දිවයිනේ සෑම ප්‍රදේශයකම සිටින දරුවන්ට නව තාක්ෂණික අවස්ථාවන් හිමිවන අධ්‍යාපන ක්‍රමයක් නිර්මාණය කිරීම රජයේ අරමුණ බව අග්‍රාමාත්‍ය ආචාර්ය හරිනි අමරසූරිය පැවසුවා ය.

කොළඹ බුර්හානි සෙරන්ඩිබ් විද්‍යාලයේ අද (28) පැවැති, ශ්‍රී ලංකාවේ තරුණ පරපුරේ තාක්ෂණික නිපුණතා ජාත්‍යන්තර මට්ටමට ඔසවා තබන ලෝක රොබෝ ඔලිම්පියාඩ් (WRO) ජාතික තරගාවලියේ සමාරම්භක අවස්ථාවට එක්වෙමින් අග්‍රාමාත්‍ය ආචාර්ය හරිනි අමරසූරිය මේ බව පැවසුවා ය.

මෙවර තරගාවලිය සඳහා දිවයින පුරා පාසල්වලින් කණ්ඩායම් 66ක් සහභාගී වූ අතර, එය පසුගිය වසරට සාපේක්ෂව තෙගුණයක වර්ධනයකි. ​“Robots Meet Culture” (රොබෝ තාක්ෂණයේ සහ සංස්කෘතියේ හමුව) යන තේමාව යටතේ පැවැත්වුණු මෙම තරගාවලියට සිසුන් 500කට අධික පිරිසක් සහභාගී වූ අතර දේශීය සංස්කෘතිය සහ නවීන ඉංජිනේරු විද්‍යාව මුසු වූ නිර්මාණ ඉදිරිපත් කර තිබුණි.

​මෙහිදී වැඩි දුරටත් අදහස් දක්වමින් අග්‍රාමාත්‍ය ආචාර්ය හරිනි අමරසූරිය මෙසේද පැවසීය.

වර්තමාන වේගයෙන් වෙනස් වන ලෝකය තුළ විද්‍යාව, තාක්ෂණය, ඉංජිනේරු විද්‍යාව සහ ගණිතය (STEM) යන ක්ෂේත්‍ර කෙරෙහි අවධානය යොමු කිරීම රටක ජාතික ප්‍රමුඛතාවක් විය යුතුයි.

ලෝක රොබෝ ඔලිම්පියාඩ් වැනි අවස්ථාවන් හරහා අපේ තරුණ පරපුරට තර්කානුකූල චින්තනය, නවෝත්පාදනය සහ සහයෝගීතාව වැනි අත්‍යවශ්‍ය කුසලතා ප්‍රගුණ කිරීමට මහඟු අවස්ථාවක් ලැබෙනවා.

2025 වසරේදී ශ්‍රී ලංකාව ප්‍රථම වතාවට සිංගප්පූරුවේ පැවති ජාත්‍යන්තර රොබෝ ඔලිම්පියාඩ් තරගාවලියට කණ්ඩායම් දෙකක් ඉදිරිපත් කිරීමත් අපේ දරුවන්ට ලැබුණු ඉතා වැදගත් අත්දැකීමක්.

දිවයිනේ සෑම ප්‍රදේශයකම සිටින දරුවන්ට මෙවැනි තාක්ෂණික අවස්ථාවන් හිමිවන අධ්‍යාපන ක්‍රමයක් නිර්මාණය කිරීම රජයේ අරමුණ බව ද අග්‍රාමාත්‍යතුමිය අවධාරණය කළාය.

​මෙම අවස්ථාවට අග්‍රාමාත්‍ය ලේකම් ප්‍රදීප් සපුතන්ත්‍රි මහතා ඇතුළු ඉන්දීය මහ කොමසාරිස් කාර්යාලයේ නිලධාරීන්, මෙරට රාජ්‍ය නිලධාරීන් පාසල් සිසුන් විශාල පිරිසක් එක්ව සිටියහ.

අග්‍රාමාත්‍ය මාධ්‍ය අංශය

2026 මාර්තු 26 වන දින ශ්‍රී ලංකාවේ අභිනවයෙන් පත් වූ දූත මණ්ඩල ප්‍රධානීන් අග්‍රාමාත්‍ය ආචාර්ය හරිනි අමරසූරිය අග්‍රාමාත්‍ය කාර්යාලයේදී හමුවිය.

මැලේසියාව සඳහා නම් කරන ලද මහ කොමසාරිස් දර්ශන එම්. පෙරේරා මහතා, ඔස්ට්‍රියාව සහ PRUN සඳහා නම් කරන ලද තානාපති ඩයනි මෙන්ඩිස් මහත්මිය, ඉතියෝපියාව සහ අප්‍රිකානු සංගමය සඳහා නම් කරන ලද තානාපති එන්.අයි.ඩී. පරණවිතාන මහත්මිය, ඉරානය සඳහා නම් කරන ලද තානාපති මහාචාර්ය එම්.අයි. ෆසීහා අස්මි, ඊශ්‍රායලය සඳහා නම් කරන ලද තානාපති සමන් කුමාර චන්ද්‍රසිරි මහතා සහ පලස්තීනය සඳහා නම් කරන ලද නියෝජිත එම්. ෆාරුක් එම්. ෆවුසර් මහතා මෙම දූත පිරිසට ඇතුළත් විය.

දූත මණ්ඩල ප්‍රධානීන්ට සිය සුබ පැතුම් එක් කළ අග්‍රාමාත්‍යවරිය, ශ්‍රී ලංකාවේ සමාජ-ආර්ථික අභිවෘද්ධිය සඳහා ඔවුන්ගේ කාර්යභාරය අවධාරණය කළ අතර, ශ්‍රී ලංකාවේ ජාතික අවශ්‍යතා ඉදිරියට ගෙන යාමේදී ඔවුන්ගේ ඉදිරි වගකීම්වල වැදගත්කම සඳහන් කළාය.

නම් කරන ලද සත්කාරක රටවල් සහ බහුපාර්ශ්වික සබඳතා හමුවේ ස්ථාවර, වෘත්තීමය සහ උපායමාර්ගික මැදිහත්වීමක් තුළින් ජාත්‍යන්තර වේදිකාව තුළ ශ්‍රී ලංකාව පිළිබඳ ධනාත්මක සහ විශ්වසනීය ප්‍රතිරූපයක් ගොඩ නැගීමේ වැදගත්කම ද අග්‍රාමාත්‍යවරිය මෙහිදී තවදුරටත් අවධාරණය කළා ය.

තිරසාරත්වය, නවෝත්පාදනය සහ දිගුකාලීන සංවර්ධන ක්‍රියාවලිය කෙරෙහි අවධානය යොමු කරමින්, ශ්‍රී ලංකාවේ සංවර්ධන ප්‍රමුඛතා ක්ෂේත්‍ර සඳහා ආයෝජන අවස්ථා හඳුනාගෙන ආයෝජන ආකර්ෂණය කර ගැනීමට ප්‍රමුඛත්වය දිය යුතු බව අග්‍රාමාත්‍යතුමිය නව දූත මණ්ඩල ප්‍රධානීන් දිරිමත් කරමින් සඳහන් කළා ය.

මෙම හමුවේදී නව වෙළඳපොළ අවස්ථා ගවේෂණය කිරීම සහ වෙළඳ සබඳතා ශක්තිමත් කිරීම ඇතුළුව ශ්‍රී ලංකාවේ අපනයන ප්‍රවර්ධනය සහ විවිධාංගීකරණය කෙරෙහි විශේෂ අවධානයක් යොමු කරන ලදී.

මෙම අවස්ථාවට අග්‍රාමාත්‍ය ලේකම්, අග්‍රාමාත්‍ය අතිරේක ලේකම් සාගරිකා බෝගහවත්ත මහත්මිය සහ නම් කරන ලද දූත මණ්ඩල ප්‍රධානීන් සහභාගී වූහ.

අග්‍රාමාත්‍ය මාධ්‍ය අංශය

2026 මාර්තු 26 වන දින අග්‍රාමාත්‍ය කාර්යාලයේදී කියුබානු ජනරජයේ තානාපති Patricia Lazara Pego Guerra මහත්මිය අග්‍රාමාත්‍ය ආචාර්ය හරිනි අමරසූරිය හමුවිය.

මෙම හමුවේදී, දෙපාර්ශ්වය විසින් ද්විපාර්ශ්වික සබඳතාවල වැදගත්කම අවධාරණය කරමින් ශ්‍රී ලංකාව සහ කියුබාව අතර පවතින දිගුකාලීන මිත්‍රත්වය නැවත තහවුරු කළහ.

දෙරටේ මානව සම්පත ශක්තිමත් කිරීම සඳහා හුවමාරු වැඩසටහන් සහ කුසලතා සංවර්ධන මුලපිරීම් ක්‍රියාත්මක කිරීම කෙරෙහි අවධානය යොමු කිරීම ඇතුළුව අධ්‍යාපන ක්ෂේත්‍රයේ සහයෝගීතාව තවදුරටත් ශක්තිමත් කිරීම කෙරෙහි මෙම සාකච්ඡාවේ දී අවධානය යොමු කළහ.

තිරසාර කෘෂිකාර්මික භාවිතයන් දියුණු කිරීම සඳහා දැනුම සහ තාක්ෂණික විශේෂඥතාව හුවමාරු කර ගැනීම කෙරෙහි විශේෂ අවධානයක් යොමු කරමින් කෘෂිකර්මික අංශයේ සහයෝගීතාව ශක්තිමත් කිරීම කෙරෙහි ද මෙහිදී අවධානය යොමු වූ අතර ක්‍රීඩා ක්ෂේත්‍රයේ සහයෝගීතාව ශක්තිමත් කිරීමේ වැදගත්කම ද ඉස්මතු කරන ලදී.

මෙම අවස්ථාවට අග්‍රාමාත්‍ය ලේකම්, අග්‍රාමාත්‍ය අතිරේක ලේකම් සාගරිකා බෝගහවත්ත මහත්මිය සහ විදේශ කටයුතු අමාත්‍යාංශයේ ලතින් ඇමරිකානු සහ කැරිබියන් අංශයේ අධ්‍යක්ෂ ජනරාල් රත්නසිංහම් කොහුලරංගන් මහතා සහභාගී විය.

අග්‍රාමාත්‍ය මාධ්‍ය අංශය

එවැනි පරිවර්තනයක් ඇති කිරීම ශ්‍රී ලංකාවේ ජාතික ප්‍රමුඛතාවයක්

මාර්තු 24 වන දින පැවති අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය සමඟ සහයෝගිතාවයෙන් පිලිපීනයේ Colombo Plan මාණ්ඩලික විද්‍යාලය විසින් සංවිධාන කරන ලද “දේශගුණික ඔරොත්තු දීමේ හැකියාව සහ හරිත රැකියා සඳහා TVET පද්ධති පරිවර්තනය කිරීම” පිළිබඳ ජාත්‍යන්තර සමුළුවේ ප්‍රධාන ආරාධිත අමුත්තා ලෙස සහභාගි වෙමින් අග්‍රාමාත්‍ය ආචාර්ය හරිනි අමරසූරිය මේ බව පැවසුවා ය.

මෙම “ඩිජිටල්, හරිත සහ ඇතුළත් ආර්ථිකයක් සඳහා තාක්ෂණික සහ වෘත්තීය අධ්‍යාපන සහ පුහුණු (TVET) පද්ධතිය පරිවර්තනයක් කිරීම” පිළිබඳ සම්මේලනය භූතානය, ෆීජි, මැලේසියාව, මාලදිවයින, මියන්මාරය, නේපාලය, පිලිපීනය, තායිලන්තය, පකිස්ථානය සහ ශ්‍රී ලංකාව ඇතුළු CPSC සාමාජික රටවල නියෝජිතයින්ගේ සහභාගීත්වයෙන් 2026 මාර්තු 23 සිට 27 දක්වා පැවැත්වෙන අතර දේශගුණික විපර්යාසයන්ට ඔරොත්තු දෙන හරිත කුසලතා සංවර්ධනය කිරීම පිළිබඳ ඉහළ මට්ටමේ සංවාදයන් සඳහා අවකාශය සලසාලයි.

මෙම අවස්ථාව සහභාගී වූ අග්‍රාමාත්‍ය ආචාර්ය හරිනි අමරසූරිය, දේශගුණික විපර්යාසවලට මුහුණ දීමේදී සහ තිරසාර අනාගතයක් කරා ගමන්කිරිමේදි ප්‍රායෝගික, කාලීන සහ අනාගත දැක්මක් ඇති පුද්ගලයින් ගොඩනැගීමට තාක්ෂණික සහ වෘත්තීය අධ්‍යාපනය සහ පුහුණු පද්ධතියෙහි (TVET) කාර්යභාරය අවධාරණය කළා ය.

එවැනි පරිවර්තනයක් ඇති කිරීම ශ්‍රී ලංකාවේ ජාතික ප්‍රමුඛතාවයක් වන බවත්, අධ්‍යාපනය දැනුම බෙදා දීම සඳහා පමණක් සීමා නොවී පුද්ගලයින්ට නව අවස්ථා ලබා දෙන, සමාජයට අර්ථවත් ලෙස දායක විය හැකි පිරිසක් ගොඩනගන අවකාශයක් විය යුතු අග්‍රාමාත්‍යවරිය තවදුරටත් අවධාරණය කළාය.

විෂයමාලාවට හරිත කුසලතා ඇතුළත් කිරීම, නවීන පුහුණු පහසුකම් සංවර්ධනය සඳහා සඳහා ආයෝජනය කිරීම, නවෝත්පාදන ප්‍රවර්ධනය කිරීම සහ පුහුණු ආයතන සහ නැගී එන හරිත කර්මාන්ත අතර සහයෝගීතාවය වර්ධනය කිරීම මගින් අධ්‍යාපන හා පුහුණු පද්ධතිවලට පාරිසරික තිරසාරභාවය ඒකාබද්ධ කිරීමේ අවශ්‍යතාවය ද අග්‍රාමාත්‍ය මෙහිදී අවධාරණය කළාය.

මෙම ක්‍රියාවලියේදී සමානාත්මතාවය සහතික කිරීමේ වැදගත්කම අවධාරණය කළ අග්‍රාමාත්‍යවරිය, හරිත සංක්‍රාන්තිය හරහා ලැබෙන අවස්ථාවන් සඳහා තරුණයින්, කාන්තාවන්, විශේෂ අවශ්‍යතා ඇති පුද්ගලයින් සහ ආන්තික ප්‍රජාවන් ඇතුළු සියලුදෙනාට ප්‍රවේශ වීමට හැකි වන ලෙස කටයුතු කළ යුතු බව පැවසුවා ය.

කලාපීය සහ ජාත්‍යන්තර හවුල්කාරිත්වයන් සමඟ සමීපව කටයුතු කිරීමට ශ්‍රී ලංකාවේ කැපවීම අවධාරණය කළ අග්‍රාමාත්‍යවරිය, එම හවුල්කාරිත්වයන් සැබෑ හවුල්කාරිත්වයන් සහ ප්‍රතිලාභ බවට පරිවර්තනය කර ගත යුතු බව අවධාරණය කළා ය.

මෙම අවස්ථාවට අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයේ ලේකම් නාලක කළුවැව මහතා, අතිරේක ලේකම් (වෘත්තීය පුහුණු) සමන්ති සේනානායක මහත්මිය කොළඹ සැලසුම් මාණ්ඩලික විද්‍යාලයේ අධ්‍යක්ෂ ජනරාල් මහාචාර්ය (වෛද්‍ය) Suresh K. Dhameja මහතා සහ TVET පරිපාලකයින්, ආයතනික ප්‍රධානීන්, ප්‍රතිපත්ති සම්පාදකයින්, උපදේශකයින්, කර්මාන්ත නියෝජිතයින් සහ කලාපය පුරා ජාත්‍යන්තර නියෝජිතයින් සහ අමාත්‍යාංශවල ජ්‍යෙෂ්ඨ නිලධාරීන් සහ නිලධාරීන් සහභාගී විය.

අග්‍රාමාත්‍ය මාධ්‍ය අංශය

මෙරට හෙද සේවාව උපාධි මට්ටමට උසස් කිරීමේ අරමුණින් ජාතික හෙද විශ්වවිද්‍යාලයක් පිහිටුවීමේ රජයේ ප්‍රතිපත්ති යෝජනා යටතේ පිහිටුවන ලද විශේෂ කමිටුවේ තත්ත්ව සමාලෝචනය සඳහා වූ සාකච්ඡාවක් අග්‍රාමාත්‍ය ආචාර්ය හරිනි අමරසූරියගේ ප්‍රධානත්වයෙන් මාර්තු 23වැනි දා අග්‍රාමාත්‍ය කාර්‍යාලයේ දී පැවැත්විණි.

මෙහිදී හෙද විශ්වවිද්‍යාලය පිහිටුවීම කටයුතු වෙනුවෙන් කමිටුවේ මෙතෙක් ක්‍රියාවලිය පිළිබඳව අග්‍රාමාත්‍යවරිය සොයා බැලූ අතර කමිටු සාමාජිකයන් වෙත පැවති ගැටලු සහ අදහස් කෙරෙහි අග්‍රාමාත්‍යවරියගේ අවධානය යොමු විය.

විශ්වවිද්‍යාලයක් ස්ථාපනය කිරීම යනු දිගුකාලීන සහ සංකීර්ණ ක්‍රියාවලියක් බව අවධාරණය කළ අග්‍රාමාත්‍යවරිය, හදිසි තීරණයන්ගෙන් තොරව, උසස් අධ්‍යාපන ප්‍රමිතීන්ට අනුකූලව සහ දැනට විශ්වවිද්‍යාල පද්ධතිය තුළ පවතින අර්බුද සහ අභියෝග සලකා බලමින්, මෙම ව්‍යාපෘතිය ඉදිරියට ගෙන යාම වැදගත් බව පෙන්වා දෙන ලදී.

මෙම සාකච්ඡාව සඳහා විශ්වවිද්‍යාල ප්‍රතිපාදන කොමිෂන් සභාවේ උප සභාපති මහාචාර්ය කේ. එල් වසන්ත කුමාර, සමස්ත ලංකා හෙද සංගමයේ නියෝජිතයින් සහ සෞඛ්‍ය හා ජනමාධ්‍ය අමාත්‍යාංශයේ නිලධාරින් ද සහභාගී වූහ.

අග්‍රාමාත්‍ය මාධ්‍ය අංශය

මසක කාලයක් පුරා දැඩි උපවාසයක නිරත වෙමින්, ආධ්‍යාත්මික ශික්ෂණය ප්‍රගුණ කළ ලෝකවාසී මෙන්ම ශ්‍රී ලාංකික ඉස්ලාම් බැතිමතුන් මහත් හරසරින් සමරනු ලබන ඊදුල් ෆිතර් හෙවත් රාමසාන් උත්සවය වෙනුවෙන් සුභාශිංසන පිරිනමනුයේ ඉමහත් සතුටිනි.

රාමසාන් සමය යනු හුදෙක් ආහාර පානවලින් වැළකී සිටීම පමණක් නොව ඉවසීම, කැපකිරීම සහ අනුන්ගේ දුක හඳුනාගැනීම වැනි උතුම් මානුෂීය ගුණාංග ජීවිතයට සමීප කරගන්නා කාලයකි. මෙම උතුම් වටිනාකම් පෞද්ගලික ජීවිතයට පමණක් සීමා නොකර, රටේ පොදු යහපත උදෙසා යොදා ගැනීම වර්තමානයේ අප හමුවේ ඇති ප්‍රධාන අවශ්‍යතාවකි.

අප රටේ පවතින විවිධත්වය අපට ශක්තියකි. රාමසාන් උත්සවය අපට උගන්වන සහෝදරත්වය සහ සහජීවනය යන පණිවුඩය, ශ්‍රී ලාංකිකයන් ලෙස එක් ධජයක් යටතේ නැගී සිටීමට අපව දිරිමත් කරයි. ආගමික සහ සංස්කෘතික බැඳීම් ශක්තිමත් කරමින්, ජාතීන් අතර ගොඩනැගෙන අන්‍යෝන්‍ය විශ්වාසය හා ගෞරවය මත රටේ තිරසාර සාමය සහ සමෘද්ධිය රඳා පවතී.

අප මෙලෙස සහෝදරත්වයෙන් රාමසාන් සමරන මොහොතක, ලොව පුරා පවතින යුද ගැටුම් හේතුවෙන් පීඩාවට පත්ව සිටින ජනතාව පිළිබඳව ද අපගේ අවධානය යොමු විය යුතුය. විශේෂයෙන්ම මැදපෙරදිග කලාපයේ පවතින අවාසනාවන්ත යුධමය වාතාවරණය හමුවේ ඉස්ලාමීය බැතිමතුන් ඇතුළු සමස්ත ජනතාව මුහුණ දී සිටින අතිශය දුෂ්කර හා වේදනාකාරී තත්ත්වය පිළිබඳව අප දැඩි සංවේගයක් පළ කරමු. මානව හිමිකම් සහ මානුෂීය වටිනාකම් අභියෝගයට ලක්ව ඇති මෙවන් යුගයක, යුද්ධයේ බිහිසුණු බවින් පීඩිත ජනතාවට කඩිනමින් සහන සැලසීමත්, එම කලාපයන් තුළ සාමය සහ ස්ථාවරත්වය ස්ථාපිත වීමත් සමස්ත ලෝක ප්‍රජාවගේම වගකීමක් මෙන්ම ප්‍රාර්ථනාවකි.

ගෝලීය අභියෝග හමුවේ හුදෙකලා නොවී, එකිනෙකාට උදව් කරමින් සහෝදරත්වයෙන් කටයුතු කිරීම සමාජ ස්ථාවරත්වයට ශක්තිමත් අඩිතාලමකි. රාමසාන් උත්සවයෙන් නිරූපණය වන මෙම ආධ්‍යාත්මික ශික්ෂණය, වත්මන් අර්බුද ජයගෙන රටක් ලෙස සමෘද්ධිය කරා යන ගමනේදී අප සැමට මහත් ශක්තියක් වනු නොඅනුමානය.

තමා සතු දෙයින් කොටසක් නැති බැරි අය වෙනුවෙන් පරිත්‍යාග කරමින් (සකාත්), සමාජ සාධාරණත්වය ඉස්මතු කරන මෙම උතුම් දිනයේ, සියලු දෙනා එක්ව වඩාත් යහපත් සහ සහයෝගී ශ්‍රී ලංකාවක් ගොඩනැගීමට අදිටන් කරගත යුතුය. මෙම රාමසාන් උත්සවය ඔබ සැමට සතුට, සාමය සහ සෞභාග්‍යය සපිරි ජීවිතයක මූලාරම්භය වේවායි ප්‍රාර්ථනා කරමි.

ඔබ සැමට සුභ රාමසාන් දිනයක් වේවා!

ආචාර්ය හරිනි අමරසූරිය
අග්‍රාමාත්‍ය,
ශ්‍රී ලංකා ප්‍රජාතාන්ත්‍රික සමාජවාදී ජනරජය.
2026 මාර්තු 21 දින