"දත්ත, ප්රතිපත්ති සහ දරුවන්ට හොඳම දේ ලබා දීම අපේ අරමුණයි. දේශපාලන වුවමනා හෝ වෙනත් කිසිදු දෙයක් අපට වැදගත් නැහැ; අපට වැදගත් වන්නේ දරුවන් පමණයි" යනුවෙන් අග්රාමාත්ය ආචාර්ය හරිනි අමරසූරිය පැවසුවාය.
අග්රාමාත්යවරිය මේ බව ප්රකාශ කළේ පසුගියදා ඇති වූ ’දිට්වා’ සුළි කුණාටුවෙන් හානියට පත් පාසල් නිරීක්ෂණය කිරීමට සමගාමීව, ජනවාරි 17 පුත්තලම සහිරා මුස්ලිම් විද්යාලයේ නිරීක්ෂණයට එක්වූ අවස්ථාවේදීය.
එහිදී පුත්තලම සහිරා මුස්ලිම් විද්යාලයේ සිසුන් විසින් නිර්මාණය කරන ලද පාසලේ නිල වෙබ් අඩවිය එළිදැක්වීම අග්රාමාත්යතුමිය අතින් සිදු විය.
පාසලේ උසස් පෙළ විද්යා විෂය ධාරාව ආරම්භ කිරීම සඳහා අනුමැතිය ලබා ගැනීම සම්බන්ධයෙන් විදුහල්පතිතුමා ඉදිරිපත් කළ අදහස්වලට ප්රතිචාර දක්වමින් අග්රාමාත්යවරිය ප්රකාශ කළේ, විද්යා විෂය පමණක් නොව අනෙකුත් සෑම විෂයක් සම්බන්ධයෙන්ම දරුවන්ට දැනුම ලබා දිය යුතු බවයි. ඒ සඳහා දිස්ත්රික්කයේ ඇති සියලුම පාසල් ඒකාබද්ධව කටයුතු කළ යුතු බවත්, බෙදීම් ඇති සමාජයක් ගොඩනැගීම රජයේ දර්ශනය නොවන බවත් අවධාරණය කළාය.
තවද, දරුවන් වෙනුවෙන් හොඳම දේ කළ යුතු බවත්, ඒ සඳහා ගත යුතු තීරණ සම්බන්ධ යෝජනා පාසල් මට්ටමින් සාමූහිකව සාකච්ඡා කර තමන් වෙත දන්වන ලෙසත් ඉල්ලා සිටියාය. පාසල් වශයෙන් බෙදී වෙන් වී දරුවන්ට සුවපහසු අධ්යාපනයක් ලබා දිය නොහැකි බවත්, සැමවිටම දරුවන්ගේ අවශ්යතාවලට ප්රමුඛත්වය දිය යුතු බවත් වැඩිදුරටත් පැවසුවාය.
මෙහිදී අදහස් දැක්වූ අග්රාමාත්යතුමිය:
"අතීතයේ ගනු ලැබූ වැරදි තීන්දු තීරණවල ප්රතිවිපාක අප දැන් භුක්ති විඳිනවා. නමුත් අපට දැන් යහපත් වර්තමානයක් තිබෙනවා. එබැවින් මින් ඉදිරියට දේශපාලන හෝ පෞද්ගලික සාධක මුල් කරගත් තීරණ ගැනීමෙන් වැළකී, සමස්ත දරුවන්ගේ සතුට වෙනුවෙන් තීරණ ගැනීමට අප පුරුදු විය යුතුයි."
විවිධ දක්ෂතාවලින් පූර්ණ දරුවන් බිහි කිරීම සඳහා එක් විෂයකට පමණක් සීමා නොවී, සෑම ක්ෂේත්රයක් පිළිබඳවම අවබෝධයක් ඇති දරුවන් නිර්මාණය කළ යුතු බව ද මෙහිදී අවධාරණය කෙරිණි.
මෙම අවස්ථාව සඳහා රාජ්ය පරිපාලන, පළාත් සභා හා පළාත් පාලන අමාත්ය මහාචාර්ය ඒ.එච්.එම්.එච්. අබයරත්න මහතා, පාර්ලිමේන්තු මන්ත්රීවරුන් වන ගයාන් ජානක කුමාර මහතා, අජිත් ගිහාන් මහතා, මොහොමඩ් ෆයිසාල් මහතා සහ හිරුණි විජේසිංහ මහත්මිය ද, පුත්තලම දිස්ත්රික්කයේ නගරාධිපතිතුමා, වයඹ පළාත් අධ්යාපන ලේකම්, අධ්යක්ෂකතුමිය ඇතුළු ගුරු භවතුන් පිරිසක් ද මෙම අවස්ථාවට එක්ව සිටියහ.
අග්රාමාත්ය මාධ්ය අංශය