර පරීක්ෂාව, රුධිරයේ සීනි මට්ටම පරික්ෂාව, ⁣කොලෙස්ටරෝල් පරීක්ෂාව, දන්ත පරික්ෂාව, ගැබ්ගෙල පිළිකා පරික්ෂාව ඇතුළු බටහිර සහ දේශීය වෛද්‍ය පරික්ෂණ රැසක් මෙහිදී සිදු කර ගැනීමට අවස්ථාව සලසා දී තිබිණ.

මෙම අවස්ථාවට අග්‍රාමාත්‍ය ලේකම් ප්‍රදීප් සපුතන්ත්‍රි, අතිරේක ලේකම්වරුන් වන හර්ෂ විජේවර්ධන, මහින්ද ගුණරත්න යන මහත්වරුන් ඇතුළු විශාල පිරිසක් සහභාගී වුහ.

අග්‍රාමාත්‍ය මාධ්‍ය අංශය

UNICEF Sri Lanka ආයතනයේ නියෝජ්‍ය විධායක අධ්‍යක්ෂිකා Hannan Sulieman මහත්මිය ඊයේ (නොවැම්බර් 26) අග්‍රාමාත්‍ය කාර්යාලයේදී අග්‍රාමාත්‍ය ආචාර්ය හරිනි අමරසූරිය හමුවිය.

නියෝජ්‍ය විධායක අධ්‍යක්ෂවරිය මීට පෙර හමුවේදී සාකච්ඡා කරන ලද ළමා ආරක්‍ෂාව, මන්දපෝෂණය සහ අධ්‍යාපනය ඇතුළු ප්‍රධාන කරුණු කිහිපයක් පිලිබඳ යළි අවධාරණය කළාය.

UNICEF දකුණු ආසියාවේ කලාපීය අධ්‍යක්ෂ සංජේ විජේසේකර, UNICEF සංවිධානයේ ශ්‍රී ලංකාවේ නියෝජිත Christian Skoog, කලාපීය මෙහෙයුම් ප්‍රධානී Yuko Kusamichi, අග්‍රාමාත්‍ය ලේකම් ප්‍රදීප් සපුතන්ත්‍රි, අතිරේක ලේකම් (සංවර්ධන) මහින්ද ගුණරත්න, විදේශ කටයුතු අමාත්‍යාංශයේ එක්සත් ජාතීන්ගේ සහ මානව හිමිකම් පිළිබඳ අධ්‍යක්ෂ දිලිනි ගුණසේකර යන මහත්මමහත්මීන් මෙම අවස්ථාවට සහභාගී විය.

අග්‍රාමාත්‍ය මාධ්‍ය අංශය

නේපාලය, මාලදිවයින සහ ශ්‍රී ලංකාව සඳහා ලෝක බැංකුවේ කලාපීය අධ්‍යක්ෂ David Sislen මහතා ඊයේ (26) අග්‍රාමාත්‍ය කාර්යාලයේදී අග්‍රාමාත්‍ය ආචාර්ය හරිනි අමරසූරිය හමුවිය.

දැනට ක්‍රියාත්මක වන ණය ප්‍රතිව්‍යුහගත කිරීමේ ක්‍රියාවලිය, ශ්‍රී ලංකාවේ සමාජ ආරක්ෂණ ප්‍රතිපත්තිය, දේශගුණික විපර්යාස අවම කිරීම සඳහා රජයේ කැපවීම, ස්ත්‍රී පුරුෂ සමාජභාවය මත පදනම්වූ වැටුප් පරතරය ඉවත් කිරීම පිළිබඳව මෙම හමුවේදී සාකච්ඡා කෙරිණි.

ලෝක බැංකුවේ මාලදිවයින සහ ශ්‍රී ලංකාව සඳහා වන කළමනාකරු Gevorg Sargsyan, අග්‍රාමාත්‍ය ලේකම් ප්‍රදීප් සපුතන්ත්‍රි, අග්‍රාමාත්‍ය අතිරේක ලේකම් මහින්ද ගුණරත්න, විදේශ සම්පත් දෙපාර්තමේන්තුවේ ලෝක බැංකුව සහ IMF අංශයේ අධ්‍යක්ෂිකා හිමාලි බෝගොඩගෙදර, විදේශ සම්පත් දෙපාර්තමේන්තුවේ ලෝක බැංකු අංශයේ නියෝජ්‍ය අධ්‍යක්ෂ රංජිත් ගුරුසිංහ, සහ විදේශ කටයුතු අමාත්‍යාංශයේ ආර්ථික කටයුතු අංශයේ නියෝජ්‍ය අධ්‍යක්ෂ බුද්ධිකා විමලසේන යන මහත්මමහත්මීන් මෙම අවස්ථාවට එක් විය.

අග්‍රාමාත්‍ය මාධ්‍ය අංශය

අග්‍රාමාත්‍ය ආචාර්ය හරිනි අමරසූරිය සහ රටවල් කිහිපයක තානාපතිවරුන් අතර හමුවක් ඊයේ (26) අග්‍රාමාත්‍ය කාර්යාලයේදී පැවත් විය. මෙහිදී රාජ්‍ය තාන්ත්‍රික සබඳතා ශක්තිමත් කිරීම සහ විවිධ ක්ෂේත්‍රයන්හි සහයෝගීතාවය වර්ධනය කර ගැනීම පිළිබඳව සාකච්ඡා කෙරිණ.

ඊජිප්තුවේ තානාපති, Adel Ibrahim, ඉරානයේ තානාපති, ආචාර්ය Alireza Delkhosh, ජපානයේ තානාපති, ISOMATA Akio සහ වතිකානුවේ තානාපති (Apostolic Nuncio) වන අතිඋතුම් රදගුරු Monsignor Brian Udaigwe, යන විදෙස් තානාපතිවරුන් මෙලස අගමැතිවරිය හමුවී සාකච්ඡා කළේය.

අග්‍රාමාත්‍ය ලේකම් ප්‍රදීප් සපුතන්ත්‍රි මහතා ඇතුළු තානාපති කාර්යාලවල ජ්‍යෙෂ්ඨ නියෝජිතයන්, ශ්‍රී ලංකාවේ රාජ්‍ය නිලධාරීන් ඇතුළු පිරිසක් මෙම අවස්ථාවට සහභාගි වූහ.

අග්‍රාමාත්‍ය මාධ්‍ය අංශය

“ස්ත්‍රී පුරුෂ සමාජභාවය මත පදනම් වූ ප්‍රචණ්ඩත්වයට එරෙහි දින 16 වැඩසටහන” නොවැම්බර් 25 වන දින කොළඹ නගර ශාලාවේදී නිල වශයෙන් ආරම්භ කෙරිණ. "ස්ත්‍රී පුරුෂ සමාජභාවය මත පදනම්වූ ප්‍රචණ්ඩත්වයෙන් තොර ශ්‍රී ලංකාවක් කරා: සැමට සුරක්ෂිත පොදු අවකාශයක්" යන තේමාව යටතේ පැවැත්වෙන මෙවර වැඩසටහනේ සමාරම්භක දිනයට ප්‍රධාන ආරාධිතයා ලෙස අග්‍රාමාත්‍ය ආචාර්ය හරිනි අමරසූරිය සහභාගී විය.

ස්ත්‍රී පුරුෂ සමාජභාවය පදනම් කරගත් ප්‍රචණ්ඩත්වය (GBV) තුරන් කිරීමට සහ ශ්‍රී ලංකාව තුළ ආරක්ෂිත, සියලු දෙනා ඇතුළත් පොදු අවකාශයන් නිර්මාණය කිරීමේ අවශ්‍යතාව මෙහිදී අවධාරණය කෙරිණ.

බහු-ආංශික සහයෝගීතාවය සහ ප්‍රතිපත්ති බලාත්මක කිරීම තුළින් GBV ආමන්ත්‍රණය කිරීමට රජය කැපවී ක්‍රියා කරන බව අග්‍රාමාත්‍යවරිය මෙහිදී අවධාරණය කළාය. මේ සඳහා සාමූහිකව ක්‍රියාකිරීමේ වැදගත්කම පිළිබඳව විශේෂයෙන් සඳහන් කළ අගමැතිවරිය මෙසේද පැවසුවාය.

"GBV-නිදහස් ශ්‍රී ලංකාවක් සඳහා වූ දැක්ම ආරම්භ වන්නේ සියලුම පුරවැසියන් සඳහා ආරක්ෂිත පොදු අවකාශයන් සමඟින්. මෙම ව්‍යාපාරය හුදෙක් සංකේතාත්මක එකක් නොවේ - මෙවැනි ප්‍රචණ්ඩත්වයන් සමාජයෙන් තුරන් කිරීමට ස්ථිර පියවර ගැනීමට සෑම පුරවැසියකුම දායක විය යුතුයි" යැයිද සඳහන් කළාය.

ප්‍රචණ්ඩත්වයට එරෙහි ප්‍රබල තේමා පාඨ රැගත් බැනර් සහ පුවරු රැගෙන නිදහස් චතුරශ්‍රයේ සිට කොළඹ මහ නගර සභාව දක්වා දැනුවත් කිරීමේ පාගමන පැවැත්වීම උත්සවයේ විශේෂත්වයක් විය. මෙම පාගමන තුළින් සහයෝගීතාව සංකේතවත් කළ අතර ආරක්ෂිත පොදු අවකාශයන් සඳහා වූ දැඩි අවශ්‍යතාවය තහවුරු කරන්නක්ද විය.

රජයේ, පෞද්ගලික අංශයේ සහ සිවිල් සමාජයේ නියෝජිතයින් ඇතුළු ප්‍රධාන පාර්ශ්වකරුවන්, ව්‍යාපාරයේ ඉලක්ක සඳහා ඔවුන්ගේ කැපවීම යළි තහවුරු කරමින් GBV වලට එරෙහිව අවම ඉවසීමේ ප්‍රතිපත්ති අනුගමනය කිරීමට සාමූහික ප්‍රතිඥාවක් ලබා දුන්හ. දින 16 ක ක්‍රියාකාරීත්වයේ නිල ආරම්භය සනිටුහන් කිරීම සඳහා කොළඹ මහ නගර සභා ගොඩනැගිල්ල තැඹිලි පැහැයෙන් ආළෝකමත් කළ අතර, GBV අවසන් කිරීමට රටේ කැපවීම පිළිබඳ විචිත්‍රවත් මතක් කිරීමක් ලෙස මෙය කැපී පෙනෙන්නක් විය.

මෙම අවස්ථාවට රාජ්‍ය නියෝජිතයන්, රාජ්‍ය නොවන සංවිධාන හවුල්කරුවන්, රාජ්‍ය තාන්ත්‍රිකයින්, සිවිල් සමාජ ක්‍රියාකාරීන් සහ මාධ්‍යවේදීන් ඇතුළු පිරිසක් එක් වූහ.

අග්‍රාමාත්‍ය මාධ්‍ය අංශය.