එවැනි සමාජයක් තුළින් මුළු රටම, සෑම ක්ෂේත්‍රයකින්ම ඉදිරියට යා හැකියි.
සෑම කාන්තාවකටම සහ ගැහැනු ළමයෙකුටම ගෞරවාන්විතව, ආරක්ෂිතව ජීවත්විය හැකි වටපිටාවක් නිර්මාණය කරමින් රටේ දියුණුවට පූර්ණ දායකත්වයක් ලබා දිය හැකි අවස්ථාවන් නිර්මාණය කර දිය යුතු බවත්, එමගින් රට තුළ පූර්ණ සංවර්ධනයක් ළඟා කර ගත හැකි බවත් අග්‍රාමාත්‍ය ආචාර්ය හරිනි අමරසූරිය පැවසුවාය.
එක්සත් ජාතීන්ගේ ජනගහන අරමුදල (UNFPA) විසින් සංවිධානය කරන ලද "ස්ත්‍රී පුරුෂ සමානාත්මතාවය තුළින් ප්‍රතිපත්තිමය වෙනසක් ඇති කිරීම, දැනුම තුළින් රටේ ප්‍රගතිය වේගවත් කිරීම" මැයෙන් ගාලුමුවදොර හෝටලයේ අගෝස්තු 27 දින පැවැති ප්‍රතිපත්ති හා පර්යේෂණ සමුළුව අමතමින් අග්‍රාමාත්‍යවරිය මේ බව සඳහන් කළාය.
මෙහි දී ශ්‍රී ලංකාවේ පවතින ස්ත්‍රී පුරුෂ සමාජභාවයේ අසමානතාවයන් සහ මතුවන අභියෝගයන්ට විසඳුම් ලබා දීම සඳහා ප්‍රතිපත්ති සම්පාදකයින්ට, පර්යේෂකයින්ට සහ සිවිල් සමාජයට අවශ්‍ය තීරණාත්මක සාක්ෂි සහ ප්‍රතිපත්ති නිර්දේශ සපයන සුවිශේෂී වාර්තා හතරක් නිල වශයෙන් අග්‍රාමාත්‍යතුමිය වෙත පිළිගැන්විණි. මෙම වාර්තා මගින් වඩාත් සාධාරණ හා සමාන සමාජයක් නිර්මාණය කිරීම සඳහා මග පෙන්වීමක් අපේක්ෂා කෙරේ.
මෙහි ප්‍රධාන දේශනය සිදු කරමින් අග්‍රාමාත්‍ය ආචාර්ය හරිනි අමරසූරිය මෙසේ ද කීය.
සෑම කාන්තාවක්ම සහ ගැහැණු ළමයෙකුටම ගෞරවාන්විතව, ආරක්ෂිතව ජීවත් වීමට හැකි වටපිටාවක් ගොඩ නැගීම තුළින් රටේ දියුණුවට පූර්ණ දායකත්වයක් ලබා දීමට හැකි වන පරිදි අවස්ථාව ලබා දිය යුතුයි. එය ළඟ කරගත් විට මුළු රටටම ඉදිරියට යා හැකියි.
කාන්තාවන් මත අසමාන ලෙස පැටවෙන වැටුප් නොගෙවන සත්කාරක සේවාවන් පිළිබඳව විශේෂයෙන් අපේ අවධානය යොමු කරන්න අවශ්‍යයි. කාන්තාවන්ගේ රැකියා සහ සත්කාරක සේවා සමබර කරගෙන ඔවුන්ගේ සහභාගීත්වය ඉහළ නැංවීම ජාතික ප්‍රගතියට අත්‍යවශ්‍ය බවද අග්‍රාමාත්‍යවරිය පැවසුවාය.
මෙම අවස්ථාවට එක්සත් ජාතීන්ගේ ජනගහන අරමුදලේ (UNFPA) නියෝජිත Kunle Adeniyi, පාර්ලිමේන්තු මන්ත්‍රී ආචාර්ය නලින් අබේසිංහ, කාන්තා හා ළමා කටයුතු අමාත්‍යාංශයේ ලේකම් ඇතුළු පිරිසක් සහභාගී වූහ.
අග්‍රාමාත්‍ය මාධ්‍ය අංශය