ශ්‍රී ලංකා පරිපාලන සේවයේ (SLAS) විශේෂ ශ්‍රේණියේ නිලධාරියෙකු වන ප්‍රදීප් සපුතන්ත්‍රි මහතා උපාය මාර්ගික නායකත්වය සහ ප්‍රතිපත්ති ක්‍රියාවට නැංවීම සම්බන්ධයෙන් ප්‍රවීණතාවක් අත්පත් කරගත් කීර්තිමත් වෘත්තිකයෙකි.
පුද්ගලයින් ලියාපදිංචි කිරීමේ දෙපාර්තමේන්තුවේ කොමසාරිස් ජනරාල් සහ කම්කරු හා විදේශ රැකියා අමාත්‍යාංශයේ අතිරේක ලේකම් ඇතුළු රජයේ ප්‍රධාන විෂයය ක්ෂේත්‍ර රැසක් හරහා ලබාගත් පුළුල් අත්දැකීම් රැසක් වත්මන් අග්‍රාමාත්‍ය ලේකම්වරයා වශයෙන් කටයුතු කරන සපුතන්ත්‍රී මහතා සතුව තිබේ.
සපුතන්ත්‍රි මහතා කොළඹ විශ්වවිද්‍යාලයෙන් නීතිය පිළිබඳ ශාස්ත්‍රපති උපාධිය ද (LLM), ශ්‍රී ලංකා විවෘත විශ්වවිද්‍යාලයෙන් සංවර්ධන අධ්‍යයනය සහ රාජ්‍ය ප්‍රතිපත්ති පිළිබඳ ශාස්ත්‍රපති උපාධිය ද හිමි කරගෙන ඇත.
ඔහුගේ අධ්‍යයන ජයග්‍රහණ අතර අධීක්ෂණ සහ ඇගයීම් පිළිබඳව පශ්චාත් උපාධි ඩිප්ලෝමාව සහ සංවර්ධන අධ්‍යයනය පිළිබඳ පශ්චාත් උපාධි ඩිප්ලෝමාව ද වේ.
වෘත්තියෙන් නීතිඥයෙකු ද වීම, ඔහුගේ බහුවිධ විෂයය ප්‍රවීණතාව තවදුරටත් විදහා දක්වයි.
ප්‍රදීප් සපුතන්ත්‍රි මහතාගේ පර්යේෂණ කාර්යයන්හිදී මූලික වශයෙන් සංක්‍රමණය සහ ඒ පිළිබඳ නීතිමය රාමු කෙරෙහි අවධානය යොමුව තිබේ. ශ්‍රී ලාංකික පුහුණු ශ්‍රමිකයින් සංක්‍රමණය වීම සහ මිනිස් ජාවාරම් නීති පිළිබඳ විවේචනාත්මක විශ්ලේෂණයන් ද ඔහු සිය කෘතින් හරහා අධ්‍යයනයට ලක් කර ඇත. සිය අධ්‍යයනවල කොටසක් ලෙස සිදු කරන ලද මෙම ව්‍යාපෘති තුළින් දැවෙන සමාජ-ආර්ථික ගැටලු විසඳීමෙහිලා ඔහුගේ දැඩි උනන්දුව පිළිබිඹු කරයි.
සිය වෘත්තීය ජීවිතය මුළුල්ලෙහිම විවිධ අමාත්‍යාංශ හරහා වැඩසටහන් සැලසුම් කිරීම සහ ක්‍රියාත්මක කිරීම මෙන්ම, තිරසාර සංවර්ධනය, ශ්‍රම බලකා කළමනාකරණය සහ අධ්‍යාපන මුලපිරීම් සඳහා දායක වීම හරහා කැපී පෙනෙන කාර්යභාරයක් සපුතන්ත්‍රී මහතා විසින් ඉටු කර ඇත.
රාජ්‍ය පරිපාලනය, නීතිය සහ ප්‍රතිපත්ති විශ්ලේෂණය පිළිබඳ ඔහුගේ ශක්තිමත් දැනුම් පදනම, යහපාලනය සහ පරිපාලනමය හැකියාවන් ඔස්සේ ශ්‍රී ලංකාව සංවර්ධනය කරා ගෙන යාමට ඔහුව ඉතා කාලෝචිත ලෙස ස්ථානගත කරයි.