ගුරු විභාග පවත්වන්නේ නඩු තීන්දු අනුවයි. - අග්රාමාත්ය ආචාර්ය හරිනි අමරසූරිය
උපාධිය ලබා ගත් දිනය සංශෝධනය කරන්න අධිකරණයෙන් කළ ඉල්ලීමට ලැබෙන තීරණය අනුව ඉදිරි කටයුතු කරනවා
ළමා ආරකෂණයට අවධානය දෙමින් නව ඩිජිටල් ප්රතිපත්තිය අප්රේල් මාසයේ හදුන්වා දෙනවා
පාසල් යටිතල පහසුකම් වෙනුවෙන් නිවැරදි සැළසුම් අනුව ලබා දී ඇති ප්රතිපාදන වියදම් කර එහි ප්රගතිය ඉදිරිපත් කරන්න.
ඉදිරියේදී පැවැත්වීමට නියමිත ගුරු විභාග ද්විත්වය පවත්වනු ලබන්නේ පවතින නඩු කටයුතුවලට අදාළ අධිකරණ තීන්දු අනුව බවත්, ලැබී ඇති ඉල්ලීම් සැලකිල්ලට ගෙන උපාධිය ලබාගත් දිනය සම්බන්ධ කොන්දේසි සංශෝධනය කිරීම සඳහා අධිකරණයෙන් ඉල්ලීමක් කිරීමට කටයුතු කළ බවත් අග්රාමාත්ය ආචාර්ය හරිනි අමරසූරිය පැවසුවාය.
නව අධ්යාපන ප්රතිසංස්කරණ පිළිබඳ මොනරාගල දිස්ත්රික්කයේ අධ්යාපන බලධාරීන් දැනුවත් කිරීම වෙනුවෙන් මොනරාගල රාජකීය විද්යාලයේ පැවති සාකච්ඡාවකට එක්වෙමින් අග්රාමාත්යවරිය මේ බව සඳහන් කළාය.
නව අධ්යාපන ප්රතිසංස්කරණ යටතේ ද්විතීයික පාසල් සඳහා සුහුරු පුවරු (Smart Boards) ලබාදීමේ වැඩසටහන යටතේ මොනරාගල දිස්ත්රික්කයේ පාසල් 132ක් සඳහා සුහුරු පුවරු පිරිනැමේ. අග්රාමාත්ය කාර්යාලයේ ක්රියාත්මක ඩිජිටල් කාර්යසාධක බලකායේ මැදිහත්වීම මත සිදුකෙරෙන මෙම වැඩසටහනේ සංකේතවත් පියවරක් ලෙස ද්විතීයික පාසල් 10ක් සඳහා සුහුරු පුවරු ප්රදානය කිරීම අග්රාමාත්යවරියගේ ප්රධානත්වයෙන් මෙහිදී සිදු විය. ළමා ආරක්ෂණය කෙරෙහි විශේෂ අවධානයක් යොමු කරමින් සැකසූ නව ඩිජිටල් ප්රතිපත්තිය එළඹෙන අප්රේල් මාසයේදී හඳුන්වා දෙන බව ද මෙහිදී අවධාරණය කෙරිණි.
නව අධ්යාපන ප්රතිසංස්කරණ යටතේ පළමු ශ්රේණියට හඳුන්වා දුන් නව ඉගෙනුම් ක්රමවේදයන් ක්රියාත්මක වන ආකාරය නිරීක්ෂණය කිරීම සඳහා අග්රාමාත්යවරිය අද (13) මොනරාගල දිස්ත්රික්කයේ සංචාරයක නිරත වූවාය. එහිදී කුඹුකන මො/ශ්රී ෂන්මුගම් දෙමළ මහා විද්යාලයේ සහ මොනරාගල මදුරුකැටිය මහා විද්යාලයේ පළමු ශ්රේණියේ දරුවන්ගේ අධ්යාපන කටයුතු නිරීක්ෂණය කිරීමට අග්රාමාත්යතුමිය පියවර ගත්තාය.
සිසුන් සංඛ්යාව ඉහළ යාම සහ යටිතල පහසුකම් සංවර්ධනය වීම සැලකිල්ලට ගනිමින්, මදුරුකැටිය මහා විද්යාලයේ නම “මොනරාගල ධර්මරාජ මහා විද්යාලය” ලෙස වෙනස් කිරීමට පාසල් සංවර්ධන සමිතිය ඉදිරිපත් කළ යෝජනාවට ද අග්රාමාත්යවරිය මෙහිදී අනුමැතිය ලබා දුන්නාය.
අලුත් වූ වැඩපොත් සහ ක්රියාකාරකම් පාදක කරගත් නව අධ්යාපන ක්රමය ඉතා ඵලදායී බවත්, දරුවන් ඉතා උනන්දුවෙන් ඊට සහභාගී වන බවත් එහිදී ගුරුවරු අග්රාමාත්යවරිය සමඟ පැවසූහ.
මොනරාගල රාජකීය විද්යාලයේ පැවති අධ්යාපන බලධාරී හමුවේදී නිලධාරීන් අමතමින් අග්රාමාත්යවරිය වැඩිදුරටත් මෙසේ අදහස් දැක්වූවාය.
“පවතින ගුරු පුරප්පාඩුවලට සම්පූර්ණ විසඳුමක් නොවුණත්, මෙම විභාග හරහා සැලකිය යුතු සහනයක් ලබාදිය හැකියි. අධිකරණ තීරණය අනුව උපාධිය ලබාගත් දිනය 2025.06.30 ලෙස කලින් නම් කර තිබුණත්, බොහෝ පිරිසකගේ ඉල්ලීම් සැලකිල්ලට ගෙන අමාත්ය මණ්ඩල අනුමැතිය ඇතිව එම දිනය සංශෝධනය කිරීමට අධිකරණයෙන් ඉල්ලීමක් කළා ඒ ලැබෙන තීරණ අනුව අපි කටයුතු කරනවා.
පාසල් යටිතල පහසුකම් වෙනුවෙන් නිවැරදි සැලසුම් අනුව ලබා දී ඇති ප්රතිපාදන විනිවිදභාවයකින් යුතුව වියදම් කර එහි ප්රගතිය ඉදිරිපත් කළ යුතුයි. ජාතික, පළාත් හෝ ග්රාමීය, නාගරික ලෙස බෙදී අපට මේ ගමන යා නොහැකියි. අධ්යාපන බලධාරීන් ලෙස ඔබ නිවැරදි දත්ත මත පදනම්ව කඩිනම් සහ නිවැරදි තීරණ ගන්න.
ඒ වගේම පිරිවෙන් අධ්යාපනය සංවර්ධනය කිරීම සහ පිරිවෙන් ගුරුවරුන්ගේ ගැටලුවලට විසඳුම් සෙවීමට අධ්යාපන අමාත්යාංශයේ පිරිවෙන් කමිටුව දැනටමත් සාකච්ඡා කරමින් සිටින බවද අග්රාමිත්යතුමිය සඳහන් කළාය.
මෙම අවස්ථාවට මහා සංඝරත්නය, ඌව පළාත් ආණ්ඩුකාර නීතිඥ කපිල ජයසේකර, වෙළෙඳ හා වාණිජ නියෝජ්ය අමාත්ය ආර්. එම්. ජයවර්ධන, පාර්ලිමේන්තු මන්ත්රී අජිත් අගලකඩ, ඌව පළාත් අධ්යාපන ලේකම් නිහාල් ගුණරත්න යන මහත්වරුන් ඇතුළු අධ්යාපන ක්ෂේත්රයේ නිලධාරීන් පිරිසක් සහභාගී වූහ.
අග්රාමාත්ය මාධ්ය අංශය
