ඓතිහාසික මාතර අප ස්වාමිදුවගේ ජාතික සිද්ධස්ථානයේ වාර්ෂික මංගල්‍ය අවස්ථාව සඳහා අග්‍රාමාත්‍ය ආචාර්ය හරිනි අමරසූරිය සැප්තැම්බර් 13වැනි දා සහභාගි විය.
මෙම වාර්ෂික දේවස්ථාන මංගල්‍යය මෙවර සංවිධානය වූයේ 118 වැනි වරට වන අතර, ඒ සඳහා සහභාගි වූ අග්‍රාමාත්‍යවරිය වෙත බදුල්ල රදගුරු පදවි දරන අති උතුම් ජූඩ් නිශාන්ත සිල්වා රදගුරු හිමිපාණන් වහන්සේ සහ ගාල්ල රදගුරු පදවි දරන අති උතුම් රේමන් වික්‍රමසිංහ රදගුරු හිමිපාණන් වහන්සේ විසින් විශේෂ ආශිර්වාද පූජාවක් සිදුකරන ලදී.
ඉන් අනතුරුව දේවස්ථානයේ ප්‍රධාන ශාලාවේ දී මාතර ප්‍රදේශයේ සර්ව ආගමික නායකයින් සහ අග්‍රාමාත්‍යවරිය අතර විශේෂ සුහද හමුවක් පැවැත්විණි.
ඉතා දීර්ඝ ඉතිහාසයක් පවතින ඓතිහාසික සිද්ධස්ථානයක් වන අප ස්වාමිදුවගේ දේවස්ථානයේ පැවැත්වෙන මෙම ඓතිහාසික මංගල්‍යය අවස්ථාවට සම්බන්ධ වීමට ලැබීම විශාල භාග්‍යයක් බව ප්‍රකාශ කළ අග්‍රාමාත්‍යවරිය, ගරු ජනාධිපති තුමා ඇතුළු රජය වෙනුවෙන් මෙම දේව මංගල්‍ය සඳහා සුබපැතුම් එක් කරන ලදී.
මෙහිදී වැඩිදුරටත් අදහස් දැක් වූ අග්‍රාමාත්‍යවරිය,
"මේ දේවස්ථානය සහ නගරයේ තිබෙන අනෙකුත් ආගමික ස්ථාන අතර තියෙන සහෝදරත්වය හා ලබැඳියාවෙන් සමඟිය, සාධාරණත්වය හා සමානාත්මතාවය කියන හරයන් වෙනුවෙන් සිදුකරන මැදිහත්වීම අගය කළ යුතුයි. මාතර නගරයට පමණක් නොවෙයි මේ රටටම ඒ අවශ්‍යතාවය තියෙනවා. ඒ ආදර්ශය අපිට අවශ්‍යයි. ඒ ආදර්ශය අපවෙත ලබා දෙන ඔබවහන්සේලා සියලුදෙනා වෙත මම ස්තූතිවන්ත වනවා වගේ ම සමාජය වෙනුවෙන් සිදුකරන මේ සේවය සහ සමාජ සාධාරණත්වය වෙනුවෙන් සිදුකරන මේ මැදිහත්වීම තවදුරට ඉටුකරන්නට ශක්තිය ධෛර්යය ලැබේවා කියා මම ප්‍රාර්ථනා කරනවා." යනුවෙන් ප්‍රකාශ කළා ය.
මෙම මංගල්‍ය අවස්ථාව සඳහා බදුල්ල රදගුරු පදවි දරන අති උතුම් ජූඩ් නිශාන්ත සිල්වා රදගුරු හිමිපාණන් වහන්සේ, ගාල්ල රදගුරු පදවි දරන අති උතුම් රේමන් වික්‍රමසිංහ රදගුරු හිමිපාණන් වහන්සේ, ගාලු පදවි අනු නායක අතිගරු මයිකල් රාජේන්ද්‍රම් පූජා ප්‍රසාදීන් වහන්සේ, සිද්ධස්ථාන පරිපාලක ගරු ජූඩ් සම්පත් විලේගොඩ පියතුමා ඇතුළු කිතුණු පියතුමන්ලා ද මාතර කොටුව රත්නපාල පිරිවෙනේ පරිවේනාධිපති,මහා මන්තින්ද පිරිවෙන් පරිවේණාධිපති ශාස්ත්‍රවේදී පණ්ඩිත පූජ්‍ය තිස්සමහාරාමයේ ඉන්ද්‍රානන්ද නායක ස්වාමීන් වහන්සේ, මාතර කොටුවේගොඩ ජයසුමනාරාම විහාරයේ විහාරාධිපති පූජ්‍ය යටිගල සෝමතිලක නායක ස්වාමීන් වහන්සේ ඇතුළු ගෞරවනීය මහා සංඝරත්නය ඇතුළු සර්ව ආගමික නායකයින්ද,
කාන්තා හා ළමා කටයුතු අමාත්‍ය සරෝජා පෝල්‍ රාජ්, විපක්ෂ නායක සජිත් ප්‍රේමදාස, දකුණු පළාත් ආණ්ඩුකාර බන්දුල හරිස්චන්ද්‍ර යන මහත්ම මහත්මීන් ඇතුළු ආරාධිත අමුත්තන් රැසක් සහභාගී විය.
අග්‍රාමාත්‍ය මාධ්‍ය අංශය