ඉන්දියාවේ ගුජරාට් ප්රාන්තයෙන් වැඩම කරවන බුදුරජාණන් වහන්සේගේ ශාරීරික ධාතූන් වහන්සේලා පෙබරවාරි 04 සිට 11 දක්වා ගංගාරාමයේදී මහජන වන්දනාවට.
ඉන්දීය අග්රාමාත්ය නරේන්ද්ර මෝදි මහතාගේ උපන් ගම වන ගුජරාට් ප්රදේශයෙන් 60 දශකයේදී සොයා ගන්නා ලද, මෙතෙක් ඉන්දියාවෙන් පිටතට වැඩම කර නොමැති බුදුරජාණන් වහන්සේගේ ශාරීරික ධාතූන් වහන්සේලා මෙරට ජනතාවට වැඳපුදා ගැනීම සඳහා වැඩම කරවීමට සියලු කටයුතු සූදානම් කර ඇත.
අග්රාමාත්ය ආචාර්ය හරිනි අමරසූරියගේ ප්රධානත්වයෙන් සහ කොළඹ දිස්ත්රික් සම්බන්ධීකරණ කමිටු සභාපති පාර්ලිමේන්තු මන්ත්රී ලක්ෂ්මන් නිපුනාරච්චි මහතාගේ සභාපතිත්වයෙන් කොළඹ දිස්ත්රික් ලේකම් කාර්යාලයේදී ජනවාරි 31 දින මෙහි ඉදිරි සැලසුම් සම්බන්ධව විශේෂ දිස්ත්රික් සම්බන්ධිකරණ කමිටු සාකච්ඡාවක් පැවැත්විණි.
ජනාධිපති අනුර කුමාර දිසානායක මහතා සහ ඉන්දීය අග්රාමාත්යවරයා අතර පැවති සාකච්ඡාවක ප්රතිඵලයක් ලෙස ඉන්දීය රජයේ පූර්ණ අනුග්රහයෙන් වැඩම කරවන මෙම ධාතූන් වහන්සේලා, පෙබරවාරි 04 වනදා සිට 11 වනදා දක්වා පුරා දින හතක් කොළඹ හුණුපිටිය ගංගාරාම විහාරස්ථානයේදී ප්රදර්ශනය කෙරේ.
බැතිමතුන් විශාල පිරිසකට වන්දනාමාන කිරීමට අවස්ථාව සැලසීම සඳහා දවසේ පැය 24 පුරාම ප්රදර්ශනය විවෘතව තැබෙන අතර, විදේශීය සංචාරකයන්, ගැබිණි මව්වරුන් සහ ආබාධිත ප්රජාව වෙනුවෙන් විශේෂ ප්රමුඛතා පෝලිම් ක්රමයක් ද ක්රියාත්මක කිරීමට තීරණය කර ඇත.
මෙම ආගමික මහෝත්සවයට පැමිණෙන බැතිමතුන් වෙනුවෙන් ප්රවාහන, සනීපාරක්ෂක හා ආරක්ෂක පහසුකම් විධිමත් කිරීමට රජයේ සියලු ආයතන එක්ව සැලසුම් සකස් කර තිබේ. ඒ අනුව දුම්රිය දෙපාර්තමේන්තුව, ලංකා ගමනාගමන මණ්ඩලය හා පෞද්ගලික බස් රථ සේවා එක්ව විශේෂ ප්රවාහන සැලැස්මක් ක්රියාත්මක කරන අතර, පොලීසිය සහ ත්රිවිධ හමුදාව එක්ව විශේෂ ආරක්ෂක හා රථ වාහන සැලැස්මක් දියත් කරනු ඇත.
ධාතු වන්දනාව සඳහා පෝලිම්වල රැඳී සිටින බැතිමතුන් වෙනුවෙන් දන්සැල් සහ සංග්රහ කටයුතු සංවිධානය කිරීමට දිස්ත්රික්කයේ ව්යාපාරික ප්රජාවගේ දායකත්වය ලබා ගැනීමට ද පියවර ගෙන ඇත.
කාලගුණික බලපෑම් පිළිබඳව ද අවධානය යොමු කරමින්, බැතිමතුන්ට අපහසුවකින් තොරව මෙම දුර්ලභ ශාරීරික ධාතු වන්දනාව සිදු කිරීමට අවශ්ය සියලු මූලික කටයුතු මේ වන විටත් සම්පූර්ණ කර ඇත.
මෙම විශේෂ සාකචිජාවට ගංගාරාම විහාරාධිපති පූජ්ය ආචාර්ය කිරින්දේ අස්සජි නාහිමියන් ඇතුළු මහා සංඝරත්නය, අමාත්ය හර්ෂණ නානායක්කාර මහතා, නියෝජ්ය අමාත්ය සුනිල් වටගල මහතා ඇතුළු පාර්ලිමේන්තු නියෝජිතයින්, ප්රාදේශීය මහජන නියෝජිතයින්, දිස්ත්රික් ලේකම් ප්රසන්න ජනක කුමාර මහතා ඇතළු රාජ්ය නිලධාරීන් රැසක් සහභාගී වූහ.
අග්රාමාත්ය මාධ්ය අංශය
