ශ්‍රී ලංකාවේ චෙක් ජනරජයේ තානාපතිනි ආචාර්ය Eliska Zigova මහත්මිය මාර්තු 25 වන දින අරලියගහ මන්දිරයේදී අග්‍රාමාත්‍ය ආචාර්ය හරිනි අමරසූරිය හමුවිය.

දෙරට අතර දිගුකාලීන මිත්‍රත්වය යළි අවධාරණය කරමින් ද්විපාර්ශ්වික සහයෝගීතාව වැඩි දියුණු කිරීම සඳහා පවතින නව ක්‍රියාමාර්ග පිළිබඳව මෙහිදී සාකච්ඡා කෙරිණ.

මෙහිදී චෙක් ජනරජය විසින් ශ්‍රී ලංකාවට දක්වන අඛණ්ඩ සහයෝගය අග්‍රාමාත්‍යවරිය පැසසුමට ලක් කළාය. රටේ දේශපාලන ස්ථාවරත්වය සහ මහජන විශ්වාසය පිළිබිඹු කරමින්, ප්‍රජාතන්ත්‍රවාදී පාලනය සඳහා නව රජය දක්වන කැපවීම සහ සාමකාමී මැතිවරණ දෙකක් සාර්ථකව ක්‍රියාත්මක කිරීම පිළිබඳව ද තානාපතිනිය මෙහිදී සිය ප්‍රසාදය පල කළාය.

රාජ්‍ය තාන්ත්‍රික හා ආර්ථික සබඳතා ශක්තිමත් කිරීම කෙරෙහිද මෙම හමුව අතරතුර සාකච්ඡා විය. තානාපති Zigova දෙරට අතර දැනට පවතින ගිවිසුම්වල වැදගත්කම පෙන්වා දුන් අතර ප්‍රධාන ක්ෂේත්‍රවල සහයෝගීතාව පුළුල් කිරීමට තම රජයේ කැමැත්ත ප්‍රකාශ කළාය.

දෙරටේ අතර විද්‍යාව සහ අධ්‍යාපනය පිළිබඳ අවබෝධතා ගිවිසුමක් (MoU) අත්සන් කිරීමේ හැකියාව පිළිබඳව සාකච්ඡා කළ අතර එයට අධ්‍යයන හුවමාරු වැඩසටහන්, පර්යේෂණ සහයෝගීතාව වර්ධනය සහ දැනුම හුවමාරු වැඩසටහන් ඇතුළත් කිරීමට අවධානය යොමු විය.

අග්‍රාමාත්‍යවරිය විසින් පරිසර සංරක්ෂණය සහ නාගරික තිරසරභාවය සඳහා කැප වූ ජාතික මට්ටමේ ව්‍යාපෘතියක් වන "Clean Sri Lanka වැඩසටහන" පිළිබඳව තානාපතිවරිය වෙත කරුණු ඉදිරිපත් කළ අතර ශ්‍රී ලංකාවේ සංස්කෘතික උරුමයන්, ස්වාභාවික පරිසර හා වර්ධනය වන සංචාරක පරිසර පද්ධති අත්විඳීමට චෙක් රජයේ සංචාරකයින්ට ආරාධනා කළාය.

අග්‍රාමාත්‍ය ලේකම් ප්‍රදීප් සපුතන්ත්‍රි මහතා සහ විදේශ කටයුතු අමාත්‍යාංශයේ යුරෝපය සහ උතුරු ඇමරිකානු අංශයේ අධ්‍යක්ෂ ජනරාල් පී.ආර්.එස්.එස්. ගුණරත්න යන මහත්වරුන් සහ චෙක් ජනරජ තානාපති කාර්යාලයේ නිලධාරීන් පිරිසක් සහභාගී වූහ.

අග්‍රාමාත්‍ය මාධ්‍ය අංශය

ස්ත්‍රී පුරුෂ සමානාත්මතාව සහතික කිරීමට මෙන්ම කාන්තාවන්ට එරෙහිව සිදුවන ප්‍රචණ්ඩත්වය තුරන් කිරීමට THRIVE වැනි ව්‍යාපෘතීන් ශ්‍රී ලංකාවට වටිනා අවස්ථාවන් වේ.

ඔස්ට්‍රේලියානු මහ කොමසාරිස් කාර්‍යාලය, එක්සත් ජාතීන්ගේ කාන්තා සංවිධානය සහ Chrysalis ආයතනය එක්ව සංවිධාන කොට තිබූ ’THRIVE- Together for Her: Resilience-building, Inclusivity, and Voices for Equality in Sri Lanka’ ව්‍යාපෘතිය එළිදැක්වීමේ නිල උත්සවයට සහභාගී වෙමින් අග්‍රාමාත්‍යතුමිය මේ බව ප්‍රකාශ කළා ය. මෙම ව්‍යාපෘතිය එළිදැක්වීම මාර්තු 25 වැනිදා කොලඹ ඕස්ට්‍රේලියානු මහ කොමසාරිස් කාර්‍යාලයේදී පැවැත්විණි.

THRIVE යනු ඕස්ට්‍රේලියානු රජයේ අරමුදලින් එක්සත් ජාතීන්ගේ කාන්තා සංවිධානය සහ Chrysalis ආයතනය එක්ව ක්‍රියාත්මක කරනු ලබන පස් අවුරුදු ව්‍යාපෘතියකි. ශ්‍රී ලංකා රජය සහ එක්සත් ජාතීන්ගේ සංවිධානය විසින් ශ්‍රී ලංකාවේ එක්සත් ජාතීන්ගේ සංවිධානයේ ක්‍රියාකාරිත්වයට මගපෙන්වීම සඳහා සහයෝගීතා අත්සනින් 2023-2027 වසර සඳහා ශ්‍රී ලංකාවේ එක්සත් ජාතීන්ගේ තිරසාර සංවර්ධන සහයෝගීතා රාමුවේ 6 වන තිරසාර සංවර්ධන ඉලක්කය වන “ස්ත්‍රී පුරුෂ සමානාත්මතාව සහ කාන්තා සවිබල ගැන්වීම” සාක්ෂාත් කර ගැනීමේ අරමුණින් මෙම ව්‍යාපෘතිය ආරම්භ කොට තිබේ.

විශේෂ අවශ්‍යතා ඇති කාන්තාවන්, මාතෘ මූලික පවුල් සහ මන්නාරම, කිලිනොච්චිය, නුවර එළිය, බදුල්ල සහ කොළඹ යන දිස්ත්‍රික්ක 6 හි වෙසෙන වතු ආශ්‍රිත ප්‍රජාවේ කාන්තාවන් මුල් කරගනිමින් කාන්තාවන්ට මුහුණ දීමට සිදුවන ආර්ථික අර්බුද තත්ත්වයන්, අනාරක්ෂිත බව සහ දේශගුණික විපර්යාසවලින් කාන්තාවට වන බලපෑම් වලින් ආරක්ෂා කර ගැනීම සහ ශ්‍රී ලංකාවේ ස්ත්‍රී පුරුෂ සමාජභාවී සමානාත්මතාවය සහ කාන්තා සවිබල ගැන්වීම් ප්‍රවර්ධනය කිරීම මෙම ව්‍යාපෘතියේ අරමුණ වී ඇත.

මෙම සමාරම්භක උළෙලේදී වැඩි දුරටත් අදහස් දැක්වූ අග්‍රාමාත්‍ය ආචාර්ය හරිනි අමරසූරිය, ස්ත්‍රී පුරුෂ සමාජභාවී සමානාත්මතාව සහතික කිරීම සහ කාන්තා හිංසනය පිටුදැකීම සඳහා ප්‍රතිපත්තිමය හා ආකල්පමය වෙනසක් අවශ්‍ය බව අවධාරණය කළා ය.

"සාක්ෂරතාවය 92% ලෙස ශ්‍රී ලංකාව මානව සංවර්ධන දර්ශකය ඉහළ අගයක් ළඟා කර ගෙන තියෙනවා. එයිනුත් විශ්වවිද්‍යාල සිසුන්ගෙන් 60% කට වැඩි ප්‍රමාණයක් කාන්තාවන්. නමුත් වැටුපක් ලබන ශ්‍රම බලකායේ කාන්තා සහභාගීත්වය 35% ක් පමණයි. රැකියා අවස්ථා තුළින් ආර්ථිකයට දායක වීමට කාන්තාවන්ට හැකියාව ඇති බව සහතික කිරීමට නිසි ක්‍රමවේදයක් අවශ්‍යයි. කාන්තාවන් විසින් වැටුප් නොලබා සිදු කරනු ලබන ශ්‍රම සහභාගීත්වය හඳුනාගෙන, නිසි පිළිගැනීමක් ලබාදීමත්, සමාන රැකියා අවස්ථා සහ වැටුප් සමඟ කාන්තාවන්ට ආර්ථිකයට දායක වීමට අවස්ථාවන් ඇති බව සහතික කිරීමත් අත්‍යවශ්‍යයි.

ශ්‍රී ලංකා පාර්ලිමේන්තුවට 2024 දී ඉදිරිපත් කෙරුණු කාන්තා බලගැන්වීමේ පනත මගින්, කාන්තා අයිතිවාසිකම් අධීක්ෂණය කිරීමට සහ කාන්තාවන් පිළිබඳ ස්වාධීන ජාතික කොමිසමක් පිහිටුවීමත්, කාන්තාවන් සඳහා ජාතික අරමුදලක් නිර්මාණය කිරීමට කටයුතු කෙරුණා.

අපි රජයක් විදිහට මෙවර ජාතික අයවැය යටතේ කාන්තාවන් සහ ගැහැණු ළමුන් සඳහා ප්‍රතිලාභ රැසක් ක්‍රියාත්මක කරලා තිබෙනවා. අධ්‍යාපන අමාත්‍යවරිය වශයෙන් මට විශ්වාසයෙන් කියන්න පුළුවන් ආර්ථික බාධාවන් නිසා කිසිම දරුවෙකුට අධ්‍යාපනය අතපසු නොවන ලෙස සියලුම දරුවන්ට නොමිලේ නිල ඇඳුම්, පාවහන්, සනීපාරක්ෂක පහසුකම්, ආහාර, පොත්පත් ලබා දීම ඇතුළු අධ්‍යාපනයට ප්‍රවේශය සහතික කිරීම සඳහා අපි මුදල් වෙන් කරලා තියෙනවා.

ඒ වගේම කාන්තාවන්ගෙන් 90% ක් තම ජීවිත කාලය තුළ අවම වශයෙන් එක් වරක් හෝ පොදු ප්‍රවාහනයේදී ලිංගික හිංසනයට මුහුණ දෙනවා. ස්ත්‍රී පුරුෂ විෂමතා දර්ශකයට අනුව ශ්‍රී ලංකාව ගෝලීය ස්ත්‍රී පුරුෂ පරතර දර්ශකයේ ඇති රටවල් 146 ක් අතරින් 122 වැනි ස්ථානයේ ලැයිස්තුගත කරලා තියෙනවා. මේක ස්ත්‍රී පුරුෂ භාවය, ජාතිය, ආගම සහ වයස ඉක්මවා යන සමාජ අභියෝගයක්.

ඊට එහා ගිහින් තවත් ගැටලු මතු වෙමින් තියෙනවා. ඩිජිටල් අවකාශයන්ඒ ව්‍යාප්තියත් එක්කම ලෝකය තාක්‍ෂණික වැඩි දියුණුවක් ලඟාකරගෙන තිබුනත්, ඒ ඩිජිටල් මෙවලම්ම කාන්තාවට හිරිහැර කිරීම සඳහා අනිසි ලෙස භාවිතා කරනු ලබනවා. ස්ත්‍රී පුරුෂ සමාජභාවය, ජාතිය, ආගම හෝ වයස් භේදයකින් තොරව සෑම කෙනෙකුටම ඩිජිටල් යුගයේ ආරක්ෂිතව කටයුතු කරගැනීමට සමාන අවස්ථා ලැබෙන ඩිජිටල් අවකාශයක් නිර්මාණය කිරීම අත්‍යවශ්‍යයි. ඩිජිටල් අවකාශයේත් පුරුෂ සමාජභාවය මත බෙදීම හෝ වෙනස්කොට සැලකීම නවතා දැමීමට සහ කාන්තාවන්ට, විශේෂයෙන් තරුණ කාන්තාවන්ට ඩිජිටල් අවකාශය සමග ස්වාධීනව පැවතිය හැකි බව සහතික කිරීමට රජය කැපවී ක්‍රියා කරනවා.

ස්ත්‍රී පුරුෂ සමාජභාවි අසමානතා ගැටලුව කාන්තාව නිසා හට ගන්නා ප්‍රශ්නයක් නෙවෙයි, එය ප්‍රතිපත්තිමය, අධ්‍යාපන, ආකල්පමය සහ චර්යාත්මක ලෙස අවධානයක් යොමු විය යුතු සමාජ ප්‍රශ්නයක්. සියලු කාන්තාවන්ට සමාන අවස්ථා ඇති අනාගතයක් නිර්මාණය කිරීමේදී THRIVE වැනි සහයෝගී ප්‍රයත්නයන් ශ්‍රී ලංකාවට අත්‍යවශ්‍ය වෙනවා" යනුවෙන් අග්‍රාමාත්‍යවරිය මෙහිදී සඳහන් කොට තිබිණි.

මෙම අවස්ථාව සඳහා ශ්‍රී ලංකාවේ ඕස්ට්‍රේලියානු මහ කොමසාරිස් පෝල් ස්ටීවන්ස් මහතා,ආසියා සහ පැසිෆික් කලාපය සඳහා එක්සත් ජාතීන්ගේ කාන්තා නියෝජ්‍ය කලාපීය අධ්‍යක්ෂ මරියා හොල්ට්ස්බර්ග් මහත්මිය, එක්සත් ජාතීන්ගේ නේවාසික සම්බන්ධීකාරක, Marc-Andr Franche මහතා ඇතුලු සම්භාවනීය අමුත්තන් රැසක් සහභාගී වූහ.

අග්‍රාමාත්‍ය මාධ්‍ය අංශය

දේශීයව මෙන්ම ගෝලීය වශයෙන් කාන්තාවන්ට සිදුවන බලපෑම්, බාධක සහ ඒ වෙනුවෙන් ඇති පක්ෂග්‍රාහීත්වයන් හදුනාගනිමින් ඊට ප්‍රතිචාර දැක්වීම සඳහා කඩිනමින් තීරණාත්මක පියවරයන් ගත යුතුව ඇති බව අග්‍රාමාත්‍ය ආචාර්ය හරිනි අමරසූරිය පැවසුවාය.

ශ්‍රී ලංකා එක්සත් ජාතීන්ගේ සංගමය විසින් සංවිධානය කළ ජාත්‍යන්තර කාන්තා දින සැමරුම් උත්සවය අමතමින් අද (22) කොළඹ පදනම් ආයතනයේදී අග්‍රාමාත්‍ය ආචාර්ය හරිනි අමරසූරිය මේ බව සදහන් කළාය.

විවිධ ක්ෂේත්‍ර වල ජයග්‍රහණ සහ සමාජ පිළිගැනීමට ලක් වූ කාන්තාවන් වෙනුවෙන් සම්මාන ප්‍රධානය කිරීමද මෙහිදී සිදු කෙරිණ.

මෙහිදී වැඩි දුරටත් අදහස් දැක් වූ අග්‍රාමාතය ආචාර්ය හරිනි අමරසූරිය-

සමාජ, ආර්ථික තත්ත්වය, අධ්‍යාපන සුදුසුකම්, ආගම, ජනවාර්ගිකත්වය, ආබාධිතභාවය හෝ වෙනත් ඕනෑම අනන්‍යතාවයක් නොසලකා, සියලුම කාන්තාවන් සහ ගැහැණු ළමයින් ආරක්ෂා කළ යුතුයි. ඔවුන්ගේ අයිතිවාසිකම් ආරක්ෂා කළ යුතුය. ජාතිය හැඩගස්වන ශක්තිමත් කාන්තාවන් සිටි රටක් ලෙස ලංකාව ඉතිහාසගත වී තිබෙනවා. එවැනි බොහෝ දෙනෙක් අද මෙම ප්‍රේක්ෂකාගාරයේ සිටින බව මම දන්නවා.

කාන්තාව දේශපාලනයේ, ව්‍යාපාරවල සහ සමාජ ව්‍යාපාරවල වෙනස්කම්වලට නායකත්වය ලබා දෙමින් පරිවර්තනීය බලපෑමක් සිදුකරනවා. ඒ නිසා අපි රජයක් ලෙස විවිධ ප්‍රතිපත්ති සහ වැඩසටහන් හරහා කාන්තාවන් සවිබල ගැන්වීම සඳහා ක්‍රියාමාර්ග ගෙන තිබෙනවා. 2024 කාන්තා බලගැන්වීමේ පනත මගින් නව නීතිමය ආරක්ෂාවන් සහ ස්වාධීන ජාතික කාන්තා කොමිසමක් ස්ථාපිත කිරීමට කටයුතු කළා. එය ස්ත්‍රී පුරුෂ සමානාත්මතාවය ආයතනිකකරණය කිරීම සඳහා වූ වැදගත් පියවරක්.

ග්‍රාමීය කාන්තාවන් සඳහා ව්‍යවසායකත්වය සහ ඩිජිටල් මූල්‍ය සාක්ෂරතා වැඩසටහන් සහ කාන්තාවන්ගේ සහ මුළු ජාතියේම ආර්ථික නඟා සිටුවීම සඳහා වගකිව යුතු අමාත්‍යාංශ නවයක් වෙන් කරමින් ශ්‍රම බලකාය තුළ කාන්තා සහභාගීත්වය වැඩි කිරීම කෙරෙහි රජයඅවධානය යොමු කර තිබෙනවා. ඊයේ සම්මත වූ අයවැයටත් එවැනි පියවර කිහිපයක් ඇතුළත් කර තිබෙනවා. නායකත්වය, තීරණ ගැනීම සහ ආර්ථිකය තුළ කාන්තා සහභාගීත්වය අසමාන ලෙස අඩු මට්ටමක පවතින්නේ. ආර්ථික අවස්ථා, අධ්‍යාපනය සහ සෞඛ්‍ය සේවා හරහා කාන්තාවන් සහ ගැහැණු ළමයින්ට සහාය වීම සහ බලගැන්වීමේ අවස්ථා හදුනා ගන්නවා වගේම තවමත් කළ යුතු බොහෝ දේ ඇති බව අපි පිළිගත යුතුයි.

අපි පාර්ලිමේන්තුවේ කාන්තා නියෝජනය දෙගුණයක් කළා. නමුත් තවමත් 10% ක් පමණයි නියෝජනය වෙන්නේ. දේශපාලනයේ වගේම, තීරණ ගැනීමේ අවස්ථා වලත්, නායකත්වයේත් වැඩි කාන්තාවන් සංඛ්‍යාවක් සිටිය යුතුයි. වැටුප් සහිත රැකියාවල කාන්තා ශ්‍රම බලකායේ සහභාගීත්වය පිරිමි පාර්ශවයට සාපේක්ෂව 32% ක් ලෙසයි පවතින්නේ.

ඔබට සියල්ල කළ හැකි බව පවසමින් වැඩ සමතුලිතතාවය කාන්තාවන් සඳහා කළ නොහැකි කාර්යයක් ලෙස සමහරු සදහන් කරනවා. අපට සියල්ල කළ නොහැකියි. අපට අවශ්‍ය වන්නේ අපට කිරීමට අවශ්‍ය දේ කිරීමට සහ කාන්තාවන්ට පිළිගැනීමක් ඇති පවුලක් සහ සමාජයක් නිර්මාණය කිරීමයි. කාන්තාවන්ට වඩාත් සහයෝගය දක්වන පරිසරයක් ඇති කිරීමයි සිදු විය යුතු වෙන්නේ. මේ සඳහා, වැටුප් නොලබන කාන්තාවන්ගේ සත්කාරක කටයුතු හදුනා ගනිමින් අගයකිරීමත් සිදු කළ යුතුයි.

ස්ත්‍රී පුරුෂ භාවය මත පදනම් වූ හිංසනය සහ වෙනස්කම් කිරීම සමාජයේ කොතෙකුත් සිදු වෙනවා. මේවා නතර කිරීමට හදිසි නීතිමය සහ සමාජ ප්‍රතිසංස්කරණ අවශ්‍යයි. ස්ත්‍රී පුරුෂ සමානාත්මතාවය කරා යන ගමන අප තනිවම කරන එකක් නෙමෙයි. එක්සත් ජාතීන්ගේ තිරසාර සංවර්ධන ඉලක්ක, විශේෂයෙන් 5 වන ඉලක්කය වන ස්ත්‍රී පුරුෂ සමානාත්මතාවය සඳහා කැපවී සිටින ජාතියක් ලෙස, සැබෑ ලෙසම කාන්තා සවිබල ගැන්වීම මෙන්ම ඒ වෙනුවෙන් වන ගෝලීය උත්සාහයන් සමඟ අන්තර් සම්බන්ධතාවය අපි පවත්වා ගත යුතුයි. වේගයෙන් සංවර්ධනය වන ලෝකයක නායකත්වය දීම සඳහා, අපි කාන්තාවන් බලගැන්වීමට පමණක් නොව, සමස්තයක් ලෙස අපගේ ජාතියේ සංවර්ධනයට දායක කර ගත යුතුයි. එහිදී ශ්‍රී ලංකාවේ එක්සත් ජාතීන්ගේ සංගමය කාන්තා අයිතිවාසිකම් සඳහා ප්‍රබල උපදේශකයෙක්.

දේශීයව මෙන්ම ගෝලීය වශයෙන් කාන්තාවන්ට ඇති බලපෑම්, බාධක සහ ඒ වෙනුවෙන් ඇති පක්ෂග්‍රාහීත්වයන් හදුනාගනිමින් ඊට ප්‍රතිචාර දැක්වීම සඳහා කඩිනම්, තීරණාත්මක පියවර ගතයුතුව ඇති බව අග්‍රාමාත්‍ය ආචාර්ය හරිනි අමරසූරිය පැවසුවාය.

මෙම අවස්ථාවට විදේශ කටයුතු,විදේශ රැකියා සහ සංචාරක අමාත්‍ය විජිත හේරත්, එක්සත් ජාතින්ගේ සංගමයේ මහ ලේකම් එම්. එම්. රුෂාන්හවුදීන්, සහකාර මහලේකම් පන්චලී රත්නායක යන මහත්ම මහත්මීන් ඇතුළු පිරිසක් සහභාගී වූහ.

අග්‍රාමාත්‍ය මාධ්‍ය අංශය

සංවර්ධන කටයුතු ප්‍රමාද වී ඇති ජල යෝජනා ක්‍රම සහ ප්‍රජා ජල යෝජනා ක්‍රම කඩිනමින් නිම කිරීමට කටයුතු කරන බව අග්‍රාමාත්‍ය ආචාර්ය හරිනි අමරසූරිය පැවසුවාය.

ජාතික ජල සම්පාදන සහ ජලාපවහන මණ්ඩලය සංවිධානය කළ ලෝක ජල දින සමරුමට (21) සහභාගි වෙමින් අග්‍රාමාත්‍යවරිය මේ බව සදහන් කළාය.

මෙහිදී ජල සම්බන්ධතා ලබා දීම සඳහා නිර්මාණය කළ විශේෂ මෘදුකාංගයක් එළිදැක්වීම අග්‍රාමාත්‍යතුමියගේ ප්‍රධානත්වයෙන් සිදු වූ අතර ලෝක ජල දිනයට සමගාමීව පැවති දීප ව්‍යාප්ත පාසල් නාට්‍ය හා රචනා තරග ජයග්‍රහණය ලැබූ සිසු දරුවන් වෙත සම්මාන හා සහතිකපත්‍ර ප්‍රදානය කිරීමත්, ජලසම්පාදන හා ජලාපවාහන මණ්ඩලයේ මණ්ඩලයීය වෘත්තීයවේදීන් වෙත සම්මාන හා පදක්කම් ප්‍රදානය කිරීමත් සිදු කෙරිණ.

එහිදී වැඩිදුරටත් අදහස් දැක් වූ අග්‍රාමාත්‍ය ආචාර්ය හරිනි අමරසූරිය,

"ජල සම්පාදන කටයුතු සම්බන්ධයෙන් සිදු කරන විමර්ශනවලට 2025 වසරේ මංගල අයවැය මඟින් රුපියල් මිලියන 41, 234 ක අරමුදල් වෙන් කිරීමට නිර්දේශ කර තිබෙනවා.

දැනට ක්‍රියාත්මක වන මහා පරිමාණ ජල යෝජනා ක්‍රම සහ ප්‍රජා ජල යෝජනා ක්‍රම කඩිනමින් නිම කිරීම මෙන්ම ආරක්ෂිත ජල සැපයුම් සහතික කිරීමේ ජාතික වැදගත්කම හඳුනාගනිමින් ගම්පහ - අත්තනගල්ල සහ මිනුවන්ගොඩ ඒකාබද්ධ ජල සැපයුම් ව්‍යාපෘතිය, පොල්ගහවෙල - අලව්ව සහ පොතුහැර ඒකාබද්ධ ජල සම්පාදන ව්‍යාපෘතිය, මතුගම සහ අගලවත්ත ඒකාබද්ධ ඒකාබද්ධ ජල සැපයුම් ව්‍යාපෘතිය සහ ආර්ථික අර්බුදය නිසා අදාළ ණය දෙන්නන් විසින් ණය පහසුකම් අත්හිටුවීම හේතුවෙන් නිම කිරීම ප්‍රමාද වී ඇති තඹුත්තේගම ජල සැපයුම ව්‍යාපෘතිය කඩිනමින් නිම කිරීම සඳහාත් මෙවර අයවැයෙන් ප්‍රතිපාදන වෙන් කර තිබෙනවා.

ඒ නිසා ශ්‍රී ලංකාවේ පුරෝගාමී කීර්තිමත් ආයතනයක් ලෙස අප රජයේ ප්‍රතිපත්තිය වන ’පොහොසත් රටක් ලස්සන ජීවිතයක්’ යන දැක්ම යථාර්තයක් බවට පත් කිරීමට වඩා ශක්තියෙන් හා ධෛර්යයෙන් කටයුතු කරනු ඇතැයි තමන් විශ්වාස කරන බව අග්‍රමත්‍ය අචාර්ය හරිනි අමරසූරිය පැවසුවාය.

මෙම අවස්ථාවට නාගරික සංවර්ධන, ඉදිකිරීම් හා නිවාස අමාත්‍ය අනුර කරුණාතිලක, තරුණ කටයුතු හා ක්‍රීඩා අමාත්‍ය සුනිල් කුමාර ගමගේ, නිවාස නියෝජ්‍ය අමාත්‍ය ටී. බී. සරත්, ජාතික ජල සම්පාදන හා ජලාපවහන මණ්ඩලයේ සභාපති ඉංජිනේරු දීප්ති යූ. සුමනසේකර යන මහත්වරු ඇතුළු පිරිසක් සහභාගි වූහ.

අග්‍රාමාත්‍ය මාධ්‍ය අංශය

"සියල්ලන් සඳහා ඩිජිටල් මාවත්" යන තේමාව යටතේ වොෂින්ටන් ඩී.සී. හි ලෝක බැංකු මූලස්ථානයේ මාර්තු 17 සිට 20 දක්වා පැවැති ලෝක බැංකු සමූහයේ ගෝලීය ඩිජිටල් සමුළුව 2025 සඳහා ශ්‍රී ලංකාව නියෝජනය කරමින් අග්‍රාමාත්‍ය ලේකම් ප්‍රදීප් සපුතන්ත්‍රි මහතා සහභාගී විය.

මෙම සමුළුව ඩිජිටල් විසඳුම් සහ ආර්ථික හා සමාජ සංවර්ධනය ඉදිරියට ගෙන යාම සහ එහි භූමිකාව ගවේෂණය කිරීමේ අරමුණින් පැවැත්විණි.

ජනාධිපති අනුර කුමාර දිසානායක මහතාගේ නායකත්වය යටතේ ශ්‍රී ලංකාවේ ක්‍රියාත්මක වන ඩිජිටල්කරණ ක්‍රියාවලිය සඳහා මෙම සමුළුව ඉතා වැදගත් වූ අතර ශ්‍රී ලංකාවේ තිරසාර ඩිජිටල් පරිවර්තනය වෙනුවෙන් නැගී එන ඩිජිටල් තාක්ෂණයන් සහ උපාය මාර්ග පිළිබඳ ගෝලීය විශේෂඥයින් සමග අග්‍රාමාත්‍ය ලේකම් ප්‍රදීප් සපුතන්ත්‍රි මහතා සිය අදහස් හුවමාරු කර ගත්තේය.

ගෝලීය ඩිජිටල් සමුළුවට සමගාමීව, ජාත්‍යන්තර මූල්‍ය අරමුදල (IMF) සහ ලෝක බැංකුවේ ප්‍රධාන නිලධාරීන් සමග සාකච්ඡාවක ද නිරත වූ අග්‍රාමාත්‍ය ලේකම් ප්‍රදීප් සපුතන්ත්‍රී මහතා එහිදී IMF හි නියෝජ්‍ය කළමනාකාර අධ්‍යක්ෂ කෙන්ජි ඔකාමුරා, IMF හි විධායක අධ්‍යක්ෂ ආචාර්ය ක්‍රිෂ්ණමූර්ති සුබ්‍රමනියන්, IMF හි ආසියා සහ පැසිෆික් දෙපාර්තමේන්තුවේ අධ්‍යක්ෂ ආචාර්ය ක්‍රිෂ්ණ ශ්‍රීනිවාසන්, IMF හි විකල්ප විධායක අධ්‍යක්ෂ ආචාර්ය පී.කේ.ජී. හරිස්චන්ද්‍ර යන මහත්වරුන් ද හමුවිය.

ශ්‍රී ලංකාවේ දීර්ඝ කළ අරමුදල් පහසුකමේ (EFF) ප්‍රගතිය පිළිබඳ මෙහිදී අවධානය යොමු වූ අතර 2025 පෙබරවාරි මාසයේදී EFF යටතේ තුන්වන සමාලෝචනය සාර්ථකව නිම කිරීමෙන් පසු IMF විධායක මණ්ඩලයේ, ජ්‍යෙෂ්ඨ කළමනාකාරීත්වයේ සහ කාර්ය මණ්ඩලය ලබා දුන් සහයෝගයට අග්‍රාමාත්‍ය ලේකම්තුමන් ස්තුතිය පළ කළේය. ඉදිරියේදී පැවැත්වීමට නියමිත EFF සමාලෝචනයේ සන්ධිස්ථාන සපුරාලීමට ශ්‍රී ලංකා රජය සහය ලබා දෙන බවද අග්‍රාමාත්‍ය ලේකම්තුමන් මෙහිදී පැවසීය . අවදානමට ලක්විය හැකි ප්‍රජාවන්ට සහාය වීම, බදු ක්‍රමයේ කාර්යක්ෂමතාව වැඩි දියුණු කිරීම සහ සමස්ත ආර්ථික ඵලදායිතාව වැඩි දියුණු කිරීම අරමුණු කරගත් රජයේ අඛණ්ඩ ඩිජිටල්කරණ ප්‍රයත්නයන් කෙරෙහිද මෙහිදී අවධානයට ලක් විය.

ශ්‍රී ලංකාවට ලෝක බැංකුවේ පුළුල් සහයෝගයට ස්තුතිය පංල කරමින් ලෝක බැංකුවේ දකුණු ආසියා කලාපයේ උප සභාපති මාර්ටින් රයිසර් මහතා සමඟ අග්‍රාමාත්‍ය ලේකමි ප්‍රදීප් සපුතන්ත්‍රී මහතා රැස්වීමකට ද එක් විය. ශ්‍රී ලංකාවේ ආර්ථිකය යතා තත්වයට පත්කිරීම සහ සංවර්ධනයට සහාය වීම සඳහා ලෝක බැංකුවේ තිරසර සහයෝගය ලබා දෙන බව රයිසර් මහතා මෙහිදී යළි තහවුරු කළේය.

රටේ දිගුකාලීන ස්ථාවරත්වය සහ වර්ධනය සඳහා අඛණ්ඩ මූල්‍ය හා තාක්ෂණික සහාය සහතික කිරීම සඳහා ඉදිරියේදී අවශ්‍ය සහය පිළිබඳව ද සාකච්ඡා අවධානය යොමුවිය. .

අග්‍රාමාත්‍ය මාධ්‍ය අංශය

අයවැය තුළ ඇති වූ සංවාද සහ විපක්ෂයේ සමහර විවේචන නිරීක්ෂණය කළවිට ජනතාව බලාපොරොත්තු වූ සිස්ටම් චේන්ජ් එක සිද්ධ වෙමින් පවතින බව තමන් තරයේ විශ්වාස කරනවා යැයි අග්‍රාමාත්‍ය ආචාර්ය හරිනි අමරසූරිය පැවසුවාය.

අයවැය කාරක සභා විවාදය අමතමින් අද (20) පාර්ලිමේන්තුවේදී අග්‍රාමාත්‍යතුමිය මේ බව සදහන් කළාය.

මෙහිදී වැඩි දුරටත් අදහස් දැක් වූ අග්‍රාමාත්‍ය ආචාර්ය හරිනි අමරසූරිය,

අපේ රජයේ පළමු අයවැය විවාදයට ගත් මේ මාසය පුරාම පාර්ලිමේන්තුව තුළත් එයින් පිටතදීත් මේ පිළිබඳ අපි විවාදය කළා, සංවාද වල යෙදුණා. මේ කාලය තුළ අපි වෘත්තිය සමිති සංගම් වගේම විවිධ ආයතන, පුද්ගලයන් මුණගැහිලා අයවැය පිළිබඳ සාකච්ඡාවල යෙදුණා.

අපිට ඉදිරිපත් කළ ඒ යෝජනා විවේචන තුළින් අයවැය තවත් ශක්තිමත් කරගන්න හැකි වුණා.

නමුත් අයවැය විවාදයේ පළමු දිනයේ විපක්ෂයේ කතා සහ අද පැවති කතාවල ප්‍රගතියක් තියනවද කියලා මම සොයා බැලුවා. මොකද මාසයක සංවාදයකින් යම් වර්ධනයක් වෙනසක් අපි බලාපොරොත්තු වෙනවා.

නමුත් විපක්ෂයේ සමහර කතාවල අන්තර්ගතයන් අරගෙන බැලුවම මට දැනුණේ ඔවුන් තාම එතනමයි කියලා.

මේ විවාදය තුළ අපිට එල්ල වෙච්ච චෝදනා ආවේ ඊගෝ එකට ඇති වු වේදනාව නිසා කියලා දැනුණා. ඒවා අයවැය තුළින් විසඳිය නොහැකි ප්‍රශ්න. අයවැය තුළ ඇති වූ සංවාදය පිළිබඳ අවධානය යොමු කළ විට රජය උත්සාහ කරන සිස්ටම් චේන්ජ් එක සිදු වෙනවා කියලා විශ්වාසයෙන් කියන්න පුළුවන්.

පද්ධතියක් වෙනස් කරන විට ඒක එක තැනක සිදුවන දෙයක් නෙමෙයි. සමාජය තුළ තියන, බලය මත තියන සබදතා වලත් වෙනසක් සිදු වෙනවා. සිස්ටම් චේන්ජ් එකකදී එකතැනක තියන සබඳතා තවත් තැනකට ගෙනියනවා. මේ අයවැය විවේචනය කරන නැත්නම් මේ සිස්ටම් චේන්ජ් එකෙන් රිදිලා තියෙන අය කවුද කියලා නිරීක්ෂණය කිරීමේදී සිස්ටම් චේන්ජ් එක වෙනවා කියලා ඉතා පැහැදිලියි.

අයවැයට එල්ල වූ බොහෝ විවචෙන මතුවෙන්නේ පරණ සිස්ටම් එක තුළ බලය දරපු, ඒ බලය වරප්‍රසාදයක් කරගත්ත පිරිසගෙන්. වරප්‍රසාද මත සංවිධානය වූ සමාජයක් ප්‍රජාතන්ත්‍රවාදී නැහැ. ඒක වෙනස් කරන්නයි අපි උත්සාහ කරන්නේ. බලය අයුතු ලෙස රස විදපු සමාජය ගොඩක් අය ප්‍රතික්ෂේප කරනවා.

මේ අයවැය විවාදය නිසා සතුටු වුණේ මහන්සි වෙලා වැඩකරන, ආයෝජන ඉතාමත් සාධාරණව සිදුකරන, වගකීමෙන් යුතුව හැසිරෙන ව්‍යාපාරිකයන්, ව්‍යවසායකයින් සතුටට පත්වෙලා ඉන්නවා. අද ඔවුන්ට දේශපාලකයන් පිටිපස්සේ දුවන්න අවශ්‍ය නැහැ ඔවුන්ගේ ව්‍යාපෘති කරගන්න. නිදහසේ වැඩකරගන්න අද ඔවුන්ට පුළුවන්. වසර ගණනක් ඉදිරියට ඔවුන්ට සැලසුම් කරන්න, පුරෝකථන කරන්න පුළුවන් වෙලා තිබෙනවා.

රාජ්‍ය සේවය තමන්ට තැනක් ලැබිලා තියනවා කියලා මේ වෙනස අගය කරනවා. ඔවුන්ට විශ්වාසයක්, අගයකිරීමක් ලැබිලා තිබෙනවා. රාජකාරිය නිදහසේ කරන්න පුළුවන් කියලා සතුටු වෙන පිරිසක් ඉන්නවා.

සමාජය තුළ අවස්ථා මගහැරුණ කාන්තාවන්, දරුවන්, ආබාධිත ප්‍රජාව, වතුකරයේ ජනතාව ඇතුළු බොහෝ දෙනාට සහනයක් අද ලැබිලා තිබෙනවා.

ඒ සියළු දෙනාගේ අනාගත ආර්ථික මාර්ග විවෘත වෙමින් තිබෙන බව ඔවුන්ට පේන්න තිබෙනවා. ආර්ථික ප්‍රතිලාභ මගහැරුණු විශාල පිරිසකට මේ අයවැය තුළින් ආලෝකයක්, මාර්ගයක් ලැබිලා තිබෙනවා.

රැකියා විරහිත තරුණයන් ගැන බොහෝ විවාද ඇති වුණා, පොරොන්දු ඉෂ්ඨ කරලා නෑ කියලා චෝදනා එල්ල වුණා. හැබැයි යථාර්ථය වෙලා තිබෙන්නේ රැකියාවෙන් තෘප්තිමත් විය නොහැකි විදිහට සුදුසුකම් වලට නොගැලපෙන රැකියා දෙනවා වෙනුවට දියුණුවිය හැකි අනාගත මාර්ග විවෘත වන ක්‍රමයක් අපි නිර්මාණය කරමින් යනවා. දැනටත් අපි රැකියා ගණනාවක් දෙන්න කටයුතු කරලා තිබෙනවා. මේ කටයුතු ප්‍රමාද වෙලා තිබෙන්නේ පැවති රජයන් ගත්තු තීන්දු තීරණවල ඇති අවුල් සහගත තත්ත්වය නිසා. ඒ වගේම සමහර නඩු නිසා ප්‍රමාදයන් සිදුව තිබෙනවා.

ජනතාවගේ දැවෙන ප්‍රශ්න භාවිත කරමින් තමන්ගේ බලය, වරප්‍රසාද ලබාගත්ත අයට මේ අයවැය ගැන විවේචන තිබෙනවා.

කිසි කෙනෙක් මග නොහැරෙන්න තීන්දු තීරණ ගන්න නිලධාරීන් මෙන්ම මහජන නියෝජිතයින් විශාල කැපකිරීමක්, මහන්සියක් දැරූ බවද අග්‍රාමාත්‍ය ආචාර්ය හරිනි අමරසූරිය මෙහිදී පැවසුවාය.

අග්‍රාමාත්‍ය මාධ්‍ය අංශය