චීන විද්‍යාඥයින් පිරිසක් දේශීය විද්‍යාඥයින් කණ්ඩායමක් සමඟ එක්ව ශ්‍රී ලංකාවේ නිදන්ගත වකුගඩු රෝගය සහ ඒ පිළිබඳ නොදන්නාවූ හේතු (CKDu) පිළිබඳ අධ්‍යයනයක් සිදු කර ඇත. මෙම අධ්‍යයනය සිදුකළ විද්‍යාඥයින් කණ්ඩායම 2024.07.10 දින අරලියගහ මන්දිරයේ දී අග්‍රාමාත්‍ය දිනේෂ් ගුණවර්ධන මහතා හමුවූ අතර අධ්‍යයනයේ අවසන් වාර්තාව නුදුරේදීම ඉදිරිපත් කරන බව පැවසීය.
චීන රජය, පර්යේෂණයට සහාය වීමට අමතරව, ශ්‍රී ලංකාවේ වකුගඩු රෝගයෙන් බලපෑමට ලක් වූ දිස්ත්‍රික්කවල ජල පිරිපහදු කිරීමේ ව්‍යාපෘතියක් සඳහා ප්‍රදානයක් ලබා දුන්නේය.
තමා ජල සම්පාදන අමාත්‍යවරයාව සිටියදී ආරම්භ කරන ලද ශ්‍රී ලංකාවේ ජලය පිරිසිදු කිරීම සහ ජලයෙන් බෝවන රෝග පිළිබඳ පර්යේෂණ සඳහා ලබාදුන් ප්‍රදානය පිළිබඳව අග්‍රාමාත්‍යවරයා මෙහිදී චීනයට ස්තූතිය පළ කළේය.
චීනයේ පරිසර පරිසර විද්‍යාව පිළිබඳ පර්යේෂණ මධ්‍යස්ථානයේ ප්‍රධානී මහාචාර්ය මින් යැං මහතා පැවසුවේ චීනයේ ශ්‍රී ලංකා පර්යේෂණ ප්‍රදාන ව්‍යාපෘතිය යටතේ චීනයේ ශ්‍රී ලංකා ඒකාබද්ධ පර්යේෂණ සහ ජල තාක්ෂණය පිළිබඳ අංගසම්පූර්ණ පර්යේෂණ මධ්‍යස්ථානයක් (JRDC) මහනුවරදී ආරම්භ කර ඇති බවයි. JRDC හි අධ්‍යක්ෂ ආචාර්ය එස්. කේ. වේරගොඩ පැවසුවේ එම මධ්‍යස්ථානයේ ගමන් පථය හැඩගැස්වීමේදී එහි තීක්ෂ්ණ බුද්ධිය සහ මගපෙන්වීම ඉතා අගනා වන බැවින් මධ්‍යස්ථානය චීන විද්‍යා ඇකඩමිය (CAS) සමඟ සහයෝගයෙන් කටයුතු කරන බවයි. රටේ තෝරාගත් භූගෝලීය ප්‍රදේශවල, ප්‍රධාන වශයෙන් උතුරු මැද සහ නැගෙනහිර වියළි කලාපවල නව මහජන සෞඛ්‍ය අභියෝගයක් ඇති කළ වකුගඩු රෝගය පිළිබඳ පර්යේෂණ සිදු කරන ලදී.
වියළි කලාපයේ භූගත ජලයේ කැල්සියම් සහ ෆ්ලෝරයිඩ් තිබීම හේතුවෙන් වකුගඩු රෝග ඇති වී ඇති බව පර්යේෂණවලින් තහවුරු වී ඇති බව මහාචාර්ය එස්.එච්.පී.පී කරුණාරත්න මහතා පැවසීය.
ශතවර්ෂ ගණනාවක් තිස්සේ උඩරට වතුකරයේ රසායනික පොහොර භාවිතය, කඳුකරයෙන් ආරම්භ වන ගංගා ජලයේ අධික ලෙස ලෝහමය අන්තර්ගතයන් පැවතීමට හේතු විය හැකි බැවින් තවදුරටත් පර්යේෂණ කළ යුතු බව අග්‍රාමාත්‍යවරයා මෙහිදී පෙන්වා දුන්නේය. චීන දූත පිරිසට චීනයේ නියෝජ්‍ය තානාපති Zhu Yanwei සහ Eco Environmental Sciences පර්යේෂණ මධ්‍යස්ථානයේ මහාචාර්ය Yuansong Wei සහ අනෙකුත් ප්‍රමුඛ විද්‍යාඥයින් සහ ඉංජිනේරුවන් ඇතුළත් විය.
පාර්ලිමේන්තු මන්ත්‍රී යදාමිණි ගුණවර්ධන, අග්‍රාමාත්‍ය ලේකම් අනුර දිසානායක සහ ජාතික විද්‍යා පදනමේ සභාපති මහාචාර්ය රංජිත් සේනාරත්න ඇතුළු පිරිසක් මෙම අවස්ථාවට සහභාගි වූහ.
අග්‍රාමාත්‍ය මාධ්‍ය අංශය