තායිලන්තයේ පැවැත්වෙන එක්සත් ජාතීන්ගේ වෙසක් දින උළෙල හා සමගාමීව තෙදින සංචාරයකට එක්වූ අග්‍රාමාත්‍ය දිනේෂ් ගුණවර්ධන මහතා 2023.05.31 දින තායිලන්ත අග්‍රාමාත්‍ය ජෙනරාල් ප්‍රයුත් චාන්-ඕ-චා මහතා සමඟ ද්විපාර්ශ්වික සබඳතා පිළිබඳව පුළුල් සාකච්ඡා පැවැත්වීය.
අග්‍රාමාත්‍යවරයාගේ තායිලන්ත තෙදින සංචාරය අතරතුර බැංකොක් නුවර රජයේ මන්දිරයේදී මෙම හමුව සිදුවිය. එක්සත් ජාතීන්ගේ වෙසක් දින සැමරුම් උත්සවයට සහභාගී වීමට සහ දෙරට අතර ද්විපාර්ශ්වික සබඳතා ශක්තිමත් කිරීම සහ වෙළඳ හා ආයෝජන මෙන්ම ආගමික සබඳතා ශක්තිමත් කිරීම පිළිබඳව සාකච්ඡා කිරීම සඳහා මෙම සංචාරය සිදුකෙරිණී.
ශ්‍රී ලංකාව සහ තායිලන්තය අතර ශක්තිමත් සංස්කෘතික හා ආගමික බැඳීමක් ඇත්තේ ඔවුන්ගේ හවුල් බෞද්ධ උරුමයන් නිසාය. තායිලන්තයේ ආරම්භ වූ සියම් නිකාය ශ්‍රී ලංකාවේ අති පූජනීය බෞද්ධ නිකායකි. ඉන්දියාව, බංගලාදේශය සහ පකිස්තානයට පසු දකුණු ආසියාවේ තායිලන්තයේ සිව්වන විශාලතම වෙළඳ සහකරු ශ්‍රී ලංකාව වේ. ශ්‍රී ලංකාව තායිලන්තයට සිදුකරන ප්‍රධාන අපනයන අතර මැණික්, ස්වර්ණාභරණ, තේ, කුළුබඩු, තන්තු සහ ලෝහ නිෂ්පාදන ඇතුළත් වේ. මේ අතර තායිලන්තය ශ්‍රී ලංකාවට සීනි, රෙදිපිළි, වියළි මාළු, සිමෙන්ති, රසායනික නිෂ්පාදන, මෝටර් රථ සහ වාහන අමතර කොටස් අපනයනය කරයි.
තායි අග්‍රාමාත්‍ය ප්‍රයුත් චාන්-ඕ-චා යෝජනා කළේ ඔවුන්ගේ විවිධ සංසන්දනාත්මක වාසි උපයෝගී කර ගනිමින් සහයෝගීතාව දිරිමත් කළ හැකි බවයි. ශ්‍රී ලංකාවේ මැණික් ගල් ඔප දැමීමට සහ ඒවා අලෙවි කිරීමට තායිලන්තය ඉතා හොඳ වෙළඳපොළක් බව ඔහු අදහස් කළේය. මෙම ශ්‍රම බෙදීම දෙරටටම ගෝලීය වෙළඳපොළේ සෘජු තරඟකාරිත්වය අවම කිරීමට ද උපකාරී වනු ඇත.
ශ්‍රී ලංකාව සහ තායිලන්තය එහි සාමාජිකයින් අතර නිදහස් වෙළඳාම ප්‍රවර්ධනය කරන ආයතනයක් වන බහු-ආංශික තාක්ෂණික සහ ආර්ථික සහයෝගීතාව සඳහා වන බෙංගාල මුලපිරීම (BIMSTEC) ට අයත් වේ. ආර්ථික අර්බුදයෙන් ගොඩ ඒම සහ ආර්ථික ක්‍රියාකාරකම් යළි නගා සිටුවීම සඳහා රජය ක්‍රියාත්මක කර ඇති සැලසුම් පිළිබඳව අග්‍රාමාත්‍යවරයා තායිලන්ත අග්‍රාමාත්‍යවරයා දැනුවත් කළේය. ආසියාන් සාමාජික (ASEAN) රටවල් සමඟ සමීප ආර්ථික සහයෝගීතාවක් ඇති කර ගැනීමට රජය සැලසුම් කර ඇති බව ද ඔහු අවධාරණය කළේය.
තායිලන්ත උප අගමැති ,විදේශ අමාත්‍ය ඩොන් ප්‍රමුද්විනායි, අග්‍රාමාත්‍යවරයා සමඟ තමා පැවැත්වූ හමුවීම් සිහිපත් කළ අතර ජාත්‍යන්තර වේදිකාවල ශ්‍රී ලංකාවට පූර්ණ සහයෝගය ලබා දෙන බවට සහතික විය.
අමාත්‍ය විදුර වික්‍රමනායක, රාජ්‍ය අමාත්‍ය විජිත බේරුගොඩ, පාර්ලිමේන්තු මන්ත්‍රී යදාමිණි ගුණවර්ධන සහ දෙරටේ අදාළ නිලධාරීන් මෙම සාකච්ඡාවට සහභාගි වූහ.
අග්‍රාමාත්‍ය මාධ්‍ය අංශය