ගලෙන් කොටුව බැන්දයි තිරිකුණාමලේ

கொத்தலாவல பாதுகாப்பு பல்கலைக்கழகத்தின் 38வது மற்றும் 64வது மாணவர் படையணிகளின் பணித்துறை நியமனம் மற்றும் விடுகை அணிவகுப்பு பிரதமர் தினேஷ் குணவர்தன தலைமையில் இன்று (2024.01.28) திருகோணமலை கடற்படை தளத்தில் இடம்பெற்றது.

கிழக்கு மாகாண ஆளுநர் செந்தில் தொண்டமான், பாராளுமன்ற உறுப்பினர் யதாமினி குணவர்தன, பாதுகாப்பு பணிக்குழாம் பிரதானி ஜெனரல் ஷவேந்திர சில்வா, கடற்படைத் தளபதி வைஸ் அட்மிரல் பிரியந்த பெரேரா ஆகியோர் இந்நிகழ்வில் கலந்துகொண்டனர்.

இந்நிவில் பிரதமர் ஆற்றிய உரை...

ஜெனரல் சேர் ஜோன் கொத்தலாவல பாதுகாப்பு பல்கலைக்கழகத்தின் 38வது மாணவர் படையணி ஆட்சேர்ப்பு மற்றும் 64வது மாணவர் படையணி பணித்துறை நியமன நகழ்வின் 2 பெண் படையணி அதிகாரிகள் உட்பட 49 இளம் மாணவர் படையணி அதிகாரிகளின் அணிவகுப்பில் பங்கேற்பதை நான் ஒரு பாக்கியமாக கருதுகிறேன்.

இந்த அழகான மற்றும் வண்ணமயமான மாலை நிகழ்வுக்கு என்னை அழைத்ததற்காக முப்படைகளின் தளபதி ஜனாதிபதி மற்றும் கடற்படைத் தளபதி ஆகியோருக்கு நான் இந்த சந்தர்ப்பத்தில் நன்றி தெரிவிக்க விரும்புகிறேன்.

அன்பின் இளம் அதிகாரிகளே,

நீங்கள் ஒரு உன்னதமான சேவைக்கு பிரவேசிக்கின்றீர்கள். எமது தாய்நாட்டின் பாதுகாப்பும், குடிமக்களின் பாதுகாப்பும் எமது பாதுகாப்பு படைகளிலேயே தங்கியுள்ளது. இன்று முதல் நீங்கள் அர்ப்பணிப்புடனும் உறுதியுடனும் இந்த பொறுப்பை சுமக்கும் இராணுவ சேவையின் உறுப்பினர்களாக இருக்கிறீர்கள்.

கடற்படை மற்றும் கடல்சார் கற்கைகள் பீடத்தில் உங்களின் இறுதிப் பயிற்சியை வெற்றிகரமாக நிறைவு செய்துள்ள நீங்கள் இன்று முழு அளவிலான கடற்படை அதிகாரிகளாக பெருமையுடனும் கண்ணியத்துடனும் பணியாற்றுவதற்கு நியமிக்கப்பட்டுள்ளீர்கள்.

புதிதாக நியமிக்கப்பட்டுள்ள இந்த அதிகாரிகள் அனைவரும் தமது ஒழுக்கத்தை பேணி இலங்கை கடற்படையை தொழில்சார் மற்றும் போட்டித்தன்மை வாய்ந்த நிறுவனமாக மாற்றுவதற்கான தற்போதைய செயற்பாட்டிற்கு ஆதரவளிப்பார்கள் என நான் எதிர்பார்க்கின்றேன். ஆனால் அதைவிட முக்கியமானது எமது நாட்டின் ஒருமித்ததன்மை, ஆள்புல ஒருமைப்பாடு மற்றும் இறைமையைப் பாதுகாப்பதாகும்.

எமது கடல் எல்லைகளை பாதுகாப்பதில் கடற்படை மேற்கொண்டு வரும் பணிகளுக்கு மேலதிகமாக, இயற்கை அனர்த்தங்களில் போது அதன் பொறுப்புகளும் மிகவும் மதிக்கப்படுகின்றன. மேலும், கடல் வழியாக ஏற்படும் தீங்கு விளைவிக்கும் ஊடுருவல்களைத் தடுப்பதில் புதிய சவால்களையும் கடற்படை எதிர்கொள்கிறது.

நீங்கள் முகாமைத்துவம் மற்றும் தொழில்நுட்பம், திட்ட முகாமைத்துவம் மற்றும் சமூகவியல் மற்றும் மூலோபாய ஆய்வுகளில் விஞ்ஞான மானிப் பட்டத்தை முடித்திருப்பதை நான் முக்கியமாக பார்க்கிறேன். மேலும், புதிய அதிகாரிகள் நவீன தொழில்நுட்பத்தில் புத்தாக்க ஆராய்ச்சிகளில் ஈடுபட வேண்டும் என்று கேட்டுக்கொள்கிறேன். உங்கள் தொழில்முறைத் திறனை நீங்கள் தொடர்ந்து மேம்படுத்துவதுடன், அத்துறைகளில் சிறந்து விளங்கும் எதிர்பார்ப்பும் உங்களிடம் இருக்க வேண்டும்.

இது எமது தாய்நாட்டைக் பாதுகாக்க மிக உயர்ந்த தியாகங்களைச் செய்தவர்களை நன்றியுடன் நினைவுகூரும் ஒரு சந்தர்ப்பமாகும்.

பல ஆண்டுகளாக கடற்படையின் துணிச்சலான அதிகாரிகள் முழு அர்ப்பணிப்புடனும் உறுதியுடனும் வெளிப்படுத்திய பணியை முன்மாதிரியாகக் கொண்டு புதிய அதிகாரிகள் தேசத்திற்கு சேவை செய்வார்கள் என்று நான் நம்புகிறேன்.

இலங்கை கடற்படையில் சேவையாற்றுவதற்காக இந்த இளம் வயதினருக்கு தொடர்ந்து ஆதரவளித்து வரும் பெற்றோர்கள் மற்றும் அன்புக்குரியவர்களுக்கு எனது மனமார்ந்த பாராட்டுகளைத் தெரிவித்துக் கொள்கிறேன்.

எமது நாட்டின் இராணுவத் துறையில் முதன்மையான நிறுவனங்களாக கடற்படை மற்றும் சமுத்திரவியல் கற்கைபீடம் மற்றும் கொத்தலாவல பல்கலைக்கழகம் ஆகியவற்றின் கட்டளை அதிகாரிகள் மற்றும் பணிப்பாளர் சபையினால் இளைஞர்கள் மற்றும் யுவதிகளுக்கு அறிவைப் பகிர்வதற்கு மேற்கொண்ட முயற்சிகளுக்கு எனது பாராட்டுகளைத் தெரிவித்துக் கொள்கிறேன்.

பல மரியாதைக்குரிய கடற்படை அதிகாரிகள், நீர் மேற்பரப்பைக் காட்டிலும், நவீன யுகம் கோரும், எம்மைச் சுற்றியுள்ள பெருங்கடல்களின் ஆழமான ஆழத்தில் உள்ள சாதனைகளில் அதிக அக்கறை கொண்டுள்ளனர்.

திருகோணமலை ஆயிரக்கணக்கான ஆண்டுகளாக வரலாற்று முக்கியத்துவத்தைக் கொண்டுள்ள வங்காள விரிகுடாவை ஒட்டி அமைந்துள்ள ஒரு கேந்திர முக்கியத்துவம் வாய்ந்த இடமாகும். இது உலகின் மிகப்பெரிய இயற்கை துறைமுகங்களில் ஒன்றாகும். இது இயற்கை அன்னையின் தனித்துவமான பரிசு.

1948 இல் நாம் சுதந்திரம் பெற்ற போதிலும், திருகோணமலை மற்றும் கட்டுநாயக்க முகாம்கள் இரண்டும் 1957 இலேயே எமது தேசத்துடன் மீட்டெடுக்கப்பட்டன என்பது குறிப்பிடத்தக்கது. அன்றிலிருந்து, இலங்கை கடற்படை தேசிய நலன்களைப் பாதுகாப்பதற்காக பல்வேறு நடவடிக்கைகளை ஆரம்பித்து அவற்றை வெற்றிகளாக மாற்றிய தேசத்தின் முக்கிய கடற்படைத் தளமாக இது உள்ளது.

இந்த வரலாற்று முக்கியத்துவத்தை மனதில் கொண்டு நீங்கள் பயிற்சி பெற்றுள்ளீர்கள் என்பதை நினைவில் கொள்ளுங்கள். எனவே உங்கள் எதிர்காலம் உங்கள் கடமைகளை விடாமுயற்சியுடனும் மரியாதையுடனும் செய்ய வழிவகுக்கும் நிகழ்வுகளால் வடிவமைக்கப்பட்டுள்ளது.

புதிய அதிகாரிகளின் எதிர்காலம் சிறக்க எனது நல்வாழ்த்துக்கள்.

உங்களுக்கு மும்மணிகளின் ஆசிகள்!