රටේ ප්‍රමුඛතාවලට අනුකූලව ශ්‍රී ලංකාවට අඛණ්ඩව සහයෝගය දැක්වීමට සූදානම් බව IMF නියෝජිතයින් තහවුරු කරයි

ශ්‍රී ලංකාව ලබා ඇති ආර්ථික ප්‍රගතිය සහ රටේ සංවර්ධනයේ ඉදිරි අදියර සාකච්ඡා කිරීම අරමුණු කරගනිමින් ජාත්‍යන්තර මූල්‍ය අරමුදලේ (IMF) නියෝජිත පිරිසක්ජූනි 30 වැනිදා අරලියගහ මන්දිරයේදී අග්‍රාමාත්‍ය ආචාර්ය හරිනි අමරසූරිය හමුවිය.

IMF නියෝජිත පිරිස පිළිගත් අග්‍රාමාත්‍යතුමිය, පසුගිය වසර එකහමාරක කාලය තුළ ශ්‍රී ලංකාවට ජාත්‍යන්තර මූල්‍ය අරමුදල විසින් ලබාදුන් අඛණ්ඩ සහයෝගයට සිය කෘතඥතාව පළ කළ අතර, ඉදිරියටත් දෙපාර්ශවය අතර හවුල්කාරිත්වය පවත්වාගෙන යාමේ වැදගත්කම අවධාරණය කළාය.

ගෝලීය අවිනිශ්චිතතා හමුවේ තිරසාර ප්‍රගතියක් අත්කර ගැනීම සඳහා ශ්‍රී ලංකාව සිය ඉදිරි ගමන් මඟ සකස් කරගත යුතු බව අග්‍රාමාත්‍යතුමිය පෙන්වා දුන් අතර විශේෂයෙන්ම වෙනස්වන ගෝලීය ප්‍රවණතාවන් හමුවේ බලශක්ති, වරාය සහ කෘෂිකාර්මික ක්ෂේත්‍ර කෙරෙහි වැඩි අවධානයක් යොමු කරමින්, රටේ බාහිර කම්පනවලට මුහුණ දීමේ හැකියාව තවදුරටත් ශක්තිමත් කළ යුතු බවද සඳහන් කළාය.

IMF නියෝජිතයින් විසින් ශ්‍රී ලංකාව අත්කරගෙන ඇති ආර්ථික ප්‍රගතිය මෙන්ම, රටේ උද්ධමනය සැලකිය යුතු ලෙස පහත වැටීම සහ ආර්ථිකය ස්ථාවරත්වය ඇගයීමට ලක් කළහ. එමෙන්ම ගෝලීය ආර්ථික අවිනිශ්චිතතාවයන් හේතුවෙන් මතුව ඇති අභියෝගවලට මුහුණ දීමට ශ්‍රී ලංකාවට සිය සහයෝගය ලබා දීමට සූදානම් බව ඔවුන් තවදුරටත් අවධාරණය කළහ.

වෙළෙඳාම ප්‍රවර්ධනය කිරීම, ආයෝජන ආකර්ෂණය කර ගැනීම, සමාජ ආරක්ෂණය ශක්තිමත් කිරීම, සියල්ල ඇතුළත් ආර්ථිකයක් ගොඩ නැගීම සහ යටිතල පහසුකම් සංවර්ධනය කිරීමේ වැදගත්කම පිළිබඳවද මෙහිදී දීර්ඝ ලෙස සාකච්ඡා කෙරිණි.

සංවර්ධනය ළඟා කරගැනීමේ දී ආර්ථික සංවර්ධනය සහ සමාජ ආරක්ෂණය යන දෙකම සමඟ ඉදිරියට යා යුතු බවත් එය ළඟා කර ගැනීම සඳහා අපද්‍රව්‍ය කළමනාකරණය සහ අපජල පද්ධති වැනි ක්ෂේත්‍ර ඇතුළුව ශක්තිමත් පොදු යටිතල පහසුකම් අත්‍යවශ්‍ය බවද අග්‍රාමත්‍යතුමිය තවදුරටත් පෙන්වා දුන්නාය. එසේම, කාර්යක්ෂම රාජ්‍ය සේවා සැපයීමට බාධාවක් වී ඇති මානව සම්පත් ගැටළු සඳහා විසඳුම් සෙවීමේ අවශ්‍යතාවය ද අග්‍රාමාත්‍යතුමිය තවදුරටත් අවධාරණය කළාය.

මෙම අවස්ථාවට IMF ආසියා හා පැසිෆික් දෙපාර්තමේන්තුවේ නියෝජ්‍ය අධ්‍යක්ෂ Sonali Jain-Chandra මහත්මිය, ශ්‍රී ලංකාව සඳහා වන IMF දූත මණ්ඩල ප්‍රධානී Evan Papageorgiou මහතා, ශ්‍රී ලංකාවේ IMF නේවාසික නියෝජිත Martha Woldemichael මහත්මිය, අග්‍රාමාත්‍ය ලේකම් ප්‍රදීප් සපුතන්ත්‍රි මහතා, ශ්‍රී ලංකා මහ බැංකුවේ ජ්‍යෙෂ්ඨ නියෝජ්‍ය අධිපති කේ. එම්. ඒ. එන්. දවුලගල මහත්මිය සහ මහ බැංකුවේ නිලධාරීන්, අග්‍රාමාත්‍ය අතිරේක ලේකම් සාගරිකා බෝගහවත්ත මහත්මිය ඇතුළු පිරිසක් සහභාගි වූහ.

අග්‍රාමාත්‍ය මාධ්‍ය අංශය

එක්සත් ජාතීන්ගේ ජනගහන අරමුදලේ (UNFPA) නියෝජිත පිරිසක් ජූනි 30 වැනිදා අරලියගහ මන්දිරයේදී අග්‍රාමාත්‍ය ආචාර්ය හරිනි අමරසූරිය මහත්මිය හමුවිය.

UNFPA නියෝජිත පිරිස පිළිගත් අග්‍රාමාත්‍යතුමිය, කාන්තා සෞඛ්‍යය සහ ස්ත්‍රී පුරුෂ සමානාත්මතාව ප්‍රවර්ධනය කිරීම සඳහා UNFPA විසින් අඛණ්ඩව ලබාදෙන සහයෝගය අගය කළාය.

මෙම හමුවට සහභාගී වූ UNFPA නියෝජිත පිරිස ස්ත්‍රී පුරුෂ සමාජභාවය පදනම් කරගත් ප්‍රචණ්ඩත්වය තවදුරටත් ප්‍රධාන අභියෝගයක් බව පෙන්වා දුන් අතර, එම ගැටලුවට විසඳුම් ලබාදීම සඳහා පුළුල් ප්‍රතිපත්තිමය විසදුම් සකස් කිරීම පිළිබඳව සඳහන් කළහ.

එම ක්ෂේත්‍රයට සම්බන්ධ ප්‍රධාන අංශ රැසකින් ශ්‍රී ලංකාව සැලකිය යුතු ප්‍රගතියක් අත්කරගෙන ඇති නමුත්, එම ප්‍රගතිය පවත්වාගෙන යාම සහ තවදුරටත් ශක්තිමත් කිරීම අත්‍යවශ්‍ය බව අග්‍රාමාත්‍යතුමිය සඳහන් කළාය. එසේම, ඒකාබද්ධ සේවා සැපයීම, සංවර්ධන හවුල්කරුවන් අතර සම්බන්ධීකරණය ශක්තිමත් කිරීම සහ විශේෂයෙන් තරුණ පරපුර අතර ප්‍රජනන සෞඛ්‍ය සේවා පිළිබඳ දැනුවත්භාවය ඉහළ නැංවීමේ වැදගත්කම පිළිබඳව ද මෙහිදී අවධානය යොමු විය.

මෙම අවස්ථාවට ආසියා හා පැසිෆික් කලාපය සඳහා UNFPA කලාපීය අධ්‍යක්ෂ ආචාර්ය Aleksandar Sasha Bodiroza මහතා, ශ්‍රී ලංකාවේ වැඩබලන UNFPA නියෝජිත Phuntsho Wangyel මහතා ඇතුළු UNFPA නියෝජිත පිරිස, අග්‍රාමාත්‍ය ලේකම් ප්‍රදීප් සපුතන්ත්‍රි මහතා, අග්‍රාමාත්‍ය අතිරේක ලේකම් සාගරිකා බෝගහවත්ත මහත්මිය, එක්සත් ජාතීන් සහ මානව හිමිකම් අංශයේ අධ්‍යක්ෂ ජනරාල් ශෂිකා සෝමරත්න මහත්මිය සහ විදේශ කටයුතු, විදේශ රැකියා හා සංචාරක අමාත්‍යාංශයේ නිලධාරීන් පිරිසක් සහභාගි වූහ.

අග්‍රාමාත්‍ය මාධ්‍ය අංශය

පොසොන් පුර පසළොස්වක පොහොය නිමිත්තෙන් බොරලැස්ගමුව නගර සභාව මඟින් සංවිධානය කළ “අනුබුදු වන්දනා” පොසොන් කලාපය, අග්‍රාමාත්‍ය ආචාර්ය හරිනි අමරසූරියගේ ප්‍රධානත්වයෙන් ඓතිහාසික බෙල්ලන්විල රජමහා විහාරස්ථානයේදී ජුනි 29 වන දින උත්කර්ෂවත් අන්දමින් විවෘත කෙරිණි.

​ඓතිහාසික බෙල්ලන්විල රාජමහා විහාරය වෙත පැමිණි අග්‍රාමාත්‍යතුමිය, විහාරාධිපති අතිපූජ්‍ය බෙල්ලන්විල ධම්මරතන නායක ස්වාමීන් වහන්සේ බැහැදැක සුහද පිළිසඳරක නිරත වූවාය. අනතුරුව බෝ මළුව වෙත පැමිණ ආගමික වතාවත් සිදු කර ආශිර්වාද ලබා ගත්තාය.

​ඉන් පසු, “අනුබුදු වන්දනා” පොසොන් කලාපය විදුලි ආලෝකයෙන් ඒකාලෝක කරමින්, පොසොන් කලාපය නිල වශයෙන් ජනතාවට විවෘත කිරීම අග්‍රාමාත්‍යතුමිය විසින් සිදු කළාය.

අනතුරුව දහම් පාසල් දරු දැරියන් විසින් ඉදිරිපත් කරන ලද භක්ති ගීත ප්‍රසංගය නැරඹීමට ද අග්‍රාමාත්‍යතුමිය එක් විය.

​මෙම අවස්ථාව සඳහා මහා සංඝරත්නය, පාර්ලිමේන්තු මන්ත්‍රී ලක්ෂ්මන් නිපුණආරච්චි, බොරලැස්ගමුව නගර සභාවේ සභාපති නිශාන්ත වෙදමුල්ල යන මහත්වරුන් ඇතුළු සම්භාවනීය ආරාධිත අමුත්තන්, ප්‍රදේශවාසීන් සහ විශාල බැතිමතුන් පිරිසක් සහභාගී වී සිටියහ.

​අග්‍රාමාත්‍ය මාධ්‍ය අංශය

රටක සැබෑ සංවර්ධනය උදා වන්නේ භෞතික සම්පත් දියුණු කිරීමෙන් පමණක් නොව, සෑම පුරවැසියකුගේම හදවත් තුළ දේශීයත්වය, සාරධර්ම සහ සංස්කෘතික බැඳීම් ගොඩනැගීම හා ශක්තිමත් කිරීම තුළින් බව අග්‍රාමාත්‍ය ආචාර්ය හරිනි අමරසූරිය ප්‍රකාශ කළාය.

අග්‍රාමාත්‍යතුමිය මේ බව කියා සිටියේ දිවුලපිටිය ප්‍රාදේශීය සභාව හා ප්‍රාදේශීය මහලේකම් කාර්යාලය එක්ව ප්‍රථම වරට සංවිධානය කළ “අනුබුද්ධාභි වන්දනා” ප්‍රාදේශීය පොසොන් මහා පෙරහැරේ සමාරම්භක අවස්ථාවට ජූනි 28 වනදා ප්‍රධාන ආරාධිතයා ලෙස සහභාගී වෙමිනි.

එහිදී තවදුරටත් අදහස් දැක්වූ අග්‍රාමාත්‍යතුමිය,

මිහිඳු මහරහතන් වහන්සේගේ ලංකාගමනයත් සමඟ ශ්‍රී ලාංකිකයන්ට උතුම් ශ්‍රී සද්ධර්මය පමණක් නොව උසස් සංස්කෘතික වටිනාකම්, මානව ගුණධර්ම මෙන්ම දසරාජ ධර්මයෙන් පෝෂණය වූ රාජ්‍ය පාලන ක්‍රමයක්ද උරුම වුණා. අපට උරුම වූ ඒ දහම් ආලෝකය හේතුවෙන් අසිරිමත් වාරි කර්මාන්තය හා අහස උසට නැඟි මහා ස්තූප හරහා හෙළයන්ගේ නිර්මාණශීලිත්වය මුළු ලෝකයටම කියා පෑමට හැකි වුණා.

ලෝකයේ අන් කිසිදු රටක දැකිය නොහැකි, අපේ ප්‍රධානතම සංස්කෘතික මංගල්‍යය වන ශ්‍රී දළදා පෙරහැරට අනුරූපව පවත්වනු ලබන “අනුබුද්ධාභි වන්දනා” පොසොන් මහා පෙරහැර වැනි උත්සව, රටට අවශ්‍ය සැබෑ සංවර්ධනය ළඟා කර ගැනීමට විශාල පිටුවහලක්.

අපේ රටේ අභිමානවත් පෙරහැර සංස්කෘතිය විදහාපාමින් මෙවැනි උත්සව පැවැත්වීම තුළින් අනෙකාට ගරු කරන,සහෝදරත්වයන් යුතු, පොදු අරමුණු වෙනුවෙන් සාමූහික හැඟීමෙන් එක්ව වැඩ කරන දරු පරපුරක් රට තුළ බිහි වීමට මඟ පෑදෙන බව අග්‍රාමාත්‍ය ආචාර්ය හරිනි අමරසූරිය පැවසුවාය.

මෙම අවස්ථාවට මහා සංඝරත්නය ප්‍රමුඛව විදේශ කටයුතු, විදේශ රැකියා හා සංචාරක අමාත්‍ය විජිත හේරත්, මුදල් හා ක්‍රමසම්පාදන නියෝජ්‍ය අමාත්‍ය ආචාර්ය අනිල් ජයන්ත, කම්කරු නියෝජ්‍ය අමාත්‍ය මහින්ද ජයසිංහ, ගම්පහ දිස්ත්‍රික් පාර්ලිමේන්තු මන්ත්‍රී ධර්මප්‍රිය විජේසිංහ, මන්ත්‍රීණි හේමමාලි වීරසේකර, දිවුලපිටිය ප්‍රාදේශීය සභාවේ සභාපතිතුමා ඇතුළු මන්ත්‍රීවරුන්, ප්‍රාදේශීය ලේකම්තුමිය, රාජ්‍ය නිලධාරීන් සහ ප්‍රදේශවාසීන් විශාල පිරිසක් එක්ව සිටියහ.

අග්‍රාමාත්‍ය මාධ්‍ය අංශය

ශ්‍රී ලංකා බාලදක්ෂ සංගමය විසින් ප්‍රථම වරට සංවිධානය කරනු ලබන “කොළඹටත් පොසොන්” ජාතික බාලදක්ෂ පොසොන් කලාපය 2026 අග්‍රාමාත්‍ය ආචාර්ය හරිනි අමරසූරිය ගේ ප්‍රධානත්වයෙන් ජූනි 28 දින කොළඹදී ආරම්භ විය.

ජනාධිපති අනුර කුමාර දිසානායක මහතාගේ සංකල්පයකට අනුව, ජනාධිපති ලේකම් කාර්යාලයේ සම්බන්ධීකරණයෙන් සහ රාජ්‍ය හා පෞද්ගලික අංශවල දායකත්වයෙන් මෙම පොසොන් කලාපය සංවිධානය කර තිබේ.

කොළඹ හුනුපිටිය ගංගාරාම විහාරාධිපති, පූජ්‍ය ආචාර්ය කිරින්දේ අස්සජි නාහිමිපාණන් වහන්සේගේ ප්‍රධානත්වයෙන් ආගමික වතාවත් සහ පංචශීලයේ පිහිටුවීම සිදු කෙරුණු අතර, පොසොන් කලාපය විවෘත කිරීමේ සංදේශය අඩංගු මංජුසාව පිළිගැනීමෙන් අනතුරුව අග්‍රාමාත්‍යතුමිය විසින් පොසොන් කලාපය නිල වශයෙන් විවෘත කරනු ලැබුවාය.

අනතුරුව අදහස් දැක්වූ අග්‍රාමාත්‍ය ආචාර්ය හරිනි අමරසූරිය,

බාලදක්ෂ ව්‍යාපාරය පාසල් පද්ධතිය තුළ තවදුරටත් ව්‍යාප්ත කිරීම අතිශය වැදගත් බවත්, මෙවැනි ආගමික හා සමාජීය වැඩසටහන් හරහා සමාජයට සිදුවන සේවය ද එතුමිය මෙහිදී බෙහෙවින් අගය කළාය.

මෙම පොසොන් කලාපය ජුනි මස 28 සහ 29 යන දෙදින තුළ පස්වරු 6.00 සිට අලුයම 1.00 දක්වා මහජනතාව සඳහා විවෘතව පවතී. ඒ අනුව කොළඹ 02, චිත්තම්පලම් ඒ. ගාඩිනර් මාවතේ ශ්‍රී ලංකා බාලදක්ෂ මූලස්ථාන පරිශ්‍රය ඇතුළුව ලේක්හවුස් වටරවුමේ සිට ශ්‍රී ලංකා පොලිස් මූලස්ථාන වටරවුම දක්වා වූ සීමාව තුළ මෙම පොසොන් කලාපය ක්‍රියාත්මක වේ.

මෙම අවස්ථාවට ශ්‍රී ලංකා බාලදක්ෂ සංගමයේ සභාපති රන්සිරි පෙරේරා, ප්‍රධාන බාලදක්ෂ කොමසාරිස් නීතිඥ මනෝජ් නානායක්කාර, ත්‍රිවිධ හමුදා සහ පොලිස් ප්‍රධානීන්, රාජ්‍ය නිලධාරීන් ඇතුළු සම්භාවනීය ආරාධිතයන් රැසක් සහභාගී වූහ.

අග්‍රාමාත්‍ය මාධ්‍ය අංශය

ශ්‍රී සම්බුද්ධ ශාසනය මෙරට ස්ථාපිත කළ මිහිඳු මහ රහතන් වහන්සේගේ ඓතිහාසික ධර්ම දූත මෙහෙවර සිහිපත් කරමින් සැමරෙන උතුම් පොසොන් පුර පසළොස්වක පොහොය ආධ්‍යාත්මික අවබෝධය, ප්‍රඥාව සහ සමාජ සමානාත්මතාව අපට සිහිපත් කරන ඉතා පුණ්‍යවන්ත දිනයකි.

පොසොන් පොහොය යනු ශ්‍රී ලංකාවේ ඉතිහාසයේ ආගමික සිදුවීමක් පමණක් නොව, ජාතික චින්තනය, සංස්කෘතිය සහ සදාචාරාත්මක ජීවන රටාව පරිවර්තනය කළ ඓතිහාසික සංධිස්ථානයකි.

මිහිඳු මහ රහතන් වහන්සේගේ ශ්‍රී ලාංකිකයන් සමග දේශනාව දායාද වූ බෞද්ධ දර්ශනය, ස්වදේශී ගොඩනැගුණු පුරා අපගේ ජාතික අනන්‍යතාව හැඩගැස්වූ අමිල උරුමයක් බවට පත්විය.

පොසොන් පොහොය අපට සිහිපත් කරන්නේ සැදැහැ සංවර්ධනය ආරම්භ වන්නේ මිනිසාගේ සිත තුළින් බවයි. කරුණාව, දයාව, සමානාත්මතාව, විනය සහ වගකීම වැනි උතුම් බෞද්ධ වටිනාකම් සමාජයේ පදනම බවට පත් කළ හැකි නම්, සාමකාමී, සාධාරණ සහ සෞභාග්‍යමත් ශ්‍රී ලංකාවක් ගොඩනැඟීම අපට වඩාත් පහසු වනු ඇත.

අද අපේ රට නව බලාපොරොත්තු සහිත ගමන් මඟකට පිවිස සිටී. එම ගමන සාර්ථක කර ගැනීමට ආර්ථික ප්‍රගතිය පමණක් නොව, සදාචාරාත්මක වටිනාකම්වලින් සුපෝෂිත සමාජයක්ද අවශ්‍ය වේ. පොසොන් පොහොයයේ සැදැහැ භරිත වන සදාචාරය, අවිහිංසාව සහ මානව දයාව, ජනතා අපේක්ෂා ඉටු කරන සාධාරණ හා සර්ව සාධාරණ රටක් ගොඩනැඟීම වෙනුවෙන් වූ රජයේ අරමුණ වෙත මඟපෙන්වීමකි.

උදාවූ වූ උතුම් පොසොන් පුර පසළොස්වක පොහොය දිනය සියලුම බෞද්ධ ජනතාවගේ ජීවිතවලට නිවීම, සැනසීම, ප්‍රඥාව සහ සෞභාග්‍ය උදා කරන පින්බර පොහොය දිනයක් වේවායි ප්‍රාර්ථනා කරමි.

ආචාර්ය හරිනි අමරසූරිය
අග්‍රාමාත්‍ය
ශ්‍රී ලංකා ප්‍රජාතාන්ත්‍රික සමාජවාදී ජනරජය