සැමට ආදර්ශයක් ලෙස පිරිවෙන් අධ්‍යාපනය ගොඩනගන්න මහා සංඝරත්නයේ සහය අවශ්‍ය බව අග්‍රාමාත්‍ය ආචාර්ය හරිනි අමරසූරිය පැවසුවාය.

පිරිවෙන් අධ්‍යාපනය ජාතික අධ්‍යාපන පද්ධතියේ පුර්නජිවනය උදෙසා පූර්වගාමී වූ පූජ්‍ය වැලිවිට පිණ්ඩපාතික අසරණ සරණ සරණංකර සංඝරාජයාණන් වහන්සේගේ ජන්ම දින සැමරුමට සමගාමී ව අද (19) අරලියගහ මන්දිරයේදී පැවති ජාතික පිරිවෙන් දින උත්සවය 2025 අමතමින් අග්‍රාමාත්‍ය ආචාර්ය හරිනි අමරසූරිය මේ බව සඳහන් කළා ය.

උත්සවය අමතමින් අදහස් දැක් වූ අග්‍රාමාත්‍ය ආචාර්ය හරිනි අමරසූරිය,

මානුෂිය ආචාර ධර්ම වලින් හෙබී පරිසර හිතකාමී සංවේදී මානව පරපුරක අවශ්‍යතාව, අප රටෙහි පමණක් නොව ගෝලීය වශයෙන් ම පවතින කාලීන අවශ්‍යතාවක්, ඊට හේතුව මානුෂීය ගුණධර්මවලින් ක්‍රමයෙන් දුරස් වෙමින් වාණිජ අරමුණු ඉටුකර ගැනීම සඳහා ආයාසකර යාන්ත්‍රික අරගලයක මිනිස් ප්‍රජාව නිරත ව සිටියදී ලොව පුරා විවිධ යුද ගැටුම්, වසංගත, සාගත වැනි ව්‍යසන මෙන් ම දේශගුණික විපර්යාසයන් පවා සමස්ත ජෛව පැවැත්මට ම අහිතකර අන්දමින් හිස ඔසවා තිබීමයි.

එම අයහපත් සමාජ පරිසර රටාව අවබෝධයෙන් ජය ගැනීම උදෙසා අධ්‍යාපන ක්ෂේත්‍රයේ සුවිශේෂ කඩයිමක් සනිටුහන් කරමින් විප්ලවීය අධ්‍යාපන පරිවතන ක්‍රියාදාමයකට රජය ප්‍රවිෂ්ට වී සිටිනවා.

ඒ අනුව මෙරට අධ්‍යාපනයේ කේන්ද්‍රස්ථානය ලෙස පැවති පිරිවෙන් අධ්‍යාපනයේ ඉහළ ගුණාත්මක සංවර්ධන අපේක්ෂා මුදුන් පමුණුවා ගැනීම කෙරෙහි රජයේ මූලික අවධානය යොමු කර තිබෙනවා.

ඒ සඳහා දැනුම, කුසලතා හා ආකල්ප යන අංශ ත්‍රිත්වයෙහි ම සමබර වර්ධනයකින් ශිෂ්‍ය භික්ෂු දිවි පෙවෙත අර්ථාන්විත ව පරිපූර්ණ කරගැනීමට මහෝපකාරී වන ’ත්‍රිපිටක ධර්ම නිපුණතා පරීක්ෂණය’ වැනි අධ්‍යාපනික ක්‍රියාකාරකම් අභිනවයෙන් හඳුන්වා දී තිබෙනවා වගේම ඉදිරියේ දී ද අවශ්‍ය වෙනත් මානව හා භෞතික පහසුකම් පිරිවෙන් සඳහා ලබාදෙන බවත් මේ අවස්ථාවේ මම සිහිපත් කරනවා යනුවෙන් අග්‍රාමාත්‍යතමිය පුවසුවා ය.

සැමට ආදර්ශයක් ලෙස පිරිවෙන් අධ්‍යාපනය ගොඩනැගීම සඳහා ගෞරවණීය මහානායක ස්වාමින්ද්‍රයන් වහන්සේලා ප්‍රමුඛ මහත් පරිශ්‍රමයකින් පිරිවෙන් කරවන ගුරු කෘත්‍යධිකාරි ස්වාමීන් වහන්සේලා, පරිවේනාධිපති ස්වාමින් වහන්සේලාගේ ආශිර්වාදය සහ සහයෝගය රජය අපේක්ෂා කරනවා.

මෙරට අධ්‍යාපන ක්ෂේත්‍රයේ දිගු කාලීන ව හරයාත්මක ව පෝෂණය කිරීම සම්බන්ධයෙන් සම්භාව්‍ය ඓතිහාසික උරුමයක් සහිත පිරිවෙන් අධ්‍යාපනයට අපගේ කෘතවේදී ගෞරව ප්‍රණාමය පුද කරන්න මම මෙය අවස්ථාවක් කර ගන්නවා,

පිරිවෙන් අධ්‍යාපනය ප්‍රමුඛ මෙරට, බෞද්ධාගමික හා අධ්‍යාපනික මෙන්ම සාමාජීය සුබසිද්ධියට අනගි මෙහෙවරක් ඉටු කළ පුජ්‍යපාද අසරණ සරණ පිණ්ඩපාතික වැලිවිට සිරි සරණංකර සඟරජ හිමියන්ගේ ජන්ම දින ගුණානුස්මරණයට සමගාමී ව ජුනි 19 වන දිනට යෙදී ඇති ජාතික පිරිවෙන් දින සැමරුම අවස්ථාව සඳහා සහභාගිවීමට ලැබීම ඉමහත් භාග්‍යයක් කොට සලකන බව ද අග්‍රාමාත්‍ය ආචාර්ය හරිනි අමරසූරිය පැවසුවා ය.

මෙහිදී පිරිවෙන් අධ්‍යාපනය නගාසිටුවීම වෙනුවෙන් කැපවී කටයුතු කළ ස්වාමින්වහන්සේලා සහ ගිහි පාර්ශ්වය වෙත උපහාර පිදීම සහ 2024 වර්ෂයේ පිරිවෙන් අධ්‍යාපනයේ සමස්ත ලංකා පළමු, දෙවන හා තෙවන ස්ථාන ලබාගත් ශිෂ්‍ය භික්ෂුන්වහන්සේලා ඇගයීම හා ත්‍යාග ප්‍රදානය කිරීමද සිදු කෙරිණ.

රාමඥ්ඥ මහා නිකායේ මහා නායක අතිපූජ්‍ය මකුලෑවේ විමළ නායක ස්වාමීන් වහන්සේ ඇතුළු ත්‍රෛනිකායික මහාසංඝරත්නය, දිවයින පුරා පිහිටි සියලුම පිරිවෙන්, සීලමාතා අධ්‍යාපන ආයතනයන්හි කෘත්‍යාධිකාරී, පරිවේණාධිපතීන් වහන්සේලා, ආගමික හා සංස්කෘතික කටයුතු අමාත්‍ය හිනිදුම සුනිල් සෙනෙවි, අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න, අධ්‍යාපන අමාත්‍යංශයේ ලේකම් නාලක කලුවැව යන මහත්වරුන් ඇතුළු රාජ්‍ය නිලධාරීන් විශාල පිරිසක් ද මෙම අවස්ථාවට සහභාගී වූහ.

අග්‍රාමාත්‍ය මාධ්‍ය අංශය

අද (ජුනි 19) කොළඹ සිනමන් ග්‍රෑන්ඩ් හෝටලයේ දී ’ආර්ථික පරිවර්තනය සඳහා වූ නවෝත්පාදන’ මැයෙන් ආසියානු සංවර්ධන බැංකුව (ADB) මඟින් සංවිධානය කරන ලද Serendipity Knowledge වැඩසටහනට අග්‍රාමාත්‍ය ආචාර්ය හරිනි අමරසූරිය සහභාගී වූවා ය.

මෙම වැඩසටහන, ජාතික නවෝත්පාදනය ශක්තිමත් කිරීම සඳහා රජය සහ ජාත්‍යන්තර විශේෂඥයින් ඇතුළු අනෙකුත් පාර්ශවකරුවන් අතර දිගුකාලීන සම්බන්ධතාවයක් ගොඩනගා ගැනීම සම්බන්ධ ගැටළු පිළිබඳ දැනුම බෙදා ගැනීමේ අරමුණින් ආසියානු සංවර්ධන බැංකුව විසින් සංවිධානය කරනු ලබන වැඩසටහනකි.

සමාරම්භක අවස්ථාව අමතමින් ආර්ථික අර්බුදයෙන් සහ මධ්‍යම ආදායම් උගුලෙන් මිදීම සඳහා නවෝත්පාදනයේ අවශ්‍යතාවය අවධාරණය කළ අග්‍රාමාත්‍ය ආචාර්ය හරිනි අමරසූරිය, පෞද්ගලික අංශය සමඟ සහයෝගයෙන් යුතුව නවෝත්පාදනයන් සඳහා ක්‍රියාකාරීව සම්බන්ධ වෙමින්, නවෝත්පාදනයන් ප්‍රවර්ධනය කිරීමට සහ ප්‍රතිපත්තිමය දිශානතීන් සැකසීමට රජය කැපවී සිටින බව අවධාරණය කළා ය.

තවදුරටත් අදහස් දැක්වූ අග්‍රාමාත්‍යවරිය, ශ්‍රී ලංකාවේ නවෝත්පාදනයන් සඳහා ශක්තිමත් පදනමක් තිබුණ ද, සම්බන්ධීකරණයේ පවතින දුර්වලතා හේතුවෙන් ගෝලීය නවෝත්පාදන දර්ශකයේ (Global Innovation Index) රටවල් 113ක් අතුරින් ශ්‍රී ලංකාව 89 වැනි ස්ථානයට පත්ව ඇති බව සඳහන් කළා ය. තව ද, දශක ගණනාවක් පුරා උසස් අධ්‍යාපන හා පර්යේෂණ සඳහා ප්‍රමාණවත් අවධානයක් යොමු වී නැති බවත්, පර්යේෂණ හා සංවර්ධන කටයුතු සඳහා දැනට වැය කරන මුදල දළ දේශීය නිෂ්පාදිතයෙන් (GDP) 0.1%ක් පමණක් වන බවත් සඳහන් කළා ය.

එම නිසා, ඉදිරි පර්යේෂණ හා සංවර්ධන කටයුතු සඳහා ප්‍රතිපාදන වැඩි කිරීමට මෙන්ම උසස් අධ්‍යාපනය සඳහා උපායමාර්ගිකව ආයෝජනය කිරීමට රජය කැපවී සිටින බව ද අග්‍රාමාත්‍යවරිය මෙහිදී වැඩිදුරටත් සඳහන් කළා ය.

මෙම අවස්ථාවට ආසියානු සංවර්ධන බැංකුවේ ශ්‍රී ලංකා නේවාසික දූත මණ්ඩලයේ අධ්‍යක්ෂ Takafumi Kadono මහතා, අග්‍රාමාත්‍ය ලේකම්, ප්‍රදීප් සපුතන්ත්‍රි මහතා, උසස් අධ්‍යාපන, අධ්‍යාපන සහ වෘත්තීය අධ්‍යාපන අමාත්‍යාංශයේ ලේකම් නාලක කලුගමුව, සහ ශ්‍රී ලංකාවේ විශ්වවිද්‍යාල නියෝජනය කරමින් නිලධාරීන් සහ පීඨ සාමාජිකයින් සහභාගී වූහ.

අග්‍රාමාත්‍ය මාධ්‍ය අංශය

අද (18) කොළඹ ITC රත්නදීප හෝටලයේ දී පැවැති “අපද්‍රව්‍යවලින් ඔබ්බට: දකුණු ආසියාවේ පෝෂණ ගුණත්මකභාවය වැඩි කිරීම සඳහා ආහාර, ජලය සහ බලශක්ති ප්‍රශස්තකරණය” (Beyond Waste: optimizing food, water and energy for better nutrition in South Asia) මැයෙන් පැවති ප්‍රතිපත්ති සංවාදයට අග්‍රාමාත්‍ය ආචාර්ය හරිනි අමරසූරිය සහභාගී විය.

මෙම ප්‍රතිපත්ති සංවාදය ලෝක බැංකුව, ශ්‍රී ලංකා අග්‍රාමාත්‍ය කාර්යාලය සහ කෘෂිකර්ම, පශු සම්පත්, ඉඩම් හා වාරිමාර්ග අමාත්‍යාංශයේ මූලිකත්වයෙන් Gates පදනමේ සහ අනෙකුත් සංවර්ධන හවුල්කරුවන්ගේ මූල්‍ය සහාය ඇතිව සංවිධානය කරයි.

දින දෙකක් පුරා පැවැත්වෙන මෙම ප්‍රතිපත්ති සංවාදය, ආහාර නාස්තිය අවම කිරීම, ආහාර පද්ධතිය ශක්තිමත් කිරීම සහ තිරසාර සම්පත් භාවිත කිරීම ප්‍රවර්ධනය කිරීම අරමුණ කර ගනිමින් සංවිධානය කරන ලද්දකි.

මෙහි සමාරම්භක උත්සවය ඇමතූ අග්‍රාමාත්‍යතුමිය,

ආහාර නාස්තිය අවම කිරීම සහ ආහාර පිළිබඳ පවතින අනාරක්ෂිත බව අවම කිරීම කාලීන අවශ්‍යතාවක් බව අවධාරණය කළා ය. ජාතික මට්ටමින් ආහාර සුරක්ෂිතතාව සහතික කිරීම සඳහා ඒකාබද්ධකරණය, නවෝත්පාදනය සහ අන්තර්ගතභාවය යන අත්‍යවශ්‍ය සාධක තුනක් වැදගත් වන බවත්, තාක්ෂණික විසඳුම්, කෘෂි වෙළෙඳ වැඩමුළු, සහ ආහාර පද්ධතියට කාන්තාවන්ගේ හා තරුණ තරුණියන්ගේ දායකත්වයෙන් එය ළඟා කරගත හැකි බවත් අග්‍රාමාත්‍යතුමිය මෙහි දී වැඩිදුරටත් අවධාරණය කළා ය.

මෙම අවස්ථාවට දකුණු ආසියානු කලාපය නියෝජනය කරමින් පරිසර අමාත්‍ය ආචාර්ය ධම්මික පටබැඳි, නේපාලය, මාලදිවයින සහ ශ්‍රී ලංකාව සඳහා ලෝක බැංකු කලාප අධ්‍යක්ෂ David Sislen, Gates පදනමේ අධ්‍යක්ෂක, Archna Vyas, BIMSTEC සංගමයේ මහ ලේකම් Indra Mani Pandey ඇතුළු සිවිල් සමාජ සංවිධානවල සහ පෞද්ගලික අංශයට සම්බන්ධ පිරිස් ද සහභාගී වූහ.

අග්‍රාමාත්‍ය මාධ්‍ය අංශය

කාන්තාවන්ගේ වෘත්තීය නිදහස ඇති කිරීම රටේ ආර්ථික ප්‍රගතියට අත්‍යවශ්‍ය කාරණයකි.

ළමා ආරක්ෂණය කිසිසේත්ම කාන්තාවන්ට පමණක් වෙන් වූ වගකීමක් නොවන බවත්, දරුවන් රැකබලා ගැනීම හුදු කාන්තා වගකීමක් ලෙස නොසලකමින් කාන්තාවන්ගේ වෘත්තීය නිදහස සහතික කිරීම ඉතා නිවැරැදි අදහසක් මෙන්ම එය රටේ ආර්ථික ප්‍රගතියට අත්‍යාවශ්‍ය කාරණයක් වන බවත් අග්‍රාමාත්‍ය ආචාර්ය හරිනි අමරසූරිය අවධාරණය කරයි.

ජුනි 17 වැනි දා කොළඹ cinnamon Life හෝටලයේ දී "ශ්‍රී ලාංකාවේ කාන්තාවන්ගේ ආර්ථික සහභාගිත්වය වර්ධනය කිරීම" යන තේමාව යටතේ ලෝක බැංකු සමූහය මඟින් සංවිධානය කරන ලද වැඩසටහනේ ප්‍රධාන දේශනය සිදු කරමින් අග්‍රාමාත්‍යවරිය මේ බව අවධාරණය කළා ය.

ළමා රැකවරණය තහවුරු කරමින් කාන්තාවන්ට වැඩි වශයෙන් රටේ ආර්ථිකයට සම්බන්ධ වීමේ අවස්ථා පුළුල් කරමින් ඇයට ශ්‍රම බලකාය තුළ ඉහළ දියුණුවක් ලැබීමේ මඟ විවෘත කරන්නේ කෙසේද යන්න පිළිබඳව සාකච්ඡා කිරීම මෙම වැඩසටහනේ ප්‍රධාන අරමුණ විය.

මෙහි දී තවදුරටත් අදහස් දක්වමින් අග්‍රාමාත්‍යවරිය අවධාරණය කළේ, වැටුපක් ලබමින් හෝ නොලබමින් සිය ශ්‍රමය ලබා දෙන කාන්තාව ආර්ථිකයේ කේන්ද්‍රීය සාධකය වන බවයි. එහෙත්, සමාජීය වශයෙන් ඇයට පවතින අනේකවිධ බාධක හමුවේ කාන්තාවන්ට ශ්‍රම බලකායට සම්බන්ධ වීමට ඇති ඉඩ ප්‍රස්ථාව බොහෝ සෙයින් සීමා වී ඇති අතර, සංඛ්‍යා ලේඛන අනුව 32%ක් වන මෙරට කාන්තා ශ්‍රම බලකා සහභාගිත්වය පිරිමින්ගේ සහභාගීත්වය වන 74% ක ප්‍රමාණයට සාපේක්ෂව සැලකිය යුතු අඩු අගයක් ලෙස පෙන්වූව ද මෙරට ආර්ථිකය වෙනුවෙන් කාන්තාව දක්වන අසීමිත මෙහෙය එලෙස සංඛ්‍යා ලේඛන මඟින් ලඝු කළ නොහැකි බව අග්‍රාමාත්‍යවරිය සඳහන් කළා ය.

ළමා සුරැකුම් ක්ෂේත්‍රය වැඩිදියුණු කිරීම මගින් මෙරට කාන්තාවන්ට පමණක් නොව පවුල් සංස්ථාවට ම පුළුල් ආර්ථික නිදහසක් ලැබෙන අතර, එය දරුවන්ගේ සංවර්ධනයට මෙන්ම ස්ත්‍රී පුරුෂ සමාජභාවී සම්මතයන් වෙනස් කිරීමට ද උපකාරී වන බවද, කී අග්‍රාමාත්‍යවරිය, එලෙස කාන්තාවන්ට ශ්‍රම බලකාය වෙත යොමුවීමට වැඩි ඉඩක් ලැබීමෙන් මෙරට දළ දේශීය නිශ්පාදනය 20% ක අගයකින් වැඩි කළ හැකි බවත් අග්‍රාමාත්‍යවරිය පැවසී ය.

රැකියාවන්හි නියුතු දෙමාපියන්ට සහය වීමෙන් ශ්‍රම බලකාය ශක්තිමත් කිරීමටත් ජාතික සංවර්ධනයට වැදගත් ලෙස දායක වීමටත්, ඒ නිසා ම ළමා ආරක්ෂණ සේවා පුළුල් කිරීමටත් කාන්තා හා ළමා කටයුතු අමාත්‍යාංශය ඔස්සේ මුල් ළමා විය සංවර්ධන වැඩසටහන් වැනි පියවර දැනටමත් ආරම්භ කොට ඇති බව අග්‍රාමාත්‍යවරිය කියා සිටියා ය.

එමෙන්ම ළමා ආරක්ෂණ සේවා සපයන ව්‍යාපාර සඳහා බදු දිරිගැන්වීම් ලබා දීම, වැඩකරන පවුල් සඳහා ආර්ථික සහනාධාර ලබා දීම සහ එම සේවාවේ ගුණාත්මකභාවය සහතික කිරීම සඳහා ජාතික ළමා ආරක්ෂක රාමුවක් දැනටමත් ක්‍රියාත්මක අතර සේවා සැපයීම පුළුල් කිරීම සඳහා රාජ්‍ය-පෞද්ගලික හවුල්කාරිත්වයන් ද ඉතා වැදගත් වන බව අග්‍රාමාත්‍යවරිය මෙහිදි පැවසී ය.

එමෙන්ම මේ වෙනුවෙන් ලෝක බැංකු සමූහය මගින් ලබා දෙන සහයෝගය අග්‍රාමාත්‍යවරිය විසින් විශේෂ ඇගයුමට ද ලක් කරන ලදී.

මෙම අවස්ථාවට කාන්තා හා ළමා කටයුතු අමාත්‍යාංශයේ ලේකම් කේ.ඩී.ආර්. ඔල්ගා මහත්මිය, ලෝක බැංකු සමූහයේ ශ්‍රී ලංකා කළමනාකරු Gevorg Sargsyan මහතා සහ ජාත්‍යන්තර මූල්‍ය සංස්ථාවේ නියෝජිතයින් ඇතුළු පෞද්ගලික අංශයේ හා රාජ්‍ය අංශයේ ආරාධිතයින් රැසක් සහභාගී වූහ.

අග්‍රාමාත්‍ය මාධ්‍ය අංශය

ශ්‍රී ලංකාවේ ඉන්දීය මහ කොමසාරිස් H.E. Santosh Jha මහතා විසින් 2025 ජුනි 16 වන දින ඉන්දීයානු නිල නිවසේ දී ශ්‍රී ලංකා පාර්ලිමේන්තු මන්ත්‍රීවරියන්ගේ සංගමයේ සාමාජිකයින් සඳහා විශේෂ පිළිගැනීමේ උත්සවයක් පැවැත්විය.

මෙම අවස්ථාවේ දී ශ්‍රී ලංකාව සහ ඉන්දියාව අතර පාර්ලිමේන්තු සබඳතා තවදුරටත් ශක්තිමත් කිරීමටත්, කාන්තා සහභාගීත්වය සවිබල ගැන්වීම සහ ස්ත්‍රී පුරුෂ සමාජභාවයේ සමානාත්මතාව පිළිබඳ සහයෝගීතාව ප්‍රවර්ධනය සඳහා අවධානය යොමු විය.

මෙම අවස්ථාවට අග්‍රාමාත්‍ය ආචාර්ය හරිනි අමරසූරිය, කාන්තා හා ළමා කටයුතු අමාත්‍ය සහ ශ්‍රී ලංකා පාර්ලිමේන්තු මන්ත්‍රීවරියන්ගේ සංගමයේ සභාපති, සවිත්‍රි පෝල්රාජ් මහත්මිය ඇතුළු ආණ්ඩු පක්ෂය සහ විපක්ෂය නියෝජනය කරමින් ලංකා පාර්ලිමේන්තු මන්ත්‍රීවරියන්ගේ සංගමයේ සාමාජිකාවන් කිහිප දෙනෙක් ද සහභාගී වූහ.

අග්‍රාමාත්‍ය මාධ්‍ය අංශය

Clean Sri Lanka අපි හැමෝගෙම lifestyle එක විය යුතුයි

සෑම විදුහල්පතිවරයෙක්ම තම පාසලේ Clean Sri Lanka වැඩසටහන රටටම ආදර්ශයක් ලෙස ක්‍රියාත්මක කළ යුතු බවත්, Clean Sri Lanka වැඩසටහන රටේ සියලුදෙනාගේ lifestyle එක විය යුතු බවත් අග්‍රාමාත්‍ය ආචාර්ය හරිනි අමරසූරිය මහත්මිය පැවසුවාය.

අග්‍රාමාත්‍යවරිය මේ බව සඳහන් කළේ අරලියගහ මන්දීරයේ දී, අධ්‍යාපන අමාත්‍යාංශයේ සහ Clean Sri Lanka වැඩසටහනේ නිලධාරීන් සමඟ පැවැති ප්‍රගති සමාලෝචන සාකච්ඡාවකට එක්වෙමිනි.

මෙහිදී නිලධාරීන් තම අත්දැකීම් නිදසුන් ද සහිතව අග්‍රාමාත්‍යවරිය වෙත ඉදිරිපත් කළහ.

වැඩි දුරටත් අදහස් දැක්වූ අග්‍රාමාත්‍ය ආචාර්ය හරිනි අමරසූරිය,

‘‘අපි මේ කරන්න හදන්නේ අදින් වසර පනහකට පමණ පෙර කළ යුතුව තිබු දේවල්. ඒ නිසා මෙය තවත් එක් ව්‍යාපෘතියක් ලෙස කඩිමුඩියේ කරන්න අවශ්‍ය නෑ. අපට තව කල් තිබෙනවා.

Clean Sri Lanka කියන්නෙ නිකම්ම නිකං Clean කිරීමක් නෙවෙයි. Clean Sri Lanka කියන්නේ අප හිතන පතන විදිහ, ආකල්ප, චර්යාවන් එක්කම අපි ජීවත්වෙන පරිසරයත් Clean ව පවත්වාගෙන යාමයි.

Clean Sri Lanka අපි හැමෝගෙම lifestyle එක විය යුතුයි. ඒකට අපේ අනාගත පරපුර, විශේෂයෙන්ම ශිෂ්‍ය ප්‍රජාව හුරු කර ගැනීමට අවශ්‍ය නිසයි අපි Clean Sri Lanka වැඩසටහන පාසලට හදුන්වා දනේනෙ.

මේ වන විටත් පාසල් දරුවන්, දෙමව්පියන් සහ ත්‍රිවිධ හමුදාව වගේම Clean Sri Lanka වැඩසටහනට ස්වේච්ඡාවෙන්ම සහාය දෙන තවත් පාර්ශ්ව ගණනාවක් සම්බන්ධ කරගෙන විශාල වැඩසටහන් ප්‍රමාණයක් සාර්ථකව ක්‍රියාත්මක කර තිබෙනවා.

පාසල් මුල් කරගෙන ක්‍රියාත්මක කරන මේ වැඩසටහන් අනිත් අයත් දැනුවත් වන අන්දමින් ජනතාව අතරට ගෙන යාමට ජනමාධ්‍ය‍යේ සහාය අවශ්‍යයි.

අනිත් වැදගත්ම කාරණය වන්නේ, අවශ්‍ය හැම වෙලාවෙම අපි පාසල් පද්ධතිය තුළ ක්‍රියාත්මක කරන Clean Sri Lanka වැඩසටහනට විශේෂ අවශ්‍යතා ඇති දරුවන්ගේ අවශ්‍යතා ගැන අදාළ පාර්ශ්වයන්ගේ උපදෙස් සහ මගපෙන්වීම ලබා ගැනීමයි.

විශේෂයෙන්ම මේ වැඩසටහන යටතේ පාසල්වල ඇති කරමින් යන වැසිකිළි කැසිකිළි පහසුකම්වල දී ආබාධිත ප්‍රජාවන්ගේ පහසුව සහ අවශ්‍යතා පිළිබඳ අනිවාර්යයෙන්ම අවධානය යොමු කළ යුතුයි.

ඒ වගේම මෙම වැඩසටහන යටතේ ඉදිකෙරෙන වැසිකිළි කැසිකිළි ඇතුළු හැමදේකම එකම ආකෘතියක් පවත්වාගත යුතුයි. එක එක තැන්වල එක එක විදිහේ වෙන්න බෑ.

Clean Sri Lanka පාසල්වල ක්‍රියාත්මක කිරීමේදී, ඇතැම් විට ඊට අවශ්‍ය මුදල සපයා ගැනීමේ අපහසුතා මතුවෙනවා. ඒ සඳහා කඩිනමින්ම විසඳුම් ලබා දීමට අපිට පුලුවන්කම තිබෙනවා.

Clean Sri Lanka පාසල්වලින් ඔබ්බට කාර්මික විද්‍යාල, ගුරු විද්‍යාල සහ විශ්වවිද්‍යාල තුළටත් ගෙන යා යුතුයි. මෙය තනි පුද්ගලයෙක් හෝ කණ්ඩායමක් ඉලක්ක කරගත් තාවකාලික වැඩසටහනක් නොවෙයි. සමස්ත රටම ඉලක්ක කරගත් දැවැන්ත ජාතික වැඩසටහනක ආරම්භක අවධිය.

අපි මේ ලබන අත්දැකීම්වලින් ඉගෙන ගනිමින් වැරදි අඩුපාඩු හදාගනිමින් ඉදිරියට යමු" යැයි අග්‍රාමාත්‍යවරිය එහිදී වැඩිදුරටත් සඳහන් කළා ය.

මෙම සාකච්ඡාවට අධ්‍යාපන අමාත්‍යාංශයේ සහ Clean Sri Lanka වැඩසටහනේ නිලධාරීන් පිරිසක් එක්ව සිටියහ.

අග්‍රමාත්‍ය මාධ්‍ය අංශය