2024 මහ මැතිවරණයෙන් ඔබ තෝර ගත්තේ ඔබව නියෝජනය කරන්න පුළුවන් සරල පිරිසක්.
රජයේ සහතික මිලට ගොවියාගෙන් වී මිලදී ගන්නා බවත් ගොවියා මෙන්ම පාරිභෝගිකයාද ආරක්ෂා කර ගැනීමට වී වලට සහතික මිලක් රජය විසින් ලබා දුන් බවත් අග්‍රාමාත්‍ය ආචාර්ය හරිනි අමරසූරිය පැවසුවාය.
යාපනය, චුන්නාකම් එලාලෙයි ප්‍රදේශයේ පෙබරවාරි 15 දින පැවැති ජන හමුවක් අමතමින් අග්‍රාමාත්‍යවරිය මේ බව සඳහන් කළාය.
මෙහිදී වැඩිදුරටත් අදහස් දැක්වූ අග්‍රාමාත්‍ය ආචාර්ය හරිනි අමරසූරිය ,
"මේ මගේ පළමු වතාව ඉතිහාසගත මැතිවරණයකින් පස්සේ යාපනයට පැමිණි. 2025 වසර ශ්‍රී ලංකාවට ඓතිහාසික වසරක්. පසුගිය වසර කිහිපය තුළ ලංකාවේ බොහෝ වෙනස්කම් සිදුවුණා. විශාල ආර්ථික අර්බුදයකට මුහුණ දුන්නා. අපි බංකොලොත් රටක් බවට පත්වුණා.අපි කවදාවත් මුහුණ දීලා නැති විදිහේ දරුණු ආර්ථික අර්බුදධයකට ලක්වුණා.
පසුගිය වසර කිහිපය තුළ අපි දැක්කා මිනිස්සු මේ ක්‍රමය වෙනස් කරන්න සක්‍රීයව දායක වුණා. රටේ ජනතාව තීරණය කරා පවතින ක්‍රමය වෙනස් කරන්න.ඔවුන්ට අවශ්‍ය වුණා වෙනස් රටක්, වෙනස් දේශපාලන සංස්කෘතියක්, වෙනස් නායකත්වයක්. අපිට තේරෙනවා 2024 මැතිවරණයෙන් පෙනුනේ පසුගිය වසර කිහිපය තුළ මිනිස්සු බලාපොරොත්තු වුණේ මේ රටේ වෙනසක් සිදු කරන්න කියලා.
මෙවැනි පාර්ලිමේන්තුවක් මෙවැනි නායකත්වයක් තෝරගත්තෙ ඇයි කියලා අපිට තේරෙනවා. මිනිස්සු පළමුව තෝරගත්තේ ජනාධිපතිවරයා. මෙතන ඉන්න අපි වගේම සරල පවුලකින් පැමිණි ගොවි පවුලකින් පැමිණි කෙනෙක්. ඒක තමයි සිදුකරපු පළමු වෙනස.
එමෙන්ම මහ මැතිවරණයෙන් විශාල වෙනසක් සිදු කරා. පාර්ලිමේන්තුව සඳහා ඔබව නියෝජනය කළ හැකි පිරිසක් ඔබ තෝරගත්තා. ඒ නිසා ඔබ දන්නවා පාර්ලිමේන්තුවේ අය දේශපාලන පවුල්වලින් පැමිණි අය නෙවෙයි. ඔවුන් බහුතරයක් වෛද්‍යවරුන්, විශ්ව විද්‍යාල කථිකාචාර්යවරුන් ඒ වගේම ගොවි පවුල් වලින් ආපු අයත් ඉන්නවා. එමෙන්ම ඉතිහාසයේ ප්‍රථම වතාවට මෙම පාර්ලිමේන්තුවේ කාන්තා පාර්ලිමේන්තු මන්ත්‍රීවරියන් වැඩි ප්‍රමාණයක් ඉන්නවා.
අපි මේ ලබාගත්තේ ඓතිහාසිකා ජයග්‍රහණයක් මේකෙන් මේ රට අපිට වෙනස් කරන්න පුළුවන්.
රටේ පුරවැසියෙකු ලෙස සෑම පුරවැසියෙකුටම සමාන නීතියක් සමාන අයිතිවාසිකමක් ලැබිය යුතුයි. අපි හැමෝම සමානයි. අපි රටක් වශයෙන් එකට සිටිය යුතුයි. සමානාත්මතාවය කියලා කියන්නේ ඔබ හැම එක සමානයි කියන එක නෙවෙයි. පුරවැසියෙකු ලෙස සම අයිතීන් තියෙන්න ඕනේ කියන එක.
අපේ රටේ විවිධ සංස්කෘතීන් විවිධ ජාතීන් ඉන්න එක අපිට ලොකු ශක්තියක් ඒ වගේම එමගින් අපේ රටට ආවේණිකත්වයක් ලබා දෙනවා. ඒක ඉතා අනර්ඝ කාරණාවක්.
රටේ පුරවැසියෙකු ලෙස අපට ගෞරවයක් අවශ්‍යයි. අපට ඇහුම්කන් දෙන කෙනෙක් අවශ්‍යයි. රටේ තීරණ ගැනීමේදී අපේ සක්‍රීය දායකත්වය අවශ්‍යයි. ඒ නිසා තමයි මිනිස්සු අපේ රජය තෝරගත්තේ.
ඒ නිසා තමයි 2024 මැතිවරණය ඓතිහාසික ජයග්‍රහණයක් වෙන්නේ ශ්‍රී ලංකාවට.
පසුගිය රජයන්වලින් පවත්වාගෙන ගිය අමාත්‍යාංශ සහ ඒවාට අනුබද්ධ ආයතන තැන් තැන්වල තිබුණේ. කිසිම විද්‍යාත්මක හෝ තාර්කික පදනමක් නැතුව අමාත්‍යාංශ බෙදලා තිබුණේ, අධ්‍යාපනය සහ මහා මාර්ග සංවර්ධනය එකට තිබ්බේ.ඉතින් එවැනි තීරණ නැතුව විද්‍යාත්මකව සහ තාර්කිකව නිවැරදි තීරණ ගන්න එකට එකතුවෙලා වැඩකරන්න ඕනෑ.
අපි ගොවියාට වී සඳහා සහතික මිලක් දීලා තියෙනවා. ගොවියා වගේම පාරිභෝගිකයා රකින්නත් අපිට සිදුවෙනවා. ඒ නිසයි අපිට සහතික මිලක් දෙන්න වෙලා තියෙන්නේ.
එමෙන්ම මම ඔබට කියන්න කැමතියි මට අදාළ විෂය ගැනත් මේ රටේ තියෙන අධ්‍යාපන ක්‍රමය නිසා පාසල් දරුවන් පීඩාවට පත්වෙලා ඉන්නවා. මේ ක්‍රමය වෙනස් කරලා ඔවුන්ට හොඳ අධ්‍යාපනයක් ලබා දෙන්න අපි කැප වෙනවා. ඒ වෙනුවෙන් අවශ්‍ය තීන්දු තීරණ ගනිමින් පවතිනවා. "
මෙම අවස්ථාවට අමාත්‍ය රාමලිංගම් චන්ද්‍රසේකරම්, පාර්ලිමේන්තු මන්ත්‍රීවරුන්, මහජන නියෝජිතයින් ඇතුළු බොහෝ පිරිසක් සහභාගී වූහ.
අග්‍රාමාත්‍ය මාධ්‍ය අංශය