​කිතුනු බැතිමතුන් මහත් භක්තියෙන් සමරනු ලබන, ජේසුස් ක්‍රිස්තුස් වහන්සේ මරණය පරාජය කර උත්ථානය වීම සිහිපත් කරන මෙම උතුම් පාස්කු උත්සවයේදී, ඔබ සැමට සාමය, සතුට හා දේව ආශිර්වාදය පිරි සුභ පාස්කු මංගල්‍යයක් වේවායි ප්‍රාර්ථනා කරමි.

​මරණයෙන් පසු නැවත උත්ථානය වූ ක්‍රිස්තුස් වහන්සේ ලෝකයාට ලබා දුන් පණිවුඩය වන්නේ, අඳුර පරදා ආලෝකයත්, බිය පරදා විශ්වාසයත්, වේදනාව පරදා සදාකාලික ප්‍රීතියත් ජයගත හැකි බවයි.

​අපගේ ජීවිත තුළ විවිධ අභියෝග, දුක් වේදනා හා බාධක පැමිණීම ස්වභාවිකය. එහෙත්, කිසිදු අඳුරු රාත්‍රියක් ස්ථිර නොවන බවත්, සෑම අභියෝගයකටම පසු බලාපොරොත්තුවේ අරුණෝදය උදාවන බවත් පාස්කු පණිවුඩය අපට සිහිපත් කර දෙයි. එය ජීවිතය අලුතින් ආරම්භ කිරීමටත්, අත් නොහරින අධිෂ්ඨානයෙන් යුතුව ඉදිරියට යාමටත් අපව දිරිමත් කරයි.

​අප මහත හරසරින් පාස්කු දින සැමරුම් සිදු කළද මැද පෙරදිග කලාපයේ පවතින අවාසනාවන්ත යුදමය තත්ත්වය හේතුවෙන් විශාල පිරිසක් පීඩා විඳින බවද අමතක නොකළ යුතුය. වෛරය සහ ගැටුම් වෙනුවට සාකච්ඡාව සහ අවබෝධය රජයන, යුධ බිය පහව ගිය සාමකාමී ලෝකයක් උදාවේවා යි ශුද්ධ වූ පාස්කු දිනයේ ප්‍රාර්ථනා කරමි.

ක්‍රිස්තුස් වහන්සේ වදාළ ප්‍රේමයේ සහ සාමයේ පණිවුඩය පෙරදැරි කරගෙන, අපගේ හදවත් ප්‍රේමයෙන්, ඉවසීමෙන් හා සමාව දීමේ උදාර ගුණයෙන් පෝෂණය කර ගනිමු. සියලු භේදයන් දුරු කර, සහෝදරත්වයෙන් හා සාමයෙන් යුත් එක් මානව පවුලක් ලෙස ශ්‍රී ලංකාව ගොඩනැඟීමට අත්වැල් බැඳ ගනිමු.
​
සුභ පාස්කු මංගල්‍යයක් වේවා!

​ආචාර්ය හරිනි අමරසූරිය
අග්‍රාමාත්‍ය
ශ්‍රී ලංකා ප්‍රජාතාන්ත්‍රික සමාජවාදී ජනරජය
2026 අප්‍රේල් 5 දින

වැඩිහිටි සියලු දෙනාට ආරක්ෂාව, නිදහස, සතුට, සෞඛ්‍ය, ප්‍රවාහනය මෙන්ම අධ්‍යාත්මික යහපැවැත්ම තහවුරු වන අයිතිවාසිකම් සුරැකෙන සමාජයක් නිර්මාණය විය යුතුයි

වැඩිහිටි සියලු දෙනාට ආරක්ෂාව, නිදහස, සතුට, සෞඛ්‍ය, ප්‍රවාහනය මෙන්ම අධ්‍යාත්මික යහපැවැත්ම තහවුරු වන ජීවිතයක් සහ වැඩිහිටි අයිතිවාසිකම් සුරැකෙන සමාජයක් නිර්මාණය විය යුතු බවත්, එය රජයේ මෙන්ම සමාජයේද වගකීමක් බවත් අග්‍රාමාත්‍ය ආචාර්ය හරිනි අමරසූරිය පැවසුවා ය.

නවීන පහසුකම් සහිතව කතරගම ප්‍රදේශයේ ඉදිකළ Silver Age Center වැඩිහිටි සත්කාරක, පුහුණු සහ පර්යේෂණ මධ්‍යස්ථානය විවෘත කිරීමේ අවස්ථාවට මාර්ගගත ව සම්බන්ධ වෙමින් මාර්තු 31 වන දින සෙත්සිරිපාය නව ගොඩනැගිල්ලේ පිහිටි ග්‍රාමීය සංවර්ධන, සමාජ ආරක්ෂණ සහ ප්‍රජා සවිබල ගැන්වීම් අමාත්‍යංශයේදී අග්‍රාමාත්‍යතුමිය මේ බව පැවසීය.

මෙහිදී වැඩිහිටි තැනැත්තන් සඳහා වූ ජාතික සභාවේ නියෝජිතයින් විසින් වැඩිහිටි තැනැත්තන් සඳහා ආයතනගත රැකවරණය සපයනු ලබන මධ්‍යස්ථාන නියාමනයට අදාල නියෝග සහ මාර්ගෝපදේශ කෙටුම්පත අග්‍රාමාත්‍යතුමිය වෙත පිළිගැන්වීම ද සිදු කළේය.

මෙහිදී අදහස් දැක් වූ අග්‍රාමාත්‍ය ආචාර්ය හරිනි අමරසූරිය මෙසේද කීය,

2022 ආරම්භ කළ මෙම ව්‍යාපෘතිය විවිධ හේතු නිසා නතර කර තිබුණා. කෙසේ නමුත් ඒ ව්‍යාපෘතිය අපි නැවත ආරම්භ කරලා අද ජනතා අයිතියට පත් කරනවා.

අපේ ප්‍රතිපත්තියේ එක් ප්‍රධාන ප්‍රතිඥාවක් තමයි සියලු දෙනාට ආරක්ෂිත හා අයිතීන් සුරැකෙන සමාජයක් කිර්මාණය කිරීම. ලොකු කුඩා සියලු දෙනාට ඒ අයිතිය, නිදහස සතුට හිමි විය යුතුයි.

ජනගහනය අනුව අපේ රටේ විශාල පිරිසක් ඉතා ශීඝ්‍රයෙන් වැඩිහිටියන් බවට පත්වෙමින් තිබෙනවා. නමුත් වයස අවුරුදු 60 කියන්නේ සමාජයට, ආර්ථිකයට දායකත්වය ලබා දියහැකි ක්‍රියාකාරී වයස් සීමාවක්. වැඩිහිටියන් වුවත් ඔවුන්ටත් විවිධ අවශ්‍යතා තිබෙනවා. හැකියාවන් තිබෙනවා අත්දැකීම් තිබෙනවා. ඔවුන්ටත් සමාජය සමග සම්බන්ධ වෙලා වැඩ කරන්න පුළුවන කියන යථාර්ථය අපි අවබෝධ කර ගත යුතුයි.

වැඩිහිටියන් වෙනුවෙන් සේවාවන් සපයන ආයතන ඉතාම වැදගත් එවැනි ආයතන නිසිපරිදි පවත්වා ගැනීම සමාජ වගකීමක්. පවුල තුළත්, ස්වාධිනවත්, විවිධ ආයතන තුළත් ජීවත් වන සියලු වැඩිහිටියන්ට ආරක්ෂාව සහ අවශ්‍ය සේවාව ලබා දෙමින් ඔවුන්ගේ අයිතීන් ආරක්ෂා කිරීම ඉතාම වැදගත්.

වැඩිහිටියන් සඳහා අවශ්‍ය සෞඛ්‍ය, ප්‍රවාහන, වැඩිහිටි අධ්‍යාපනය, නිදහස,සතුට වගේම ඔවුන්ගේ අයිතීන් සහ වැඩිහිටි අධ්‍යාපනය මෙන්ම අධ්‍යාත්මික යහපැවැත්මත් තහවුරු කළ යුතුයි.

සම්ප්‍රදායිකව වැඩිහිටි නිවාසයක් කියන ආකල්පයෙන් බැහැර වෙලා වැඩිහිටියන්ගේ අවශ්‍යතා අනුව සේවාව සපයන ආයතන ලෙස ගෞරවාන්විතව තමන්ගේ සැඳෑ සමය ගතකරන්න අවශ්‍ය පරිදි ඒ ආයතන පවත්වාගෙන යාම අවශ්‍ය බවද අග්‍රාමාත්‍ය ආචාර්ය හරිනි අමරසූරිය මෙහිදී පැවසුවාය.

වෙළඳ, වාණිජ, ආහාර සුරක්ෂිතතාව සහ සමුපකාර සංවර්ධන නියෝජ්‍ය අමාත්‍ය ආර්. එම්. ජයවර්ධන මහතා ඇතුළු ප්‍රාදේශීය මහජන නියෝජිතයින් සහ රාජ්‍ය නිලධාරීන් විසින් Silver Age Center වැඩිහිටි සත්කාරක, පුහුණු සහ පර්යේෂණ මධ්‍යස්ථානය විවෘත කිරීම සිදු කළ අතර ග්‍රාමීය සංවර්ධන, සමාජ ආරක්ෂණ සහ ප්‍රජා සවිබල ගැන්වීම් අමාත්‍ය ආචාර්ය උපාලි පන්නිලගේ,අමාත්‍යංශ ලේකම් සම්පත් මන්ත්‍රීනායක යන මහත්වරුන් ඇතුළු අමාත්‍යංශයේ නිලධාරීන් අග්‍රාමාත්‍යතුමිය සමඟ මාර්ගගත ක්‍රමවේදයෙන් මෙම අවස්ථාවට සහභාගී විය.

අග්‍රාමාත්‍ය මාධ්‍ය අංශය

දිට්වා සුළි කුණාටුවෙන් සිදු වූ හානිය යථා තත්ත්වයට පත් කිරීමේ ක්‍රියාවලිය කඩිනම් කිරීම සහ ආපදාවට ලක් වූවන්ට සහන සැලසීම වෙනුවෙන් සිවිල් සමාජ සංවිධාන සහ අග්‍රාමාත්‍ය ආචාර්ය හරිනි අමරසූරිය අතර සාකච්ඡාවක් මාර්තු 28 දින අරලියගහ මන්දිරයේ දී පැවැත්විය.

මෙහිදී, දිස්ත්‍රික් ලේකම් කාර්යාල මූලාශ්‍ර කොට ගනිමින් දීමනා ගෙවීම සම්බන්ධව සහ සුරක්ෂිතතා කඳවුරු සම්බන්ධ තොරතුරු පිළිබඳව ද, රජය ගෙන ඇති ක්‍රියා මාර්ගයන්හි වත්මන් තත්ත්වය පිළිබඳව ද සංක්ෂිප්ත වාර්තාවක් ජනාධිපති කාර්ය මණ්ඩල ප්‍රධානී සහ අත්‍යවශ්‍ය සේවා කොමසාරිස් ජනරාල් ප්‍රභාත් චන්ද්‍ර කීර්ති මහතා විසින් අග්‍රාමාත්‍යතුමිය වෙත ඉදිරිපත් කරන ලදී.

විශේෂයෙන් රජය ප්‍රකාශයට පත් කළ සහන සහ වන්දි ලබා ගැනීමේ දී ඉඩම්වල නීත්‍යානුකූල හිමිකමක් නොමැති දිට්වා සුළි කුණාටුවෙන් පීඩාවට පත් වතුකර මලෛයිහම් දමිළ ප්‍රජාවගේ ඉල්ලීම් සම්බන්ධව අවධානය යොමු කළ අතර, ඒ සම්බන්ධව වැවිලි හා ප්‍රජා යටිතල පහසුකම් අමාත්‍යාංශය සමඟ ඒකාබද්ධව ප්‍රතිපත්තිමය තීරණ ගැනීම කෙරෙහිද අවධානය යොමු කෙරිණ.

2025 වසරේ ඇති වූ සුළිකුණාටුව මගින් සිදු වූ හානිය යථා තත්ත්වයට පත්කිරීම හා එම ක්‍රියාවලියට අදාල කමිටු හා අනුකමිටුවල වැඩපිළිවෙල කඩිනම් කිරීමට සැලසුම් කර ඇති බවත්, නිවාස 20,000 ක් අලුතින් ඉදි කිරීමටත්, අර්ධ හානි නිවාස එක්ලක්ෂ පහළොස් දාහක් නැවත ප්‍රතිසංස්කරණය කිරීමටත්, නිවසක් ඉදිකිරීමට සුදුසු ඉඩමක් දැනටමත් ඇති අය සඳහා රජය විසින් ලබා දීමට නියමිත රුපියල් මිලියන 5 ක මූල්‍ය ආධාරය ලබා දීමටත්, ප්‍රධාන නගර ආශ්‍රිතව පොදු පහසුකම් සහිත මහල් නිවාස සංකීණ ඉදිකිරීමටත් සැලසුම් කර ඇති බව නිවාස, ඉදිකිරීම් සහ ජල සම්පාදන අමාත්‍යංශයේ ලේකම් ඉංජිනේරු එල්. කුමුදුලාල් බෝගහවත්ත මහතා මෙහිදී පැවසීය.

පීඩාවට පත් ප්‍රජාවගේ මෙන්ම විශේෂයෙන් කාන්තාවන්ගේ, දරුවන්ගේ සහ විශේෂ අවශ්‍යතා ඇති පිරිසගේ කායික මානසික හා සාමාජයීය සුබසාධනය සිවිල් සමාජ සංවිධාන, විශේෂ කමිටු සහ අනු කමිටු හරහා නිරන්තයෙන් අවධානයට යොමු කරන බවද නිලධාරීන් මෙහිදී අවධාරණය කළේය.

හානියට ලක්වූ නිවාස සංවර්ධනය කිරීමේදී ජනතාවට වඩාත් සුදුසු මෙන්ම නාගරික පොදු පහසුකම් සහිත ප්‍රදේශවල නිවාස ඉදිකිරීමටත්, නිරන්තරයෙන් ප්‍රජාව සමඟ සන්නිවේදනය කරමින් නැවත ආපදාවකට ලක් නොවන ස්ථානවල ඉදිකිරීම් සිදු කිරීම හරහා ජනතාවගේ ආරක්ෂාව තහවුරු කිරීමේ අවශ්‍යතාවය පිළිබඳ අග්‍රාමාත්‍යතුමිය මෙහිදී අවධාරණය කර සිටියාය.

අග්‍රාමාත්‍ය ලේකම් ප්‍රදීප් සපුතන්ත්‍රී, ජනාධිපති කාර්ය මණ්ඩල ප්‍රධානී සහ අත්‍යවශ්‍ය සේවා කොමසාරිස් ජනරාල් ප්‍රභාත් චන්ද්‍රකීර්ති, නිවාස ඉදිකිරීම් සහ ජල සම්පාදන අමාත්‍යශ ලේකම් ඉංජිනේරු එල්, කුමුදුලාල් බෝගහවත්ත, ආරක්ෂක අමාත්‍යාංශයේ අතිරේක ලේකම් කේ. සී. ධර්මතිලක, සම කැඳවුම්කරුවන් වන රෝහණ හෙට්ටිආරච්චි සහ ගෞතමන් බාලවන් යන මහත්වරුන් ඇතුළු සිවිල් සමාජ සංවිධාන 33ක නියෝජිතයින් පිරිසක් මෙම සාකච්ඡාවට සහභාගී වුහ.

අග්‍රාමාත්‍ය මාධ්‍ය අංශය

“අභියෝගය” කෘතිය නවීන ලෝකයේ අභියෝග, ධෛර්ය සම්පන්න බවේ වටිනාකම සහ නව්‍යකරණය පිළිබඳ අවබෝධය වර්ධනය කිරීමට වැදගත් හා කාලෝචිත දායකත්වයක් සපයන අතර, අධ්‍යාපනය, පර්යේෂණ සහ සමාජ පරිවර්තනය සඳහා වටිනා දෘශ්ටි පරාසයක් පෙන්වාදෙන බව අග්‍රාමාත්‍ය ආචාර්ය හරිනි අමරසූරිය මහත්මිය පැවසුවාය.

සිංගප්පූරු ජාතික විශ්වවිද්‍යාලයේ දෙපාර්තමේන්තු ප්‍රධානී මහාචාර්ය සුරංග නානායක්කාර විසින් රචිත “අභියෝගය” කෘතිය එළිදැක්වීමේ උත්සවයට සහභාගී වෙමින් 2026 මාර්තු 28 වන දින කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ (BMICH) ලෝටස් ශාලාවේදී අග්‍රාමාත්‍යවරිය මෙම අදහස් පළ කළාය.

එම කෘතිය නවීන ගෝලීය සහ පුද්ගලික අභියෝග, නව්‍යකරණය සහ ධෛර්ය සම්පන්න බවේ වැදගත්කම පිළිබඳ විමර්ශනාත්මක අදහස් ඉදිරිපත් කරමින්, ශාස්ත්‍රීය අත්දැකීම් සහ ගෝලීය අනාවරණ මත පදනම් වූ සිත්ගන්නාසුළු දෘෂ්ටි පරාසයක් පාඨකයන්ට පෙන්වා දෙයි. මෙම ප්‍රකාශනය සහ එහි ඉංග්‍රීසි අනුවාදය උත්සවයේදී අග්‍රාමාත්‍යවරියට පිරිනැමීම සිදුකරන ලදී.

මෙම වැදගත් පොත් ප්‍රකාශනය වෙනුවෙන් කතුවරයාට සුබපැතුම් එක් කරමින් අග්‍රාමාත්‍යවරිය පැවසුවේ මෙවැනි ශාස්ත්‍රීය කෘති අනාගත පරම්පරාව, විශේෂයෙන්ම ශිෂ්‍යයන් සහ තරුණ පර්යේෂකයන් සදහා, විචාරාත්මකව සිතීමට, අභියෝගයන් භාර ගැනීමට උත්ප්‍රේරනය කරන බවයි. ශ්‍රී ලංකාවේ ප්‍රගතිශීලී හා විමර්ශනාත්මක අධ්‍යාපන පරිසරයක් ගොඩනැගීමට දැනුම බෙදාගැනීම සහ නව්‍යකරණය අත්‍යවශ්‍ය බවත් ඇය අවධාරණය කළාය.

ශිෂ්‍යයන් සහ අධ්‍යාපන ආයතන වෙත මෙම කෘතියේ පිටපත් 5,000 ක් නොමිලේ බෙදාහැරීමේ වැඩසටහන ද අග්‍රාමාත්‍යවරිය විසින් ආරම්භ කරන ලද අතර, දැනුම පුළුල් ප්‍රේක්ෂක පිරිසක් වෙත ලබාදීමේ වැදගත්කමද මෙහිදී ඉස්මතු කරන ලදී.

මෙම අවස්ථාවට අධ්‍යාපන අමාත්‍යාංශ ලේකම් නාලක කළුවැව මහතා, ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතා,මහාචාර්ය සුරංග නානායක්කාර මහතාගේ පවුලේ සාමාජිකයන්, විශ්වවිද්‍යාල උපකුලපතිවරු, මහාචාර්යවරු සහ ආචාර්යවරු, අධ්‍යාපන අමාත්‍යාංශයේ උසස් නිලධාරීන්, පාසල් විදුහල්පතිවරු, ශිෂ්‍යයන් සහ ආරාධිත අමුත්තන් සහභාගී වූහ.

අග්‍රාමාත්‍ය මාධ්‍ය අංශය

දිවයිනේ සෑම ප්‍රදේශයකම සිටින දරුවන්ට නව තාක්ෂණික අවස්ථාවන් හිමිවන අධ්‍යාපන ක්‍රමයක් නිර්මාණය කිරීම රජයේ අරමුණ බව අග්‍රාමාත්‍ය ආචාර්ය හරිනි අමරසූරිය පැවසුවා ය.

කොළඹ බුර්හානි සෙරන්ඩිබ් විද්‍යාලයේ අද (28) පැවැති, ශ්‍රී ලංකාවේ තරුණ පරපුරේ තාක්ෂණික නිපුණතා ජාත්‍යන්තර මට්ටමට ඔසවා තබන ලෝක රොබෝ ඔලිම්පියාඩ් (WRO) ජාතික තරගාවලියේ සමාරම්භක අවස්ථාවට එක්වෙමින් අග්‍රාමාත්‍ය ආචාර්ය හරිනි අමරසූරිය මේ බව පැවසුවා ය.

මෙවර තරගාවලිය සඳහා දිවයින පුරා පාසල්වලින් කණ්ඩායම් 66ක් සහභාගී වූ අතර, එය පසුගිය වසරට සාපේක්ෂව තෙගුණයක වර්ධනයකි. ​“Robots Meet Culture” (රොබෝ තාක්ෂණයේ සහ සංස්කෘතියේ හමුව) යන තේමාව යටතේ පැවැත්වුණු මෙම තරගාවලියට සිසුන් 500කට අධික පිරිසක් සහභාගී වූ අතර දේශීය සංස්කෘතිය සහ නවීන ඉංජිනේරු විද්‍යාව මුසු වූ නිර්මාණ ඉදිරිපත් කර තිබුණි.

​මෙහිදී වැඩි දුරටත් අදහස් දක්වමින් අග්‍රාමාත්‍ය ආචාර්ය හරිනි අමරසූරිය මෙසේද පැවසීය.

වර්තමාන වේගයෙන් වෙනස් වන ලෝකය තුළ විද්‍යාව, තාක්ෂණය, ඉංජිනේරු විද්‍යාව සහ ගණිතය (STEM) යන ක්ෂේත්‍ර කෙරෙහි අවධානය යොමු කිරීම රටක ජාතික ප්‍රමුඛතාවක් විය යුතුයි.

ලෝක රොබෝ ඔලිම්පියාඩ් වැනි අවස්ථාවන් හරහා අපේ තරුණ පරපුරට තර්කානුකූල චින්තනය, නවෝත්පාදනය සහ සහයෝගීතාව වැනි අත්‍යවශ්‍ය කුසලතා ප්‍රගුණ කිරීමට මහඟු අවස්ථාවක් ලැබෙනවා.

2025 වසරේදී ශ්‍රී ලංකාව ප්‍රථම වතාවට සිංගප්පූරුවේ පැවති ජාත්‍යන්තර රොබෝ ඔලිම්පියාඩ් තරගාවලියට කණ්ඩායම් දෙකක් ඉදිරිපත් කිරීමත් අපේ දරුවන්ට ලැබුණු ඉතා වැදගත් අත්දැකීමක්.

දිවයිනේ සෑම ප්‍රදේශයකම සිටින දරුවන්ට මෙවැනි තාක්ෂණික අවස්ථාවන් හිමිවන අධ්‍යාපන ක්‍රමයක් නිර්මාණය කිරීම රජයේ අරමුණ බව ද අග්‍රාමාත්‍යතුමිය අවධාරණය කළාය.

​මෙම අවස්ථාවට අග්‍රාමාත්‍ය ලේකම් ප්‍රදීප් සපුතන්ත්‍රි මහතා ඇතුළු ඉන්දීය මහ කොමසාරිස් කාර්යාලයේ නිලධාරීන්, මෙරට රාජ්‍ය නිලධාරීන් පාසල් සිසුන් විශාල පිරිසක් එක්ව සිටියහ.

අග්‍රාමාත්‍ය මාධ්‍ය අංශය

2026 මාර්තු 26 වන දින ශ්‍රී ලංකාවේ අභිනවයෙන් පත් වූ දූත මණ්ඩල ප්‍රධානීන් අග්‍රාමාත්‍ය ආචාර්ය හරිනි අමරසූරිය අග්‍රාමාත්‍ය කාර්යාලයේදී හමුවිය.

මැලේසියාව සඳහා නම් කරන ලද මහ කොමසාරිස් දර්ශන එම්. පෙරේරා මහතා, ඔස්ට්‍රියාව සහ PRUN සඳහා නම් කරන ලද තානාපති ඩයනි මෙන්ඩිස් මහත්මිය, ඉතියෝපියාව සහ අප්‍රිකානු සංගමය සඳහා නම් කරන ලද තානාපති එන්.අයි.ඩී. පරණවිතාන මහත්මිය, ඉරානය සඳහා නම් කරන ලද තානාපති මහාචාර්ය එම්.අයි. ෆසීහා අස්මි, ඊශ්‍රායලය සඳහා නම් කරන ලද තානාපති සමන් කුමාර චන්ද්‍රසිරි මහතා සහ පලස්තීනය සඳහා නම් කරන ලද නියෝජිත එම්. ෆාරුක් එම්. ෆවුසර් මහතා මෙම දූත පිරිසට ඇතුළත් විය.

දූත මණ්ඩල ප්‍රධානීන්ට සිය සුබ පැතුම් එක් කළ අග්‍රාමාත්‍යවරිය, ශ්‍රී ලංකාවේ සමාජ-ආර්ථික අභිවෘද්ධිය සඳහා ඔවුන්ගේ කාර්යභාරය අවධාරණය කළ අතර, ශ්‍රී ලංකාවේ ජාතික අවශ්‍යතා ඉදිරියට ගෙන යාමේදී ඔවුන්ගේ ඉදිරි වගකීම්වල වැදගත්කම සඳහන් කළාය.

නම් කරන ලද සත්කාරක රටවල් සහ බහුපාර්ශ්වික සබඳතා හමුවේ ස්ථාවර, වෘත්තීමය සහ උපායමාර්ගික මැදිහත්වීමක් තුළින් ජාත්‍යන්තර වේදිකාව තුළ ශ්‍රී ලංකාව පිළිබඳ ධනාත්මක සහ විශ්වසනීය ප්‍රතිරූපයක් ගොඩ නැගීමේ වැදගත්කම ද අග්‍රාමාත්‍යවරිය මෙහිදී තවදුරටත් අවධාරණය කළා ය.

තිරසාරත්වය, නවෝත්පාදනය සහ දිගුකාලීන සංවර්ධන ක්‍රියාවලිය කෙරෙහි අවධානය යොමු කරමින්, ශ්‍රී ලංකාවේ සංවර්ධන ප්‍රමුඛතා ක්ෂේත්‍ර සඳහා ආයෝජන අවස්ථා හඳුනාගෙන ආයෝජන ආකර්ෂණය කර ගැනීමට ප්‍රමුඛත්වය දිය යුතු බව අග්‍රාමාත්‍යතුමිය නව දූත මණ්ඩල ප්‍රධානීන් දිරිමත් කරමින් සඳහන් කළා ය.

මෙම හමුවේදී නව වෙළඳපොළ අවස්ථා ගවේෂණය කිරීම සහ වෙළඳ සබඳතා ශක්තිමත් කිරීම ඇතුළුව ශ්‍රී ලංකාවේ අපනයන ප්‍රවර්ධනය සහ විවිධාංගීකරණය කෙරෙහි විශේෂ අවධානයක් යොමු කරන ලදී.

මෙම අවස්ථාවට අග්‍රාමාත්‍ය ලේකම්, අග්‍රාමාත්‍ය අතිරේක ලේකම් සාගරිකා බෝගහවත්ත මහත්මිය සහ නම් කරන ලද දූත මණ්ඩල ප්‍රධානීන් සහභාගී වූහ.

අග්‍රාමාත්‍ය මාධ්‍ය අංශය