තීරණයක් ගතහැකි වගකිවයුතු නිලධාරීන් දිස්ත්රික් සංවර්ධන කමිටුවට සම්බන්ධ වෙන්න... - අග්රාමාත්ය ආචාර්ය හරිනි අමරසූරිය
සංවර්ධන ව්යාපෘතිවල වියදම, ප්රගතිය හා ප්රතිලාභ නිවැරැදිව සමාලෝචනය කර ඉදිරිපත් කරන්න...
සංවර්ධන ව්යාපෘති සඳහා වෙන් වූ මුදල් පිළිබඳව ප්රමාණාත්මක දත්ත ගෙනහැර දැක්වීමට වඩා එම ව්යාපෘති හරහා මෙතෙක් සිදු වූ ප්රතිලාභ හා බලපෑම් පිළිබඳව නිවැරැදි අවබෝධයෙන් කටයුතු කිරීම සහ ප්රගතිය සමාලෝචනය කර ඉදිරිපත් කිරීම ඉතා වැදගත් බව අග්රාමාත්ය ආචාර්ය හරිනි අමරසූරිය කොළඹ දිස්ත්රික් සංවර්ධන කමිටුවේ දී ප්රකාශ කරන ලදී.
කොළඹ දිස්ත්රික් සම්බන්ධීකරණ කමිටුව අග්රාමාත්යතුමියගේ සහභාගිත්වයෙන්, සම්බන්ධීකරණ කමිටු සභාපති පාර්ලිමේන්තු මන්ත්රී ලක්ෂ්මන් නිපුණාරච්චි මහතාගේ මූලිකත්වයෙන් ජුලි 15 වැනි දා කොළඹ දිස්ත්රික් ලේකම් කාර්යාලයේ දී පැවැත්විණි.
මෙහි දී විමධ්යගත අයවැය වැඩසටහන, ග්රාමීය මාර්ග සංවර්ධන වැඩසටහන, බස්නාහිර පළාත් දිස්ත්රික් සංවර්ධන සැලැස්ම, දිස්ත්රික් සංවර්ධන වැඩසටහන, වැවිලි සහ ප්රජා යටිතල පහසුකම් අමාත්යංශය යටතේ කොළඹ දිස්ත්රික්කය තුළ යෝජිත ව්යාපෘති වැඩසටහන් යටතේ, 2025 වසර සඳහා යෝජිත ව්යාපෘතිවල මේ වන විට ලබා ඇති ප්රගතිය පිළිබඳව මූලිකව සාකච්ඡා කෙරිණි.
එහි දී අදාළ සංවර්ධන ව්යාපෘතිවල ප්රගතිය සම්බන්ධව වෙන වෙනම සිදුකරන ලද පැහැදිලි කිරීම් වෙත අවධානය යොමු කළ අග්රාමාත්යතුමිය, තීරණයක් ගතහැකි වගකිවයුතු නිලධාරීන් දිස්ත්රික් සංවර්ධන කමිටුවට සම්බන්ධ වීමේ වැදගත්කම අවධාරණය කළා ය.
තවද මෙම වසරට අදාළව දිස්ත්රික්කය තුළ සිදුකිරීමට නියමිත සංවර්ධන ව්යාපෘතීන්වල ප්රගතිය නිවැරැදිව සමාලෝචනය කරගැනීම එළඹෙන වසර සඳහා සැලසුම් ගොඩනැගීමේ දී ඉතා වැදගත් වන බව අග්රාමාත්යවරිය විසින් පෙන්වා දෙන ලදී.
මෙහිදී අග්රාමාත්යවරිය විසින් ගෙන ආ යෝජනාවක් අනුව, මෙම වසරට අදාළ කොළඹ දිස්ත්රික්කයේ සම්පූර්ණ සංවර්ධන ව්යාපෘතිවල ප්රගතිය අගෝස්තු මාසයේ දී නැවත අධීක්ෂණයට ලක් කිරීම පිළිබඳව කොළඹ දිස්ත්රික් සම්බන්ධීකරණ කමිටු සභාපති, පාර්ලිමේන්තු මන්ත්රී ලක්ෂ්මන් නිපුණාරච්චි මහතාගේ අවධානය යොමු විය.
තවද මෙම සංවර්ධන කමිටු රැස්වීමේ දී ප්රවාහන, මහාමාර්ග, වරාය හා සිවිල් ගුවන්සේවා අමාත්යංශයේ විශේෂ ව්යාපෘතියක් ලෙස ක්රියාත්මක කිරීමට නියමිත නාගරික ප්රවාහන ප්රතිපත්තිය පිළිබඳව කමිටු සාමාජිකයන් වෙනුවෙන් විශේෂ හඳුන්වාදීමක් ද සිදුකරන ලදී.
මෙම අවස්ථාවට කොළඹ දිස්ත්රික් පාර්ලිමේන්තු මන්ත්රීවරුන් වන සමන්මලී ගුණසිංහ, අරුණ පනාගොඩ, අසිත නිරෝෂණ, නිතීඥ සුසන්ත දොඩාවත්ත, දේවානන්ද සුරවීර යන මහත්මහත්මීන් ද කොළඹ දිස්ත්රික්කයට අයත් පළාත් පාලන ආයතනවල සභාපතිවරුන් හා උපසභාපතිවරුන් ඇතුළුව කොළඹ දිස්ත්රික් ලේකම් ප්රසන්න ජනක කුමාර මහතා මෙන්ම දිස්ත්රික් සංවර්ධන කමිටු සාමාජිකයන් සම්බන්ධ වූහ.
අග්රාමාත්ය මාධ්ය අංශය