ස්විට්සර්ලන්තයේ ඩාවෝස්-ක්ලෝස්ටර්ස් (Davos-Klosters) හි පැවැති ලෝක ආර්ථික සමුළුවේ (World Economic Forum) 56 වන වාර්ෂික රැස්වීමට සහභාගී වූ අග්‍රාමාත්‍ය ආචාර්ය හරිනි අමරසූරිය, ශ්‍රී ලංකාවේ අනාගත දිශානතිය සහ නව රජයේ ප්‍රතිපත්තිමය ස්ථාවරත්වය ලෝකය හමුවේ අභිමානවත්ව සනිටුහන් කරමින් සිය සිව්දින සාර්ථක නිල සංචාරය නිමා කර ජනවාරි 23 දිවයිනට පැමිණියාය.

කම්කරු අමාත්‍ය සහ මුදල් නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු මහතා ඇතුළු දූත පිරිස සහභාගී වූ මෙම සංචාරය, හුදෙක් රාජ්‍ය තාන්ත්‍රික හමුවීම් මාලාවකට එහා ගිය, ශ්‍රී ලංකාව කෙරෙහි ගෝලීය විශ්වාසය නැවත දිනා දුන් සුවිශේෂී සන්ධිස්ථානයක් විය.

මෙම සංචාරයේදී අග්‍රාමාත්‍යවරිය ජාත්‍යන්තර මූල්‍ය අරමුදලේ (IMF) කළමනාකාර අධ්‍යක්ෂිකා ක්‍රිස්ටලිනා ජෝර්ජියේවා මෙනෙවිය සහ ආසියානු සංවර්ධන බැංකුවේ (ADB) සභාපති මසාටෝ කන්ඩා මහතා සමඟ පවත්වනු ලැබූ සාකච්ඡා අතිශය තීරණාත්මක විය. ශ්‍රී ලංකාවේ ණය ප්‍රතිව්‍යුහගතකරණ ක්‍රියාවලිය, ආර්ථික ස්ථාවරත්වය සහ විනිවිදභාවයෙන් යුතු මූල්‍ය පාලනය පිළිබඳව එහිදී කරුණු ඉදිරිපත් කළ අග්‍රාමාත්‍යවරිය, ශ්‍රී ලංකාවේ ඉදිරි ගමන සඳහා එම ආයතනවල අඛණ්ඩ සහයෝගය තහවුරු කර ගැනීමට සමත් වූවාය.

රාජ්‍ය තාන්ත්‍රික සබඳතා ක්ෂේත්‍රයේදී, යුරෝපා සංගමයේ (EU) ජාත්‍යන්තර හවුල්කාරිත්වය පිළිබඳ කොමසාරිස් Jozef Síkela මහතා සහ හදිසි අවස්ථා කළමනාකරණය පිළිබඳ කොමසාරිස් Hadja Lahbib මහත්මිය හමු වූ අග්‍රාමාත්‍යවරිය, ශ්‍රී ලංකාවට බලපෑ "දිට්වා" සුළි කුණාටුවෙන් පසු සහන සැලසීමට යුරෝපා සංගමය දැක්වූ දායකත්වය අගය කළාය. එහිදී ආපදා කළමනාකරණය සහ රට නැවත ගොඩනැගීමේ ක්‍රියාවලිය සඳහා යුරෝපා සංගමයේ දීර්ඝකාලීන සහයෝගය තහවුරු කරගත්තාය.

එසේම එක්සත් ජාතීන්ගේ සංවර්ධන වැඩසටහනේ (UNDP) ඇලෙක්සැන්ඩර් ඩි කෘෘ මහතා සමඟ පැවැති හමුවේදී, නව රජයට ලැබුණු ජනවරමට අනුව යහපාලනය සහ ශක්තිමත් සමාජ ආරක්ෂණ වැඩපිළිවෙළක් සකස් කිරීම කෙරෙහි අවධානය යොමු විය.

අග්‍රාමාත්‍යවරිය ලෝක ආර්ථික සමුළුවේ ප්‍රධාන දේශකයෙකු ලෙස සහභාගී වූ "Jobs Crisis in Emerging Markets" සහ "Reskilling Revolution" යන සැසිවාරයන්හිදී ඉදිරිපත් කළ කරුණු ජාත්‍යන්තර අවධානයට ලක් විය.

තාක්ෂණික දියුණුව සහ මානව හැඩගැසීම අතර පවතින ’කාල පරතරය’ (Time lag) මගහරවා ගැනීමට ’ඉගෙන ගන්නා සමාජයක්’ (Learning Society) ගොඩනැගීමේ අවශ්‍යතාවය අග්‍රාමාත්‍යවරිය එහිදී තර්කානුකූලව පැහැදිලි කළාය.

ශ්‍රී ලංකාව තුළ තරුණ තරුණියන් 50,000ක් ඉලක්ක කරගනිමින් ක්‍රියාත්මක වන පූර්ණ අරමුදල් සහිත පුහුණු වැඩසටහන් සහ වෘත්තීය අධ්‍යාපන ප්‍රතිසංස්කරණ පිළිබඳව ලෝක අවධානය දිනා ගත්තාය. විශේෂයෙන්ම කෘතිම බුද්ධිය (AI) සහ ඩිජිටල් පරිවර්තනය හමුවේ පරම්පරා අතර පරතරය නොවැඩෙන ලෙස "ඉගෙන ගන්නා සමාජයක්" (Learning Society) ගොඩනැගීමේ අවශ්‍යතාව අග්‍රාමාත්‍යවරිය විසින් අවධාරණය කළාය.

ගෝලීය කාන්තා නායකත්වය පිළිබඳ "World Woman Davos Agenda 2026" සමුළුවේදී අග්‍රාමාත්‍යවරිය කළ "වෙනස්වන ලෝකයට නායකත්වය දෙන කාන්තාවන්" යන දේශනය සුවිශේෂී විය. නායකත්වය යනු හුදෙක් පවතින ව්‍යුහයන්හි අසුන් ගැනීම නොව, එම ව්‍යුහයන්ම ප්‍රතිව්‍යුහගත කිරීම (Restructuring the table) බවත්, විශේෂයෙන්ම කාන්තාවන් සිදු කරන වැටුප් නොලබන රැකබලා ගැනීමේ සේවය (Care Work) ආර්ථිකයේ ප්‍රධාන කොටසක් ලෙස පිළිගත යුතු බවත් අවධාරණය කළාය. ශ්‍රී ලංකාවේ වත්මන් පාර්ලිමේන්තුවට කාන්තාවන් 20 දෙනෙකු තේරී පත්වීම හරහා ලැබූ ප්‍රගතිය සියල්ල ඇතුළත් පාලනයක් (Inclusive Governance) සඳහා වන රජයේ කැපවීම පිළිඹිබු කරන්නක් බවත් පෙන්වා දුන්නාය.

ව්‍යාපාරික සහ ආයෝජන ක්ෂේත්‍රයේදී ලොව ප්‍රමුඛතම සමාගමක් වන MAERSK හි සභාපති රොබට් යූග්ලා මහතා සහ Menzies ගුවන් සේවා සමාගමේ සභාපති හසන් එල් හවුරි මහතා සමඟ ශ්‍රී ලංකාවේ වරාය, සැපයුම් දාම සහ ගුවන් සේවා ක්ෂේත්‍රයේ ආයෝජන අවස්ථා පිළිබඳව සාකච්ඡා කිරීමට හැකි වූවා.

එසේම ස්විට්සර්ලන්තයේ Hamilton Medical සහ Variosystems යන අධි තාක්ෂණික සමාගම්වල නිරීක්ෂණ චාරිකාවන්ට එක් වූ අග්‍රාමාත්‍යවරිය, ස්විට්සර්ලන්තයේ ද්විත්ව වෘත්තීය පුහුණු (Dual Vocational Training) ආකෘතිය ශ්‍රී ලංකාවට ගැලපෙන පරිදි හඳුන්වා දීම පිළිබඳව ද අවධානය යොමු කළාය.

කලාපීය සහයෝගීතාවය ශක්තිමත් කරමින් සිංගප්පූරු ජනාධිපති තර්මන් ෂන්මුගරත්නම් මහතා හමුවී අධ්‍යාපන සහ කුසලතා සංවර්ධන සහයෝගීතාවය පිළිබඳව සාකච්ඡා කළ අතර, බංග්ලාදේශ ප්‍රධාන උපදේශකවරයාගේ විශේෂ නියෝජිත ලුට්ෆේ සිද්දික් මහතා සමඟ ද ද්විපාර්ශ්වික සබඳතා පිළිබඳව අදහස් හුවමාරු කර ගත්තාය.

සංචාරක ක්ෂේත්‍රය පිළිබඳව යුරෝ නිව්ස් (Euronews Hub) හි පැවැති සංවාදයකදී සංචාරක ව්‍යාපාරය "මෘදු බලය" (Soft Power) සහ රාජ්‍ය තාන්ත්‍රික ප්‍රාග්ධනයක් ලෙස භාවිතා කිරීමේ වැදගත්කම අවධාරණය කළාය.

සංචාරය නිමා කරමින් අග්‍රාමාත්‍යවරිය ස්විට්සර්ලන්තයේ වෙසෙන ශ්‍රී ලාංකික ව්‍යාපාරික සහ වෘත්තීය ප්‍රජාව මෙන්ම ස්විට්සර්ලන්ත ව්‍යාපාරික නියෝජිතයින් ද හමු වූවාය. එහිදී ශ්‍රී ලංකාවේ ආර්ථික පුනර්ජීවනය සඳහා විදේශගත ශ්‍රී ලාංකිකයින්ට සහ විදේශ ආයෝජකයින්ට ලබා දිය හැකි ප්‍රායෝගික දායකත්වය සහ සහයෝගීතාවය පිළිබඳව දීර්ඝ වශයෙන් සාකච්ඡා කෙරිණි.

අග්‍රාමාත්‍යවරියගේ මෙම ඓතිහාසික ඩාවෝස් මැදිහත්වීම හරහා ශ්‍රී ලංකාව යනු හුදෙක් ආධාර ලබන රටක් නොව, ලෝකයේ නව ප්‍රවණතා හඳුනාගත්, ප්‍රතිපත්තිමය ස්ථාවරත්වයක් සහිත සහ මානව ගරුත්වය කේන්ද්‍ර කරගත් ප්‍රගතිශීලී රාජ්‍යයක් බව ලෝකය හමුවේ තහවුරු කිරීමට හැකි විය.

මෙම සංචාරය හරහා දිනාගත් ජාත්‍යන්තර ගෞරවය සහ විශ්වාසය ශ්‍රී ලංකාවේ අනාගත සංවර්ධන මාවත වඩාත් ආලෝකවත් කිරීමට හේතු වනු ඇත.

අග්‍රාමාත්‍ය මාධ්‍ය අංශය

ස්විට්සර්ලන්තයේ ඩාවෝස් නුවර පැවැති 2026 ලෝක ආර්ථික සමුළුවේ (World Economic Forum) වාර්ෂික හමුවට සහභාගී වූ අග්‍රාමාත්‍ය ආචාර්ය හරිනි අමරසූරිය ඇතුළු දූත පිරිස සිව් දිනක සාර්ථක නිල සංචාරයකින් අනතුරුව අද (23) පෙරවරුවේ දිවයිනට පැමිණියහ.

පසුගිය ජනවාරි 19 වනදා සිට 22 වනදා දක්වා පැවැති මෙම සමුළුව අතරතුර, අග්‍රාමාත්‍යවරිය ලෝකයේ ප්‍රමුඛ පෙළේ රාජ්‍ය නායකයින්, ජාත්‍යන්තර මූල්‍ය ආයතන ප්‍රධානීන් සහ ව්‍යාපාරික නායකයින් රැසක් හමු වී ශ්‍රී ලංකාවේ ඉදිරි ආර්ථික මාවත ශක්තිමත් කර ගැනීම පිළිබඳව දීර්ඝ වශයෙන් සාකච්ඡා පැවැත්වූවාය. මෙම සංචාරය සඳහා කම්කරු අමාත්‍ය සහ මුදල් හා සැලසුම් නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු මහතා ඇතුළු ඉහළ පෙළේ දූත පිරිසක් එක්ව සිටියහ.

මෙම සංචාරයේ විශේෂත්වයක් ලෙස අග්‍රාමාත්‍යවරිය ජාත්‍යන්තර මූල්‍ය අරමුදලේ (IMF) කළමනාකාර අධ්‍යක්ෂිකා ක්‍රිස්ටලිනා ජෝර්ජියේවා සහ ආසියානු සංවර්ධන බැංකුවේ (ADB) සභාපති මසාටෝ කන්ඩා මහතා සමඟ ද්විපාර්ශ්වික සාකච්ඡා පවත්වමින් මෙරට මූල්‍ය ස්ථාවරත්වය තහවුරු කිරීමට අවශ්‍ය සහයෝගය පිළිබඳව අදහස් හුවමාරු කර ගත්තාය. එසේම, සිංගප්පූරු ජනාධිපති තර්මන් ෂන්මුගරත්නම් මහතා, යුරෝපීය කොමිසමේ සභාපතිනී උර්සුලා වොන් ඩර් ලේන් මෙනෙවිය සහ එක්සත් ජාතීන්ගේ සංවර්ධන වැඩසටහනේ (UNDP) පරිපාලක ඇලෙක්සැන්ඩර් ඩි ක්‍රෝ මහතා සමඟ පැවැති හමුවීම් හරහා ජාත්‍යන්තර සබඳතා තවදුරටත් පුළුල් කර ගැනීමටත් ශ්‍රී ලංකාව කෙරෙහි ඇති ගෝලීය විශ්වාසය තහවුරු කිරීමටත් හැකි විය.

ගෝලීය වේදිකාව තුළ ශ්‍රී ලංකාවේ ප්‍රතිපත්තිමය ස්ථාවරය පැහැදිලි කරමින් අග්‍රාමාත්‍යවරිය ’World Women Davos Agenda 2026’ හමුවේ විශේෂ දේශනයක් පැවැත්වූ අතර, නැගී එන වෙළෙඳපොළවල රැකියා අර්බුදය සහ ගෝලීය කුසලතා සංවර්ධනය පිළිබඳ වූ ඉහළ පෙළේ කමිටු සාකච්ඡා (Stakeholder Dialogues) සඳහා ද සිය දායකත්වය ලබා දුන්නාය. මීට අමතරව, ගෝලීය සංචාරක සංසදයේ (GTF) ඉහළ පෙළේ සංවාදයකට එක්වෙමින් ශ්‍රී ලංකාවේ සංචාරක ක්ෂේත්‍රයේ අනාගත දැක්ම ප්‍රවර්ධනය කිරීමට ද අග්‍රාමාත්‍යවරිය පියවර ගත්තාය.

ආයෝජන අවස්ථා පුළුල් කිරීමේ අරමුණින් AP Moller-Maersk වැනි ජාත්‍යන්තර සමාගම්වල ප්‍රධානීන් සහ ස්විට්සර්ලන්ත ව්‍යාපාරික ප්‍රජාව සමඟ සාකච්ඡා පැවැත්වූ අග්‍රාමාත්‍යවරිය, ස්විට්සර්ලන්තයේ වෘත්තීය පුහුණු ආයතන කිහිපයක නිරීක්ෂණ චාරිකාවකට ද එක් වූවාය.

ස්විට්සර්ලන්තයේ වෙසෙන ශ්‍රී ලාංකික ව්‍යාපාරිකයින් හමු වූ අග්‍රාමාත්‍යවරිය මෙරට සංවර්ධනය සඳහා ඔවුන්ගේ දායකත්වය ලබා ගැනීම පිළිබඳව ද අවධානය යොමු කළාය. මෙම සාර්ථක රාජ්‍ය තාන්ත්‍රික මෙහෙවර මගින් ශ්‍රී ලංකාවේ අනාගත සංවර්ධන වැඩපිළිවෙළ උදෙසා ජාත්‍යන්තර සහයෝගීතාවයේ නව පිටුවක් පෙරළීමට අග්‍රාමාත්‍යවරිය ප්‍රමුඛ දූත පිරිස සමත් වී තිබේ.

අග්‍රාමාත්‍ය මාධ්‍ය අංශය

අග්‍රාමාත්‍ය ආචාර්ය හරිනි අමරසූරිය Davos හි පැවති ලෝක ආර්ථික සංසදයට සමගාමීව ස්විට්සර්ලන්ත ව්‍යාපාරික ප්‍රජාවේ සාමාජිකයින් මෙන්ම ස්විට්සර්ලන්තයේ වෙසෙන ශ්‍රී ලාංකික ව්‍යාපාරික නියෝජිතයින් සහ වෘත්තිකයන් සමඟ සාකච්ඡා පැවැත්වුවා ය.

ශ්‍රී ලංකාවේ ආර්ථිකය නැවත ගොඩ නැගීමට සහ දිගුකාලීන සංවර්ධනයට සහාය වීම සඳහා හවුල්කාරිත්වය ශක්තිමත් කිරීම, විශ්වාසය සහ සහයෝගීතාවය ගොඩනැගීම සඳහා ප්‍රායෝගික මාර්ග ගවේෂණය කිරීම කෙරෙහි මෙහිදී අවධානය යොමු විය.

ස්විට්සර්ලන්තයේ ශ්‍රී ලාංකික ව්‍යාපාරික සහ වෘත්තීය නියෝජිතයන් සමඟ පැවති සාකච්ඡාවලදී, ව්‍යාපාරික සම්බන්ධතා වර්ධනය කිරීම, ආයෝජන අවස්ථා සඳහා පහසුකම් සැලසීම, වෙළඳපොළ ප්‍රවේශය සක්‍රීය කිරීම, ව්‍යවසායකයින්ට මග පෙන්වීම සහ ජාත්‍යන්තර ව්‍යාපාරික ජාල සමඟ ශ්‍රී ලංකාවේ සම්බන්ධතාවය ශක්තිමත් කිරීම සඳහා ඔවුන් ඉටු කරන වැදගත් කාර්යභාරය අග්‍රාමාත්‍යවරිය අවධාරනය කළා ය.

ස්විට්සර්ලන්ත ව්‍යාපාරික ප්‍රජාවේ සාමාජිකයින් සමඟ පැවති හමුවේදී, අග්‍රාමාත්‍යවරිය ශ්‍රී ලංකාවේ වත්මන් ආර්ථික දිශානතිය, ප්‍රතිසංස්කරණ ප්‍රමුඛතා සහ ආයෝජනය ක්ෂේත්‍ර පිළිබඳව අවධාරණය කළා ය. ආයෝජක විශ්වාසය නැවත ගොඩනැගීම සඳහා ආර්ථික ස්ථාවරත්වය, අනාගතය පුරෝකථනය කළ හැකි ප්‍රතිපත්ති රාමු සහ පාලන ප්‍රතිසංස්කරණ කෙරෙහි රජයේ අවධානය යොමු කර ඇති බව අග්‍රාමාත්‍යවරිය තවදුරටත් සඳහන් කළාය.

සේවා අංශ ප්‍රවර්ධනය, ප්‍රාග්ධන වෙළඳපොළ, මූල්‍ය තාක්ෂණය සහ අනෙකුත් අංශයන්හි සහයෝගීතාවය සඳහා ඇති අවස්ථා පිළිබඳ මෙහිදී අවධානය යොමු වූ අතර, ආයෝජකයින්ට අවස්ථාව ලබා දීම, ක්ෂේත්‍ර හවුල්කාරිත්වය ශක්තිමත් කිරීම සහ දිගුකාලීන සහයෝගීතාවය ඇතුළු සම්බන්ධතා හරහා ප්‍රතිඵල ලබා ගැනීම කෙරෙහි මෙම සාකච්ඡාවේ දී අවධානය යොමු විය.

ප්‍රතිසංස්කරණ, ස්ථාවරත්වය සහ ජාත්‍යන්තර හවුල්කාරිත්වය මගින් මෙහෙයවනු ලබන තිරසාර ආර්ථිකයක් සඳහා ශ්‍රී ලංකාව කැපවී සිටින බව අවධාරණය කළ අග්‍රාමාත්‍යවරිය , ස්විට්සර්ලන්ත ව්‍යාපාරික ප්‍රජාව සහ ස්විට්සර්ලන්තයේ ශ්‍රී ලාංකික ව්‍යාපාරික කොටස්කරුවන් සමඟ කටයුතු කිරීමට සූදානම් බව පැවසුවා ය.

අග්‍රාමාත්‍ය මාධ්‍ය අංශය

කාන්තාවන්ට විශ්වාසයෙන් යුතුව නායකත්වය ලබා දිය හැකි පරිසරයන් නිර්මාණය කිරීමට නම් ආයතනික සහ බලය බෙදී යන ව්‍යුහයන්හි පරිවර්තනයක් සිදු කළ යුතුයි.

ස්විට්සර්ලන්තයේ Davos-Klosters හි පැවැත්වෙන ලෝක ආර්ථික සංසදයේ 56 වන වාර්ෂික රැස්වීමට සමගාමීව ලෝක කාන්තා මන්දිරයේදී පැවැත්වූ World Woman Davos Agenda 2026 සඳහා අග්‍රාමාත්‍ය ආචාර්ය හරිනි අමරසූරිය ජනවාරි 21 වන දින සහභාගී වූවා ය.

"වෙනස්වන ලෝකයට නායකත්වය දෙන කාන්තාවන් (Women Leading the Changing Global Order)" යන තේමාව යටතේ සිය දේශනය සිදු කළ අග්‍රාමාත්‍යවරිය, ලොව පුරා කාන්තාවන් දේශපාලන, ආර්ථික සහ සමාජ ක්ෂේත්‍රයන් නියෝජනය කරමින් සිටින නමුත්, කාන්තාවන් වැටුප් නොලබමින් සිදු කරන රැකබලා ගැනීමේ කටයුතු, අවිධිමත් ශ්‍රම දායකත්වය සහ කෘෂිකර්මාන්ත ක්ෂේත්‍රය තුළ ඔවුන් ලබා දෙන දායකත්වයන් තවමත් සමාජය හඳුනා ගෙන නොමැති බව පවසා සිටියා ය.

තවදුරටත් අදහස් දැක්වූ අග්‍රාමාත්‍යවරිය,

දේශපාලන දෘෂ්ටි කෝණයෙන් බලන විට, තීරණ ගැනීමේදී කාන්තාවන් බැහැර කිරීම අහඹු සිදුවීමක් නොවේ; එය කලක් තිස්සේ පවත්වා ගෙන යන ස්ත්‍රී පුරුෂ සමාජභාවය මත ගොඩනගා ගත් බල ධූරාවලියක ප්‍රතිඵලයක්. නායකත්වය ලබා දෙන කාන්තාවන්ට, විශේෂයෙන් දේශපාලන ක්ෂේත්‍රයේ නියැලී සිටින කාන්තාවන්, හිරිහැර, අපහාස සහ ආන්තිකකරණය නිසා එල්ල වන ප්‍රහාර නිසා බොහෝ විට නායකත්වයෙන් ඉවත් වීමට හෝ ඉන් වැළකී සිටීමට කටයුතු කරනවා.

මෙම බාධකවලින් කාන්තාවන් ආරක්ෂා කිරීම කියන්නේ හුදෙක් ආරක්ෂාව පිළිබද දෙයක් නොවේ. එය, කාන්තාවන්ට සිය ස්වාධීනත්වය, අධිකාරිය සහ විශ්වාසය සමඟ නායකත්වය ක්‍රියාත්මක කළ හැකි පරිසරයන් නිර්මාණය කිරීමේදී ආයතනික සහ බල ව්‍යුහයන්හි පරිවර්තනයක් කිරීම හරහා සිදු විය යුතු දෙයක්.

දේශපාලන කැපවීම එහි ජනතාවගේ ඔරොත්තු දීමේ හැකියාව සමඟ සමපාත වූ විට කළ හැකි දේ ශ්‍රී ලංකාව පෙන්නුම් කරලා තිබෙනවා. එයට හොඳම නිදසුන ලෙස පළමු වරට, කාන්තාවන් 20 දෙනෙකු පාර්ලිමේන්තුවට තේරී පත් වීමෙන් අපගේ වත්මන් රජය යටතේ දේශපාලන නියෝජනයේ ඓතිහාසික ප්‍රගතියක් ලබලා තිබෙනවා.

එයින් පිළිබිඹු වන්නේ ඒ දැක්ම ඉදිරි දර්ශනයකට පමණක් සීමා වී නොමැති බවයි. සියල්ල ඇතුළත් පාලනයක් කරා නව රජයේ කැපවීම එයින් පිළිබිඹු වෙනවා.

නායකත්වය යනු පවතින අසුන්වලට සීමා වීම පමණක් නොව, පවත්නා පද්ධතින් ප්‍රතිව්‍යුහගත කිරීම බව අග්‍රාමාත්‍යවරිය සඳහන් කළා ය. ස්ත්‍රීවාදී, අන්තර් නායකත්වය සඳහා ශ්‍රී ලංකාවේ කැපවීම අග්‍රාමාත්‍යවරිය නැවත තහවුරු කළ අතර, කාන්තාවන් සහ ආන්තිකකරණයට ලක් වූ ප්‍රජාවන් සහභාගිවන්නන් පමණක් නොවන බවත්, අනාගත ලෝකය හැඩගස්වන ප්‍රතිපත්තිවල ප්‍රධාන නිර්මාණකරුවන් බව පවසා සිටියා ය.

අග්‍රාමාත්‍ය මාධ්‍ය අංශය

ස්විට්සර්ලන්තයේ ඩාවෝස් හි පැවැත්වෙන ලෝක ආර්ථික සමුළුවට සමගාමීව, අග්‍රාමාත්‍ය ආචාර්ය හරිනි අමරසූරිය ජනවාරි 21 වන දින යුරෝපීය සංගමය, එක්සත් ජාතීන්ගේ සංවර්ධන වැඩසටහන සහ ගෝලීය පෞද්ගලික අංශයේ නියෝජිතයින් සමඟ සම්බන්ධ වෙමින් ඉහළ මට්ටමේ ද්විපාර්ශ්වික සාකච්ඡා මාලාවකට සහභාගී වූවා ය.

එහිදී අග්‍රාමාත්‍ය ආචාර්ය හරිනි අමරසූරිය හදිසි අවස්ථා සහ අර්බුද කළමනාකරණය පිළිබඳ යුරෝපීය කොමසාරිස් Hadja Lahbib මහත්මිය හමුවිය. දිට්වා සුළි කුණාටුවෙන් පසු යුරෝපීය සංගමය සහ එහි සාමාජික රටවල් විසින් ලබා දුන් සහයෝගය වෙනුවෙන් ශ්‍රී ලංකාවේ කෘතඥතාව පළ කළ අග්‍රාමාත්‍යවරිය, ශ්‍රී ලංකාව හදිසි ආපදා තත්ත්වයන්ට මුහුණ දීම සඳහා සූදානම් කිරීම සහ රට යළි ගොඩ නැගීමේ ක්‍රියාවලිය සඳහා යුරෝපා සංගමයේ අඛණ්ඩ සහයෝගය අපේක්ෂා කරන බව පවසා සිටියා ය. අග්‍රාමාත්‍යවරිය ලෝක බැංකුවේ GRADE වාර්තාවේ සඳහන් තොරතුරු කොමසාරිස්වරයා සමඟ බෙදා ගත් අතර ශ්‍රී ලංකාවේ සංවර්ධන සහ නැවත ගොඩ නැගීම සඳහා යුරෝපා සංගමයේ අඛණ්ඩ සහයෝගය බලාපොරොත්තු වන බව පවසා සිටියා ය.

එමෙන්ම අග්‍රාමාත්‍යවරිය එක්සත් ජාතීන්ගේ සංවර්ධන වැඩසටහන නියෝජනය කරන Alexander De Croo මහතා හමුවිය. ශ්‍රී ලංකාව සහ එක්සත් ජාතීන්ගේ සංවිධානය අතර පවතින ශක්තිමත් හවුල්කාරිත්වය අගය කළ අග්‍රාමාත්‍යවරිය ගංවතුර සහනාධාර සහ ජන ජිවිතය යථා තත්ත්වයට පත් කර ගැනීමට එක්සත් ජාතීන්ගේ සංවිධානය ලබා දුන් සහයෝගය පැසසුමට ලක් කළා ය. පාර්ලිමේන්තු මැතිවරණයෙන් ලැබුණු ජනවරමට සාධාරණයක් ඉටු කරමින්, මහජන විශ්වාසය, යහපාලනය සහ අවදානමට ලක්විය හැකි ප්‍රජාවන් සඳහා ශක්තිමත් සමාජ ආරක්ෂා වැඩපිළිවෙළක් සකස් කරමින් ජනතාවගේ අපේක්ෂාවන් ඉටු වන ජාතියක් ගොඩ නැගීම කෙරෙහි රජය අවධානය යොමු කර ඇති බව ඇය තවදුරටත් සඳහන් කළාය.

එමෙන්ම A.P. Moller Holding (MAERSK) හි සභාපති වන Robert M. Uggla මහතා සමඟ ද අග්‍රාමාත්‍යවරිය සාකච්ඡාවකට එක් වූවා ය. එහිදී ශ්‍රී ලංකාවේ ආර්ථික සංවර්ධන කටයුතු සඳහා සහාය වීමට පෞද්ගලික අංශය සමඟ සම්බන්ධ වීම සහ සහයෝගීතාවය ශක්තිමත් කිරීමේ වැඩපිළිවෙල පිළිබඳව අවධානය යොමු විය.

රට නැවත ගොඩ නැගීම, සංවර්ධනය කිරීම සහ දිගුකාලීන ආර්ථික ස්ථාවරත්වය ළඟා කර ගැනීමට ජාත්‍යන්තර හවුල්කරුවන් සහ ගෝලීය කොටස්කරුවන් සමඟ ශ්‍රී ලංකාව ගෙන යන අඛණ්ඩ වැඩපිළිවෙල පිළිබඳ මෙම සාකච්ඡාවලින් අවධාරණය විය.

අග්‍රාමාත්‍ය මාධ්‍ය අංශය

ලෝක ආර්ථික සංසදය (World Economic Forum) සමගාමීව 2026 ජනවාරි 20 වන දින Piz Buin Davos හි Euronews මධ්‍යස්ථානයේ පැවති “Tourism as Soft Power and Diplomatic Capital” යන තේමාව යටතේ සංවිධානය කළ සංවාදයකට අග්‍රාමාත්‍ය ආචාර්ය හරිනි අමරසූරිය සහභාගී වූවාය.

සංචාරක ප්‍රවේශය සහ ජනතාව අතර සම්බන්ධතා ගොඩනැගීම මඟින් ජාත්‍යන්තර විශ්වාසය, සංස්කෘතික හුවමාරුව සහ කලාපීය සහයෝගීතාව ශක්තිමත් කරගත හැකි ආකාරය පිළිබඳව අවධානය යොමු කිරීම මෙම සංවාදයේ ප්‍රධාන අරමුණ විය. මෙම සාකච්ඡාවට තුර්කි රාජ්‍ය සංවිධානයේ මහලේකම් කුබාන් ඔමරලියෙව් (Kuban Omiraliyev) මහතා සහ සවුදි අරාබියේ Aseer Investment සමාගමේ ප්‍රධාන විධායක නිලධාරි (CEO) Meshari Alnahar මහතා එක් වූහ.

නිරන්තර අර්බුදකාරී තත්ත්වයන්ට මුහුණ දෙන ලෝකයක බලාපොරොත්තුව, නැවත ගොඩ නැගීම සහ ඔරොත්තු දීමේ හැකියාව පිළිබඳ කතා කිරීමේ දී ශ්‍රී ලංකාව කදිම උදාහරණයක් බවත්, දේශගුණික විපර්යාස, භූ-දේශපාලනික අස්ථාවරතා සහ ආර්ථික අස්ථාවරතා යන වේගයෙන් වෙනස් වන ගෝලීය රටාවන් මධ්‍යයේ සංචාරක කර්මාන්තය සුවිශේෂී සහ වැදගත් කාර්යභාරයක් ඉටු කරන බවත් අග්‍රාමාත්‍යවරිය ගෝලීය ප්‍රවණතා පිළිබඳ අදහස් දක්වමින් අවධාරණය කළාය. සංචාරක ව්‍යාපාරය ආර්ථික ක්ෂේත්‍රයක් ලෙස පමණක් නොව, ජීවනෝපායන් ආරක්ෂා කරන, සමාජීය ඔරොත්තු දීමේ හැකියාව ශක්තිමත් කරන සහ ජාත්‍යන්තර සහයෝගීතාව වර්ධනය කරන වැදගත් රාජ්‍ය තාන්ත්‍රික මෙවලමක් බව ද ඇය තවදුරටත් සඳහන් කළාය.

ශ්‍රී ලංකාව මෑත කාලයේදී මුහුණ දුන් අත්දැකීම් සඳහන් කරමින්, දිට්වා සුළි කුණාටුවෙන් සිදුවූ බලපෑම් ඇතුළු විවිධ අර්බුද තත්ත්වයන් මධ්‍යයේ වුවද රටේ සංචාරක කර්මාන්තය ශක්තිමත් ලෙස නැවත ගොඩනැගීමට හැකි වූ ආකාරය පිළිබඳව අග්‍රාමාත්‍යවරිය පැහැදිලි කළාය. විනිවිදභාවයෙන් යුතුව අර්බුද කළමනාකරණය කිරීම සහ ජාත්‍යන්තර හවුල්කරුවන් සමඟ උපායමාර්ගිකව සම්බන්ධ වීම හරහා සංචාරකයින්ගේ විශ්වාසය පවත්වා ගැනීමට හැකි වූ බවත්, එමඟින් අභියෝගාත්මක තත්ත්වයන් යටතේ පවා වාර්තාගත සංචාරක පැමිණීම් වාර්තා කිරීමට හැකි වූ බවත් ඇය අවධාරණය කළාය.

දේශගුණික මූල්‍යකරණය, ඩිජිටල් පරිවර්තනය, ස්ත්‍රී–පුරුෂ සමානාත්මතාවය සහ ප්‍රමිතියකින් යුත්, දීර්ඝකාලීනව තිරසාර සංචාරක කර්මාන්තයක් ගොඩනැගීමේ වැදගත්කම ද අග්‍රාමාත්‍යවරිය මෙහිදී අවධාරණය කළාය. සංචාරක ව්‍යාපාරය ලොව පුරා මිලියන ගණනක රැකියා අවස්ථා සඳහා මං විවර කරන බවත්, විශේෂයෙන්ම කාන්තාවන් සහ අවදානමට ලක්විය හැකි ප්‍රජාවන් සඳහා සාධාරණ හා සමාන අවස්ථා සහතික කිරීම සඳහා සියල්ල ඇතුළත් ප්‍රතිපත්ති හඳුන්වා දීම අත්‍යවශ්‍ය බවත් ඇය තවදුරටත් පෙන්වා දුන්නාය.

අග්‍රාමාත්‍ය මාධ්‍ය අංශය